ဇာတ်လမ်းက ခုမှစတာ ဆိုသော ဦးထူးထူးဟန်

ကိုပေါက်
ကြာသပတေးနေ့၊ ဇူလိုင်လ ၂၁ ရက် ၂၀၁၁

နယူးဒေလီ (မဇ္ဈိမ) ။ ။ ၁၉၈၈ လူထုအုံကြွမှုအတွင်း အစိုးရ ဆန့်ကျင်ဆန္ဒပြသူ ၂၄ ဦးအား ကိုယ်တိုင် ပစ်သတ်ခဲ့ပြီး ၁ဝဝ ကျော် သတ်ဖြတ် ရာ၌ ပါဝင်ခဲ့သည်ဟု ဦးထူးထူးဟန်၏ ဝန်ခံ ဖြောင့်ချက်များကို ကိုးကား၍ သြစတြေးလျနိုင်ငံ AAP သတင်း ဌာနတွင် ဇူလိုင်လ ၁၈ ရက်နေ့ ကတည်းက စတင် ဖော်ပြပါရှိခဲ့ပြီး ten NEWS, SBS ရုပ်မြင်သံကြား သတင်းများတွင်လည်း ထုတ်လွှင့် ပြသခဲ့ကြသည်။

အပြည်ပြည်ဆိုင်ရာ ရာဇဝတ်ခုံရုံး ICC သို့ တက်ရောက်ရန် ရည်ရွယ်ချက်ဖြင့် မိမိကိုယ်ကို မြန်မာ စစ်ရာဇဝတ်ကောင် အဖြစ် ထုတ်ဖော် ပြောဆို လိုက်သည့် အတွက် အတိုက်အခံ ဒီမိုကရေစီ အင်အားစုများ အကြား သံသယ ဖြစ်သူများ ရှိနေကြသလို မြန်မာ အစိုးရကိုသာ အကျိုး ဖြစ်ထွန်းစေမှာလား ဆိုသော မေးခွန်းများ ထုတ်လာကြသည်။

ထို့ကြောင့် သြစတြေးလျနိုင်ငံတွင် ၁၅ နှစ်ကြာ နေထိုင်လာခဲ့သည့် ဦးထူးထူးဟန်အား ၎င်း၏ ဖြတ်သန်းမှုနှင့် ဤသို့ လုပ်ရခြင်း၏ အကြောင်းရင်း၊ ရည်ရွယ်ချက်များ သိရှိနိုင်ရန် မဇ္ဈိမ သတင်းထောက် ကိုပေါက်က ဆက်သွယ် မေးမြန်း ထားသည်။

Australian Associated Press – AAP သတင်း ရေးသားချက်အရ ကိုထူးထူးဟန်က ၈၈ အရေးအခင်း ကာလတုန်းက ဆန္ဒပြသူတွေကို လုပ်ကြံသတ်ဖြတ်ခဲ့တဲ့ အထဲမှာ ပါဝင်ခဲ့တယ်၊ ၂၄ ယောက်ကို ကိုယ်တိုင် သတ်ဖြတ်ခဲ့တယ်လို့ သိရပါတယ်။

‘‘ဟုတ်ပါတယ်ခင်ဗျ။ ၂၄ ယောက် မကဘူး ထင်တယ်၊ ၂၄ ယောက် ကျော်တယ်။ မှတ်မိတဲ့လူပေါ့။ ကျနော် နာမည်သိတဲ့ လူ၊ မြို့နယ် သိတဲ့လူ။ တကယ်တမ်း သတ်ခဲ့တာတော့ ၂၄ ယောက်ထက် မကဘူး ပေါ့နော်။ သာကေတ ဟိုဘက် တံတားထိပ်၊ ဒီဘက် တံတားထိပ်မှာ ကျနော်တို့ တပ်မ ၇၇ နှစ်ခု ရှိတယ်။ ဒီဘက်မှာ ကျနော်တို့က MI-6 လျှို့ဝှက်ရုံး ထားထားတာလေ။ အဲဒီမှာ ကျနော် ကိုယ်တိုင် ပစ်သတ်တယ်။ ပစ်သတ်ပြီးတော့ ကျနော့် ရဲဘော်တွေကပဲ အလောင်းတွေကို မီးရှို့ပြီးတော့ ငမိုးရိပ်ချောင်းထဲ ပစ်ချတယ်။ အလောင်း ဖျောက်တာပေါ့ဗျာ”

အဲဒီလူတွေရဲ့ စာရင်း ရှိသေးတယ်ဆိုတော့ အဲဒီစာရင်းကို ထုတ်ပြန်ဖို့ရှိလား ခင်ဗျာ့။

‘‘ကျနော်က ထုတ်ပြန်ထားပါတယ်။ AAP မှာ ပေးထားပါတယ်။ အွန်လိုင်းကနေ ကော်ပီ ယူလိုက်လို့ ရပါတယ်။ ကျနော် သတ်ထားတဲ့ လူတွေရဲ့ မြို့နယ်တွေ၊ နာမည်တွေနဲ့ အသက် ဘယ်လောက် ရှိတယ် ဆိုတာတွေလည်း ပါတယ်။ နာမည်တွေ ကတော့ ဗမာလိုပဲ ကျနော် ရေးပေး ထားပါတယ်။ ခင်ဗျား ပြန်ကြည့်လို့ ရတာပေါ့။ သာကေတတို့ ဘာတို့၊ ကြို့ပင်ကောက်တို့ အကုန်ပါတယ်’’

