SSA က တန်ပြန် ထိုးစစ်ဆင်

ဇော်ကြီး
ဇူလိုင်လ ၂၀ ရက်၊

ရှမ်းပြည်တပ်မတော် မြောက်ပိုင်း SSA-N ခေါ် ရှမ်းပြည်တိုးတက်ရေးပါတီ SSPP ဌာနချုပ်သို့ အစိုးရ တပ်ဖွဲ့များက ထိုးစစ်ဆင် တိုက်ခိုက်နေစဉ် SSA ဖက်မှ တန်ပြန် စစ်ဆင်သည့် အနေဖြင့် မိုင်းရယ်မြို့သို့ ၀င်ရောက် တိုက်ခိုက်ခဲ့သည်ဟု SSA မြောက်ပိုင်း က ပြောသည်။

ဝမ့်ဟိုင်းဌာနချုပ် အနောက်မြောက်ဖက်ရှိ မိုင်းရယ်မြို့ အနောက်ဖက်နှင့် မြောက်ဖက်ရှိ လုံခြုံရေး ဂိတ်များအား ယမန်နေ့ မွန်းလွဲပိုင်း အချိန်က SSA ဖက်မှ ၀င်ရောက် တိုက်ခိုက်ခဲ့သည်ဟု ရှေ့တန်း တပ်မှူးတဦးက ယခုလိုပြောသည်။

“နေ့လည် ၁၂ နာရီ ၄၅ လောက်ကနေ ၁၄ နာရီ ၃၅ လောက်အထိ အဲဒီမိုင်းရယ်ဂိတ်တွေကို ကျနော်တို့တပ်က ၀င်စီးတာ သူတို့ဖက်က ဒဏ်ရာ ရတဲ့လူတွေ ဆေးရုံမှာ ပြည့်နေတယ်လို့ ပြန်ကြားရတယ်။ အရပ်သားက ပြန်ပြော တာပေ့ါနော်။”

ယင်းသို့ ပစ်ခတ်မှုဖြစ်ပွားနေစဉ် မိုင်းရယ်အခြေစိုက် အမြောက်တပ်ရင်း အမတ (၃၅၀)က လက်နက်ကြီး များဖြင့် ပစ်ခတ်မှုကြောင့် အရပ်သား တဦး ထိခိုက်မှုရှိခဲ့သည်ဟု ၎င်းက ဆက်လက် ပြောဆိုသည်။

“မိုင်းရယ် အမြောက်တပ်ကလည်း အမြောက်တွေနဲ့ ရမ်းသမ်းပစ်လို့ ပဲ့ထွက်လာတဲ့ အမြောက်ကျည်က လယ်ထွန်နေတဲ့ ရပ်ကွက်(၂) က လယ်သမား တယောက်ကိုထိပြီး လာရှိုးကို သယ်သွားရတယ်။”

ထိုနေ့ တရက်တည်းတွင် မိုင်းရယ်မှ ၀မ့်ဟိုင်းဌာနချုပ်သို့ စစ်ကူလာသည့် ခြေလျင်တပ်ရင်း ခလရ ၆၇ နှင့် ခလရ ၂၂ တပ်ရင်း နှစ်ရင်းအား နားလိရွာအနီးတွင် SSA က ခြုံခို တိုက်ခိုက်ခဲ့သည်ဟု သိရသည်။

စစ်ဆင်ရေး အထူးအဖွဲ့ (ကစထ- ၂)မှုး ဗိုလ်ချုပ် အောင်သန်းထွဋ်က ယခုလ (၁၆) ရက်နေ့မှ စတင်၍ ၀မ့်ဟိုင်း ဌာနချုပ်အား တစ်ပတ်အတွင်း သိမ်းပိုက်ရန် အမိန့် ပေးခဲ့သည့်နောက် SSAက မြို့ပေါ်ရှိ အစိုးရ တပ်စခန်းများကို ထိုးစစ်ဆင် တိုက်ခိုက်ခဲ့ခြင်း ဖြစ်သည်ဟု အဖွဲ့ ပြောခွင့်ရပုဂ္ဂိုလ် ဗိုလ်မှူးစိုင်းလ က ပြောသည်။

“မိုင်းရယ် မြို့ထဲဖြစ်တာတော့ (၁၈) ရက် ည ဆယ့်တစ်နာရီ ကနေ (၁၉) ရက် မနက် သုံးနာရီ အထိပေ့ါ။ ကျနော်တို့ ဖက်က တပ်မဟာ(၁)ရဲ့ ဒု-တပ်မဟာမှူး ဗိုလ်မှူး ဆျဲန်ဖှ ဦးစီးပြီးတော့ မိုင်းရယ် ဗျူဟာကုန်းကို ၀င်ရောက် တိုက်ခိုက်တယ်။ သူတို့ဖက်က ဒဏ်ရာ ရတဲ့သူတွေ ခြောက်ဘီးကား နှစ်စီးနဲ့ လားရှိုး ဖက်ပို့တယ်။”

