ကေအိုင်အိုနဲ့ အစိုးရ ဆွေးနွေးပွဲ ပြန်လည်စတင်

2012-03-08

ကေအိုင်အိုနဲ့ အစိုးရကိုယ်စားလှယ်တွေ ဒီနေ့ နေ့လယ်ပိုင်းက စပြီးတော့ တရုတ်နိုင်ငံ ရွှေလီမြို့ ရေပူစမ်း ဟော်တယ်မှာ နိုင်ငံရေး အရ ဆွေးနွေး ကြပါတယ်။ ဒီနေ့ ဆွေးနွေးပွဲမှာ အရင် သဘောတူထားတဲ့ အချက်တွေကိုပဲ ပြန်လည် ဆွေးနွေး ကြတာလို့ KIO ဘက်က ပြောပါတယ်။

မြန်မာအစိုးရဘက်က ဦးအောင်သောင်းနဲ့ ဦးသိန်းဇော်တို့ ဦးဆောင်တဲ့အဖွဲ့နဲ့ ကေအိုင်အိုဘက်ကတော့ ကေအိုင်အို အမြဲတမ်း ဗဟို ကော်မီတီဝင် ဦးဆွမ်လွတ်ဂမ်၊ ဒုဗိုလ်မှူးကြီး ဂျီးနောင်၊ ဗိုလ်မှူးကြီး ဇော်ရော်တို့ ဦးဆောင် ဆွေးနွေး ကြတယ်လို့ သိရပါတယ်။

ဒီနေ့ ဆွေးနွေးတဲ့ အကြောင်းအရာတချို့နဲ့ ပတ်သက်လို့ ကေအိုင်အို ဒုတိယစစ်ဦးစီးချုပ် ဗိုလ်ချုပ် ဂွမ်မော်က KIO အနေနဲ့ အစိုးရထံ တင်ပြချက် အပိုင်းသုံးပိုင်းကို တင်ပြ ထားတာဖြစ်ပြီး ဒီကိစ္စတွေကို ဆက်လက် ဆွေးနွေးနေတာ ဖြစ်ကြောင်း ပြောပါတယ်။ အခုလို ဆွေးနွေးနေတဲ့ အချိန်မှာ မြန်မာ အစိုးရ တပ်တွေရဲ့လှုပ်ရှားမှုတွေ များလာနေပြီး နေ့စဉ် တိုက်ပွဲ ဖြစ်တယ်လို့ ဗိုလ်ချုပ်ဂွမ်မော်က ပြောပါတယ်။

ကေအိုင်အိုနဲ့ အစိုးရကိုယ်စားလှယ်တွေ ရွှေလီမြို့မှာ နိုင်ငံရေးအရ တွေ့ဆုံဆွေးနွေးကြတာ အခု အကြိမ်နဲ့ဆို သုံးကြိမ်၊ လကြားယန်မှာ သုံးကြိမ်၊ ထိုင်းနိုင်ငံမှာ တစ်ကြိမ် အားလုံး ခုနစ်ကြိမ် ရှိပြီ ဖြစ်ပါတယ်။

Ref: RFA News