အဲဒီလူတွေက များသောအားဖြင့် ကျောင်းသား လူငယ်တွေပဲလား။

‘‘လူငယ်တွေပေါ့ဗျာ၊ ကျောင်းသားတွေပေါ့။ ပြီးတော့ နောက်ကနေ မာစတာမိုင်း လုပ်တဲ့ သူတွေပေါ့ဗျာ။ အဲဒီလို လူမျိုးတွေ ပါတယ်။ ကွန်မြူနစ် ဘက်ကနေ ဝင်လာပြီးတော့ ကျောင်းသားတွေကို မြှောက်ပေးတဲ့ လူတွေလည်း ပါတယ်။ အစုံပေါ့ဗျာနော်။ ကျနော်ပြောတာ ၂ဝ ကျော်ထဲ မဟုတ်ဘူးဗျ။ ၁ဝဝ ကျော်တယ်ဗျ။ ကျနော် အမိန့်ပေးပြီးလို့ ကျနော့် အမိန့်နဲ့ သေသွားရတဲ့ သူတွေလည်း အများကြီးပဲ။ ကျနော် ကယ်လိုက်တဲ့ သူတွေလည်း အများကြီး ရှိတယ်ပေါ့။ ဘာဖြစ်လို့လဲ ဆိုတော့ သူတို့တွေက ကျနော့် ရပ်ကွက်ထဲက သူတွေ ဖြစ်နေတယ်။ သူတို့ စာရင်းတွေကို ကြည့်လိုက်တဲ့ အချိန်မှာ ကိုယ်နဲ့ လမ်းအတူတူ၊ ကျောင်းတက်ခဲ့တဲ့ သူတွေ၊ ကိုယ့်မိတ်ဆွေရဲ့ သားသမီးတွေ၊ သူတို့ မိဘတွေကို ကျနော်သိတော့ တချို့ လူတွေကျတော့ လွှတ်ပေးတယ်လေ။ တချို့ကျတော့ ကျနော် သတ်ပစ်တယ်။ တချို့ကိုကျတော့ ကျနော်ကိုယ်တိုင် မသတ်ဘူး။ ကျနော် အမိန့် ပေးလိုက်တာပေါ့။ ကျနော်က ကျောင်းသားတွေ ထဲမှာလည်း ခေါင်းဆောင် လုပ်နေတာကိုး။ ကိုမိုးသီးတို့နဲ့ အတူတူ လုပ်နေတာကိုး။ ၈၈ တုန်းက MI-6 ကနေ ကျနော်က တာဝန်ယူတယ်။ ပြီးတော့ အဲဒီကနေတဆင့် ကျောင်းသား သမဂ္ဂတွေကနေ သတင်းတွေကို ကျနော်က MI-6 ကို ပေးတယ်ပေါ့နော်’’

ကိုယ်ကိုယ်တိုင်သတ်တော့ ဘယ်လိုသတ်လဲ။

‘‘9mm နဲ့ပေါ့။ အဲဒီခေတ်က အရာရှိတွေကို ပေးထားတာကတော့ 9mm ၂ ခုရှိတယ်။ အတိုရှိတယ်၊ အရှည်ရှိတယ်။ ၉ မမ အတိုပေါ့။ အဲဒီဟာနဲ့ပဲ ကျနော်က ပစ်သတ်တာ။ သူတို့ကို မျက်နှာဖုံး စွပ်ထားတော့ နောက်ကနေ ပစ်တာ၊ သေမှန်းတောင် မသိဘူး။ နောက်ကနေ ပစ်တာဆိုတော့ နာကျင်မှု မရှိဘူးပေါ့ဗျာ။ သူတို့ခေါင်းကို သေနတ်နဲ့လည်း မထောက်ဘူး။ အဝေးကနေ ပစ်တာ။ အဲဒီနေရာမှာ ပွဲချင်းပြီးပါပဲ”

အဝေးကနေ ပစ်တယ်ဆိုတာက ဘယ်လိုလဲ။

‘‘သူတို့နောက်ကနေ ပစ်တာလေ။ သူတို့ခေါင်းကို သေနတ်ကြီးနဲ့ ထိလိုက် တေ့လိုက်မယ်ဆိုရင် သူတို့ ခံစားရမယ်။ တပေ အကွာ လောက်ကနေ ပစ်တာပေါ့။ ၆ လက်မအကွာ၊ တပေ အကွာလောက်ကနေ ပစ်တာပေါ့။ သူတို့ကို မခံစားရအောင် ပေါ့နော်’’