အလားတူ ယမန်နေ့တရက်တည်း၌ အခြားနေရာများတွင်လည်း တိုက်ပွဲငယ် ငါးကြိမ်ထက်မနည်း ဖြစ်ပွားခဲ့သည်။ သို့သော် ယနေ့တွင်မူ ပစ်ခတ်မှုများ ကြိုကြား ဖြစ်ပွားနေသော်လည်း ပြင်းထန်မှု မရှိသည့်အပြင် အစိုးရ တပ်ဖွဲ့များ သည်လည်း ၀မ့်ဟိုင်း ဌာနချုပ်နှင့် ငါးမိုင် ခန့်အကွာ၌ ရပ်တန့်လျှက် ရှိသည်ဟု ၎င်းက ဆက်လက် ပြောဆိုသည်။

အစိုးရတပ်ဖွဲ့ဖက်က ထိုးစစ်ဆင် တိုက်ခိုက်နေမှု ရပ်တန့်သွားသည့်အပေါ် “သူတို့ အရိပ်အရောင် ကြည့်ရတာတော့ ပြန်ဆုတ်မယ့် သဘော ရှိမယ် ထင်တယ်။ အဲတာ သူတို့ နည်းပရိယာယ်လား ဘယ်လိုလည်း မသိဘူးလေ။ ဒါပေမယ့် စောင့်တော့ ကြည့်ရမယ်။” ဟု ဗိုလ်မှူး စိုင်းလက သုံးသပ်ပြောဆိုသည်။

ရှမ်းပြည်အရေး လေ့လာစောင့်ကြည့်နေသည့် ထိုင်းနိုင်ငံအခြေစိုက် ရှမ်းသံတော်ဆင့် သတင်း အယ်ဒီတာ ဦးစိန်ကြည်က ယခု စစ်ဆင်ရေးအား စစ်တိုင်းကြီး(၃) တိုင်းမှ တပ်ဖွဲ့ဝင် များဖြင့် အသုံးပြု တိုက်ခိုက်နေသည့် အပြင် ကစထ ၂ မှူး ဗိုလ်ချုပ် အောင်သန်းထွဋ် ကိုယ်တိုင် ဦးဆောင် ပြုလုပ်နေသည့် အတွက် အစိုးရတပ်များ ပြန်လည် ဆုတ်ခွာရန် မျော်လင့်၍ မရနိုင်ကြောင်း ပြောဆိုသည်။

အစိုးရဖက်မှ အမှန်တကယ် ပြန်လည် ဆုတ်ခွာသွားပါက “အဲဒါ ရှမ်းပြည်နယ် ပြည်နယ် လွှတ်တော်က တစုံတရာ တိုက်တွန်း ဖျောင်းဖျမှု ကြောင့်လား၊ သမ္မကြီး ဦးသိန်းစိန်ရဲ့ အရပ်သား အစိုးရကပဲ စစ်တပ်အပေါ်မှာ တစိတ်တဒေသ သြဇာ ညောင်းပါတယ် ဆိုတာကို ပြသချင်လို့လား၊ ဒါမှမဟုတ် တရုတ်ကနေ ရှမ်းနဲ့ ကချင်မှာ ဖြစ်နေတဲ့ တိုက်ပွဲတွေကို တခြားနေရာကို ကူးစက် ကျယ်ပြန့်သွားမှာကို မလိုလားလို့ နအဖကို လက်တို့တာလား။ အဲဒါတွေကြောင့် ဖြစ်နိုင်တာပေ့ါ။” ဟု ဦးစိန်ကြည်က သုံးသပ်သည်။

လွန်ခဲ့သည့် မတ်လ (၁၃) ရက်နေ့က နှစ်ဖက်စတင်ဖြစ်ပွားခဲ့သည့် တိုက်ပွဲများသည် ယခုလ (၁၁) ရက်နေ့တွင် ပိုမို ပြင်းထန် လာခဲ့ပြီး မြောက်ပိုင်း SSA ဌာနချုပ် ၀မ့်ဟိုင်းကျေးရွာအား အစိုးရ တပ်အင်အား တစ်ထောင်ကျော်ဖြင့် ၀ိုင်းရံ ပိတ်ဆို့ တိုက်ခိုက်နေခြင်း ဖြစ်သည်။

တိုက်ပွဲများကြောင့် ဒေသတွင်းရှိ ကျေးရွာ နှစ်ဆယ်ကျော်မှ အရပ်သားပြည်သူများ အိုးအိမ် စွန့်ခွာ၍ တောတွင်း၌ ထွက်ပြေး ပုန်းရှောင်နေကြရပြီး ထိခိုက် ဒဏ်ရာ ရသူများလည်း ရှိသည်ဟု သိရသည်။

Ref: NMG News