ဘယ်သူက အမိန့်ပေးလို့လဲ။

‘‘ကျနော့်ကို အမိန့်ပေးတာကတော့ .. အင်း .. ဒါက ကျနော့်အကြောင်းကို ပြောပြတာလေ။ အခု ကျနော်တို့ ဘက်မှာလည်း ကျနော် အပါအဝင် ၉ ဦး ရှိတယ်။ ကျနော်တို့ MI 6 က လူတွေ ဒုက္ခသည် အနေနဲ့ ရောက်လာတာ။ အဲလိုမျိုးဆိုတော့ ကျနော်က သူများတွေ ကိစ္စ မပြောချင်တော့ဘူး။ ကျနော့် အရာရှိတွေ၊ ကျနော့် တပည့်တွေအ ကြောင်း မပြောချင်တော့ဘူး။ ကျနော့် အကြောင်းပဲ ပြောချင်တယ်။ အမိန့်ဆိုတာက အထက်က လာတာပဲ။ အဲဒီအချိန်က ကျနော် အလုပ်နှစ်ခု လုပ်နေရတဲ့ အတွက် အရမ်း ပင်ပန်းတယ်။ တနေ့ကို ၄ နာရီလောက်ပဲ အိပ်ရတယ်၊ ၃ နာရီလောက်ပဲ အိပ်ရတယ်။ ဦးနှောက် မှန်မှန်ကန်ကန်နဲ့ ဆုံးဖြတ်ချက် မရဘူး။ အဲဒီအချိန်မှာ အရမ်းရှုတ်ထွေး နေတဲ့ အချိန်။ ကျောင်းသား သမဂ္ဂမှာလည်း ကျနော်က အထွေထွေ အတွင်းရေးမှူး’’

ဘယ်ကျောင်းသား သမဂ္ဂလဲခင်ဗျာ့။

‘‘အဲဒီတုန်းက ကျနော်က ၉ တန်းနှစ် ဆိုတော့ အခြေခံ ကျောင်းသားသမဂ္ဂ ရဲတေဇတို့ ဘာတို့နဲ့ အတူတူပေါ့”

၉ တန်းဆိုတော့ ဘယ်အထကလဲ ခင်ဗျာ့။

‘‘ကျနော်က ၉ တန်းတော့ မဟုတ်ဘူးပေါ့။ ၉ တန်း ကျောင်းသား အနေနဲ့ ဒီကျောင်းသား ထုထဲကို ဝင်လာတာပေါ့။ ၈၈ မှာ။ ကျနော်ကိုယ်ကျနော် ၉ တန်းကျောင်းသားပါ ဆိုပြီးတော့’’

အဲဒီတုန်းက အသက်ဘယ်လောက်ရှိပြီလဲ။

‘‘အဲဒီတုန်းက ကျနော်က ၂၂ လောက် ရှိပြီဗျာ့။ ၆၇ မှာ မွေးတာ’’

တောင်ဥက္ကလာပ ၉ တန်းကျောင်းသား အနေနဲ့ ဆိုတော့ တောင်ဥက္ကလာပ ကျောင်းသား လေးတွေက ဘယ်လိုလုပ် ယုံကြည်နိုင်မလဲ။

‘‘တောင်ဥက္ကလာပဆိုတာက ဒီလိုဗျာ့။ ကျနော်က အသက် လိမ်ထားတော့ ကျနော် ၁၈ နှစ်ပေါ့။ DSA မှာ ခုနှစ်တောင် မမှတ်မိတော့ဘူး။ ကျနော်က ၆၇ မှာမွေးတာ ၁၈ နှစ်ဆိုတော့ ခင်ဗျားဟာ ခင်ဗျား ပေါင်းကြည့်တော့။ ကျနော်က သိပ် မမှတ်မိတော့ဘူး။ ကြာခဲ့ပြီ။ နှစ် ၂ဝ ကျော်ခဲ့ပြီ’’

DSA မှာ ဘယ်နှနှစ်လောက် တက်ခဲ့ရလဲ။

‘‘၂ နှစ်။ ကျနော်တို့က ၈ လရယ်၊ နောက် ၆ လကျတော့ MI ကိုရောက်တော့ ၆ လ သင်တန်း ထပ်ပေးတယ် ဆိုတော့ အားလုံးပေါင်း ၃ နှစ် ကျော်ပေါ့နော်။ ကျနော် MI 6 ကို ရောက်တဲ့ အချိန်မှာ ၈၇ နှစ်ကုန် ဖြစ်နေပြီ။ ၈၈ အစမှာ ကျနော်က MI မှာ အရာရှိပေါက် ဖြစ်သွားပြီလေ။ ၈၈ ဖြစ်တော့ ကျနော်က အရာရှိအနေနဲ့ တာဝန်ယူရပြီ ၂ ပွင့် ဖြစ်သွားပြီင်္။ အဲဒီတော့ ၈၈ မှာ ရဲက အားနည်းတော့ MI 6 တို့၊ MI 5 တို့၊ MI 9 တို့၊ MI 7 တို့ကို သုံးတယ်လေ။ ၄ ခုရှိတယ်။ ရန်ကုန်မှာ သုံးတာ။ နယ်တွေမှာကျတော့ MI 11 တို့ ဘာတို့ ဖြစ်ကုန်တယ်။ ရန်ကုန်မှာ သုံးတာက MI 5,6 မနော်ဟရီ၊ ရေကြည်အိုင် ကျတော့ MI 7,9 တို့ ဖြစ်ကုန်ပြီ’’

DSA မှာ ဘယ်ကျောင်းလဲ၊ တက်ခဲ့ရတာ။

‘‘အဲဒါကျတော့ ကျနော် ပြောလို့ မဖြစ်ဘူးနော်။ ဘာကြောင့်လဲ ဆိုတော့ ကျနော့်မှာ ဒီမှာ ရဲဘော်တွေ တချို့ မိဘတွေက ဗမာပြည်မှာ ရှိနေတယ်။ သင်တန်းက နံပတ်စဉ်တွေ ပြောချလိုက်ရင် အကုန်လုံး ရှုပ်ကုန်မှာ စိုးလို့ ပြောပိုင်ခွင့် မရှိဘူးနော်။ စိတ်တော့ မရှိပါနဲ့’’

နှစ်ပေါင်း ၂ဝ ကျော်ကြာမှ ဘာကြောင့် ဖော်ထုတ်ရတာလဲ။

‘‘ကျနော်က တောက်လျှောက် လုပ်လာခဲ့တာ။ ထိုင်းမှာလည်း ရောက်တော့လည်း တော်တော်များများ ကျနော့်ကို သိပါတယ်။ ထိုင်းမှာ ဆိုရင်လည်း ကျနော်က အထွေထွေ အတွင်းအရေးမှူး လုပ်ခဲ့တယ်။ အဲဒီမှာစပြီး ကျနော်နဲ့ စစ်အစိုးရနဲ့ စပြီး ပြဿနာ တက်တယ်။ တက်တယ် ဆိုတာက ကျနော့်ကို ဘတ်ဂျက်ဖြတ်တယ်။ ထိုင်းရောက်ခါ စက ကျနော်က ကော်ဆန်းတို့ ဘာတို့မှာ ဘိလပ်မြေတွေ သယ်ပြီးတော့ အလုပ်တွေ ဝင်လုပ်ရတယ်။ MI 6 တယောက် အနေနဲ့ ဘတ်ဂျက် မပေးဘူး။ ဘာကြောင့်လဲ ဆိုတော့ ပြည်တွင်းရေးက ဘာညာ၊ သံအမတ်တွေတောင် လခမရဘူး ဘာညာပေါ့။ ကျနော် ခေါင်းဆောင်ဖြစ်လာတဲ့ အချိန်ကျတော့ ကျနော့်ကို ဒေါ်လာ ၂၀၀၀၀ ထည့်ပေးတယ်။ ထည့်ပေးပြီးတော့ ကျနော့်ကို အလုပ်ခိုင်းဖို့ လုပ်တယ်။ ကျနော်က အဲဒီ ၂၀၀၀၀ စလုံးကို တပတ် အတွင်းမှာ သုံးပစ် လိုက်တယ်။ ပြီးတော့ သူတို့ကို ဖုန်းဆက်ပြီး ပြောလိုက်တယ်။ သူတို့က “ဘယ်မှာလဲ” ဆိုတော့ “ငါ .. ပတ်ပုန်းမှာ ချနေတယ်” လို့ ပြောလိုက်တယ်ဗျာ ပြီးရော။ အဲဒီလိုမျိုး ပြဿနာလေးတွေ ရှိတယ်။ အဲဒီလိုနဲ့ တဖြည်းဖြည်းနဲ့ ကျနော့်ကို သုံးလို့ မရတော့မှန်း သိလာတယ်။ မရမှန်း သိလာတော့ ကျနော့်ကို ခြိမ်းခြောက်တယ်။ “122 နဲ့ မင်းကို ဆွဲတော့မယ်၊ နိုင်ငံတော် ပုန်ကန်မှုနဲ့ မင်းကို ဆွဲမယ်၊ မင်းကို သေဒဏ်ချနိုင်တယ်” အဲလိုမျိုး ခြိမ်းခြောက်လာတော့ ကျနော်က **** ** လို့ ပြောပြ လိုက်တယ်။”

‘‘ကျနော်က ထောင်လည်း ကျခဲ့ဖူးတာကိုး။ ထောင်ထဲမှာကတည်းက ကျနော်က တဖြည်းဖြည်း စိတ်ဓာတ်က ပြောင်းလာပြီ။ တကယ့်ဖြစ်ရပ်မှန် တိုက်ပွဲဝင်နေတဲ့ ကျောင်းသား လူငယ်တွေနဲ့ ကိုယ်က ရင်ဆိုင်ပြီးတော့ သွားခဲ့တော့ အရေးအခင်း တခုထဲတင် မဟုတ်ဘူး။ တချို့ကျောင်းသားတွေ ကျတော့ တကယ့်ကို ကိုယ်ကျိုး စွန့်ကြတာ။ အဲဒီလိုတွေ မြင်လာတဲ့ အချိန်မှာ ကိုယ်ချင်း စာလာတယ်။ ထောင်ထဲမှာ ၃ နှစ်ကျော် နေခဲ့တော့ ထောင်ထဲမှာလည်း ကျနော်က နိုင်ငံရေးတွေ ဘာတွေ လေ့လာခဲ့တယ်လေ’’ ထောင်ထဲမှာကတည်းက စိတ်က ပြောင်းလာတဲ့ သဘောပေါ့။”

‘‘ပြောင်းလာတယ်ဗျာ။ မလုပ်ချင်တော့ဘူး။ ထောင်က ထွက်လာပြီးတော့ ကျနော် တောင်းဆိုတယ်။ ကျနော့်ကို ရပ်ဆိုင်းပေးဖို့။ ဘာကြောင့်လဲ ဆိုတော့ ကျနော်က ထောင်ထဲမှာ အရိုက်ခံရတာကိုး။ ကျနော် MI 6 မှာ လုပ်နေတာကို ထောင်က အရာရှိတွေကို ပေးမသိဘူး။ ပေးမသိတော့ ကျနော့်ကို ကျောင်းသားပဲ ထင်တာပေါ့။ ကျောင်းသား ဆန္ဒပြတဲ့ အထဲ ကျနော်လည်း ပါတော့ ပိတ်ရိုက် ခံရတာပေါ့။ ကျနော့်ကို VIP သဘောမျိုး မထားထားဘူး။ ထောင်က ထွက်လာတော့ ကျနော်က အရမ်း နစ်နာတော့ နစ်နာကြေး တောင်းလို့ ရတာပေါ့ဗျာ။ ထွက်လို့တောင် မရဘူး’’

ဒီလို ဖော်ထုတ်လိုက်တော့ ခိုင်လုံတဲ့၊ ခိုင်မာတဲ့ သက်သေခံ အထောက်အထား အနေနဲ့ရော ဘာတွေရှိထားလဲ။

‘‘ကျနော့်မှာ ဒီမှာ ၉ ယောက် ရှိတယ်။ သူတို့က လောလောဆယ်တော့ နာမည် မပြောပါနဲ့တဲ့’’

သူတို့အားလုံးက ဘယ်မှာနေကြတာလဲ။

‘‘ကျနော့်ဆီမှာ တယောက်ရှိတယ်။ Queensland မှာ၊ နောက် Western မှာ တယောက်ရှိတယ်။ နောက်ပြီးတော့ မဲလ်ဘုန်းမှာ ၄ ယောက် ရှိတယ်။ ဆစ်ဒနီမှာ ၂ ယောက် ရှိတယ်။ ကျနော် အပါအဝင် ၉ ယောက်ပေါ့နော်။ ဒီမှာရှိတယ်။ ကျနော်တို့ အားလုံးက ကျောင်းသား ဘက်ကနေ လာတာတွေ။ တချို့ကျတော့လည်း ထိုင်းနိုင်ငံမှာ နာမည်ကြီး သတင်းစာ ကျနော်တောင် မေ့နေပြီး.. အဲဒီ သတင်းစာမှာ လုပ်လာခဲ့တာ။ လူကြီးပိုင်းတွေမှာ ကျနော့်ရဲ့ တပ်ကြပ်ကြီး တယောက် ပါတယ်။ ကျနော် နာမည် မသုံးချင်တော့ဘူး’’

ဒီ ၉ ယောက်ထဲမှာကော တခြားရာထူး အဆင့်တွေ ပါလား။

‘‘မပါဘူး ခင်ဗျာ့။ ကျနော်အကြီးဆုံးပဲ။ သူတို့ကို ကျနော် မေးကြည့်တယ်။ ကျနော် သွားမယ်၊ သတင်းထောက်တွေနဲ့ စကားပြောတော့မယ် ဆိုပြီးတော့’’

သူတို့ကကော အဲဒါကို သဘောတူလားခင်ဗျာ့။

‘‘မတူဘူး၊ မတူဘူး။ သူတို့က စီးပွားရေးအရ အရမ်းအောင်မြင် နေကြပြီ၊ အိမ်တွေ၊ ကားတွေနဲ့။ အခု ၂ ယောက် ဖုန်းဆက်လာတယ်။ ဒီနေ့မှ ဖုန်းဆက်လာတယ်။ သူတို့က ကျနော်နဲ့ တွဲလုပ်ချင်တယ်ပေါ့။ တယောက်ကတော့ မူးယစ်ဆေးဝါး စွဲနေပြီး၊ စိတ်ဓာတ် ကျတယ်ပေါ့။ သူလည်း လုပ်ခဲ့တာတွေ၊ ဒီမတရား လုပ်ခဲ့တဲ့ဟာတွေ၊ ကျနော့်လိုပေါ့။ စိတ်ကျရောဂါ ဖြစ်တယ်ပေါ့’’

အဲလိုလုပ်လိုက်တော့ သြစတြေးလျ အစိုးရအနေနဲ့ အရေးယူမှု၊ ရှိမယ် ဆိုတာကိုကော ကြိုတင်သိလား။

‘‘ဥပဒေတွေဘာတွေ ကျနော် နားမလည်ဘူးလေ။ ကျနော်က မစဉ်းစားဘူး။ ကျနော့်မှာလည်း ဒီမှာ မိန်းမနဲ့ ကလေးနဲ့။ ကလေး ၃ ယောက် ရနေပြီလေ။ ဒီမှာ ရတာ။ မိန်းမကိုလည်း ဒီမှာတွေ့တာ။ လာတုန်းကတော့ တယောက်ထဲ လာတာ။ ကျနော့်မှာ ကလေးငယ်ငယ် ရှိတယ်။ နောက်တခု ပြန်စဉ်းစားတာက ကျနော် တယောက်ထဲ ကျနော့် မိန်းမနဲ့ အခု စကား မပြော ဘာမပြော စိတ်ဆိုး တာပေါ့။ ကျနော့် မိန်းမကိုလည်း ကျနော် ဒီအတွင်းရေးကို မပြောပြခင် ကျောင်းသား ခေါင်းဆောင် အနေနဲ့ ကျနော်က ပြောပြခဲ့တာ’

အခုတော့ကော သြစတြေးလျ ရဲဌာနက အရေးယူမှု တစုံတရာ ရှိနေပြီလား။

‘‘အခု ဘာအရေးယူမှုမှ မရှိသေးဘူးခင်ဗျာ့။ သူတို့ စောင့်ကြည့်နေတယ်ပေါ့’’

စောင့်ကြည့်နေတယ်ဆိုတာ ဘယ်လိုလုပ်သိသလဲ။

‘‘ကျနော့် ဖုန်းလိုင်းတွေ ဘာတွေကို အကုန်လုံး သူတို့ နားထောင်နေတယ်။ အဲဒီလောက်ကိုတော့ သိတာပေါ့။ ကျနော်လည်း ထောက်လှမ်းရေးက လာတာပဲ။ သူတို့ မပိုင်သေးတော့ ကျနော့်ကို ဖမ်းလို့ မရသေးဘူး ဆိုတာ။ ကျနော် ဝန်ခံ ထားတာပဲ။ ဝန်ခံ ထားပေမယ့် ဒီနိုင်ငံရဲ့ ဥပဒေက မတူဘူးဗျ။ ဝန်ခံတိုင်းလည်း အရေးယူလို့ရတာ မဟုတ်ဘူး။ သူတို့က ထင်ချင်ထင်မယ်။ လိမ်ပြောတာလား။ ကျနော်က အရင်က နာမည်ကြီးတာကိုး”

လော်ဘီလိုက်လုပ်တာတွေလည်း ကြားရပါတယ်ခင်ဗျာ့။

‘‘ဒီသြစတြေးလျမှာ။ ကမ်ပိန်းတွေ၊ စီးပွားရေး ပိတ်ဆို့မှုတွေက ကျနော့်လက်ထက်မှာ ဖြစ်ခဲ့တာ။ ၂ဝဝ၃ မှာ တနိုင်ငံ လုံးကို ခြေကျင်းကြီး ခတ်ပြီးတော့ တနိုင်ငံလုံးကို လျှောက်ခဲ့တာ၊ လူပေါင်း တသိန်းကျော်။ အဲဒါကို Documentary တောင် ရိုက်ထားတယ်။ အဲဒီတော့မှ နောက်မှ အမေရိကတို့ ဘာတို့ စပြီး အော်တာ။ ထိုင်းတို့ အော်တယ်။ စီးပွားရေး ပိတ်ဆို့မှု ဖြစ်တယ်ပေါ့ဗျာ။ Kevin Rudd ရော အကုန်လုံးက စိတ်မကောင်း ဖြစ်တာပေါ့ဗျာ။ မယုံကြဘူးပေါ့’’

Kevin Rudd က စိတ်မကောင်း ဖြစ်တယ်ဆိုတာ ကကော ဘယ်လိုလုပ် သိသလဲ။

‘‘ဒီနေ့ ပြောသွားတယ်လေ။ တီဗီချန်နယ်ထဲမှာ ပြောသွားတယ်။ ကျနော့် ကိစ္စကိ်ု သူ လေးလေးနက်နက် စုံစမ်းမယ် ပေါ့နော်။ ကျနော်နဲ့ သူနဲ့ တွေ့တဲ့ ပုံတွေကိုပါ ထည့်ရိုက် ထားတယ်။ ဒုဝန်ကြီးချုပ်က ဘာပြောလဲ ဆိုရင်တော့ ကျနော့်ကို ICC ပို့ဖို့ အတွက် လုပ်တယ်။ ဥပဒေက မရှိ ပြန်ဘူး။ ကျနော်က ဒီ ၂ဝဝ၂ နောက်ပိုင်း ကျူးလွန်ခဲ့တာ ဖြစ်တဲ့အတွက် ၂ဝဝ၂ မှာ ဥပဒေသစ် လုပ်ထားတယ်။
ကျနော်က ၈၈ နောက်ပိုင်းမှာ ဖြစ်ခဲ့တဲ့အတွက် အကျုံး မဝင်ဘူး ဖြစ်နေတယ်။ ဒါပေမယ့် ကျနော်က လူတွေကို သတ်ခဲ့ပေမယ့် ညှင်းဆဲ နှိပ်စက်ပြီး သတ်ခဲ့တာ မဟုတ်ဘူး။

မြန်မြန်ဆန်ဆန်နဲ့ သေသွားအောင် မခံစားရအောင် သတ်ခဲ့တာ ဆိုတော့ပေါ့။ ကျနော့်ကို ICC ပဲ ပို့ပို့၊ ဘယ်ပဲပို့ပို့၊ သေဒဏ်ဘဲ ပေးပေး၊ ဗမာပြည်ပဲ ပြန်ပို့ပို့ ကျနော့်အနေနဲ့က ရယ်ဒီဖြစ်နေပြီ။ ကျနော် လုပ်ခဲ့တဲ့အတွက် ခံရမှာဆိုတာ သိတယ်။ အဲဒီ အတွက်လည်း ကြိုတင် ပြင်ဆင်ထားပြီး သွားပြီ။

ဒီလိုပြောကြခဲ့တာက ဘယ်လို ရည်ရွယ်ချက်နဲ့ အခုလိုမျိုးထုတ်ဖော်ပြောကြား ရတာပါလဲ။

“အား….ကျနော့်မိဘရယ်၊ ကျနော့်မိန်းမရယ် တဦးတည်း မျက်ရည်ကျနေတာ မဟုတ်ဘူး။ ဗမာပြည်မှာ ရှိတဲ့ မြောက်များ စွာသော မိဘတွေ မျက်ရည် ကျနေတာ။ သားသမီးတွေ ပျောက်ဆုံးတယ်။ ထောင်တွေထဲမှာ ရှိသလိုလို၊ နယ်စပ်တွေမှာ ရှိသလိုလို။ အဲဒီတော့ ကျနော့် အနေနဲ့ ကျနော် သတ်ခဲ့တဲ့ အတွက် ဒါတွေဟာ အိမ်ပြန် မရောက်လာနိုင်တဲ့ ကျောင်းသားတွေဖြစ်တယ် ဆိုတာကို ပြောချင်တယ်။ ဘီင်္ဘီစီကနေ လွှင့်ခဲ့တယ်။ ကျနော် တောင်းပန်တယ်။ ကျနော့်မှာ အပြစ်ရှိတယ်။ လူတွေကိုလည်း လွှတ်ပေး နိုင်ရဲ့သားနဲ့ ကျနော် မလွှတ်ပေးခဲ့ဘူး။ အဲဒီအချိန်တုန်းက ကျနော် ကိုယ်တိုင်လည်း အရမ်းငယ်တယ်။ အရမ်း စိတ်လှုပ်ရှားတယ်။ အလုပ် နှစ်ခုကို လုပ်နေရချိန် ဆိုတော့”

အလုပ်နှစ်ခုဆိုတာက ဘာကို ဆိုလိုတာလဲ။

“အကသမှာလည်း ကိုမိုးသီးဇွန်တို့နဲ့ အတူ လုပ်နေတာလေ။ ကိုမိုးသီးဆိုရင် ကျနော့်ကို ကောင်းကောင်း သိပါတယ်။ ကျနော့်ကို မသိတဲ့လူ မရှိဘူးနော် အရေးအခင်းမှာ။ အိုးဝေအောင်တို့၊ ရဲတေဇတို့ ဘာတို့ အခု အမေရိကမှာ ရှိပါတယ် ဒီကောင်တွေ။ ကျနော်နဲ့ အတူ လုပ်ခဲ့တဲ့ ကောင်တွေ”

အခုလို လုပ်လိုက်တဲ့အတွက် ကိုယ်မျှော်မှန်းထားသလို ဖြစ်လာတယ်လို့ ပြောနိုင်မလားခင်ဗျာ့။ အခုဆိုရင် သုံးရက် ကြာပြီ ဆိုတော့။

“သုံးရက်တော့ကြာပြီ အခု ရဲက မဖမ်းသေးဘူးဆိုတော့ တခုတော့ ရှိတာပေါ့ဗျာ အခုမှ ဇာတ်လမ်းက စတာနော်။ ကျနော့်မှာလည်း အကြံတခု ရှိတယ်ဗျ။ ခင်ဗျားတို့ နောက်မှ ပြောလို့ရမယ်။ ဇာတ်လမ်းက အခုမှစတာ။ Just begin. Not finished yet. People think this is going to be finished, you know. ကျနော် ထောင်ထဲ ရောက်သွားတာနဲ့ ကျနော့်ကို အပြစ် ပေးလိုက်တာနဲ့ မပြီးဘူးဗျ။ ဇာတ်လမ်းက အခုမှစတာ ကျနော် အဲတာကို ပြောလို့မရဘူး။ ကျနော် လုပ်ရတာလည်း အကြောင်းတော့ ရှိတယ်ဗျာ။ အဲဒီအကြောင်းကို ပြောပြပိုင်ခွင့် မရှိဘူး”

အကို့ ရည်ရွယ်ချက်က ဘာလဲခင်ဗျာ့။

“ကျနော့်ရည်ရွယ်ချက်က ICC ကို ရောက်ချင်တယ်။ ICC နဲ့ တန်းတူ စကားပြောချင်တယ်။ ဒါ ကျနော့် ရည်ရွယ်ချက်”

ဘာကြောင့် အဲဒီလို ပြောချင်တာလဲ ခင်ဗျာ့။ ဘာတွေ ပြောချင်တာလဲ ခင်ဗျာ့။

“ အဲဒီအချိန်ကျမှ ကြည့်ဗျာ။ အဲဒီအချိန်ကျရင် ကမ္ဘာ့မီဒီယာကို ကျနော် ရထားပြီ။ ကမ္ဘာ တခုလုံးက မီဒီယာ ရောက်လာပြီ ဆိုတော့ ကမ္ဘာ့ မီဒီယာရဲ့ အားနဲ့ ကမ္ဘာမှာရှိတဲ့ သမ္မတတွေ၊ နိုင်ငံတွေမှာရှိတဲ့ အကြီးအကဲတွေ အားလုံး ကျနော့် အကြောင်းကို သူတို့ ကြည့်မယ်လေ။ ကြည့်တဲ့ အချိန်မှာ ကျနော် ပြောချင်တာကို ပြောလို့ရပြီလေ”

ဒီမြန်မာစစ်အစိုးရအနေနဲ့ ၁၉၈၈ ကတည်းကစပြီးတော့ ကျူုးလွန်လာခဲ့တဲ့ အမှုတွေနဲ့ ပတ်သတ်ပြီးတော့ CoI လုပ်နေကြတာ ရှိပါတယ် ခင်ဗျာ့။ အကို့အနေနဲ့ တိုင်ပင် ညှိနှိုင်းမှုတွေရှိလား ခင်ဗျာ့။

“ကျနော် တယောက်ထဲ လုပ်တာကို။ ဘယ်သူမှ မတိုင်ပင်ပါဘူး”

ဘာ့ကြောင့် မတိုင်ပင်ခဲ့တာလဲ။

“နိုင်ငံတိုင်းမှာက ကျောင်းသား အတော်များများ အတွေးအခေါ်တွေ နောက်ဆုတ် ကုန်ကြတယ်။ စစ်အစိုးရကို နှစ်ပေါင်း နှစ်ဆယ်ကျော် အော်လာတယ်။ ဘာမှ မပြောင်းလဲဘူး၊ သံရုံးတွေမှာ သွားအော် ဆန္ဒတွေပြ အခမ်းအနားတွေ လုပ်။ အချိန်တွေကုန်။ အလုပ်တွေပျက်၊ ငွေတွေ ကုန်ပြီးတော့ မီဒီယာမှာမပါ ဘာမှမပါ။ ဆုံးရှုံးမှုတွေ ဒီမှာ တွေ့ရတယ်။ အဲဒီလိုတိုက်လို့ မရတော့ဘူးဆိုတာ ကျနော်က ပြချင်တာ။ လက်နက်ကိုင်တာကို ပြောတာ မဟုတ်ဘူးနော်။ ဒီပြင်နည်းနဲ့ တိုက်လို့ရတယ်။ မီဒီယာရဖို့ အတွက် နည်းလမ်းတွေ အများကြီး ရှိတယ်ဗျာ့။ မီဒီယာ ဆိုတာကလဲ ပိုက်ဆံရဖို့ အတွက် အလုပ်လုပ်ကြတာ။ ခင်ဗျားက ထူးထူးဆန်းဆန်း လုပ်ပြရင် မီဒီယာက ခင်ဗျားဆီ ရောက်လာမှာပဲ”

အခုလုပ်တာ ဒီရည်ရွယ်ချက်နဲ့လား ခင်ဗျာ့။

“ဒါက ပြောလို့မရဘူး။ ဇာတ်လမ်းပြီးမှ ကြည့်ဆိုတာ အဲဒါပဲ။ ကျနော့်ရဲ့ဦးတည်ချက်က ICC ရောက်ရင် အောင်မြင်တယ်ပေါ့။ ဒီကြားထဲမှာ ကျနော့်ကို နားမလည်တဲ့ လူတွေက ပြဿနာရှာတယ်။ ဗမာ အဖွဲ့အစည်းတွေက ဖုန်းတွေ ဆက်တယ်။ နောက် ထိုင်းနိုင်ငံမှာ ရှိတဲ့ အကျဉ်းသား လွှတ်မြောက်ရေး အဖွဲ့တို့ ဘာတို့က ကန့်ကွက်တယ်။ သူတို့က ကျနော့်ကို မယုံဘူး။ အရေးယူဖို့ အစိုးရက မယုံဘူး။ ဒီလူဟာ အပြစ်ရှိခဲ့တဲ့လူ တယောက်ဖြစ်ချင်မှ ဖြစ်မယ် ငါတို့ကို လာလိမ်နေတာလား မသိဘူး။ နောက်တချက် ကလဲ အရမ်း အကြီးကြီးတွေ လုပ်ခဲ့တာတွေ ရှိခဲ့တာကိုး။ ကျနော့် မှာက အမကိုလည်း ထောင်ချတယ်။ အမေကိုလည်း ထောင်ချတယ်။ ကျနော်ကိုယ်တိုင်လည်း ထောင်ကျခဲ့တယ်။ ပေးဆပ် ခဲ့တာလည်း ရှိတယ်။ သိပ်ပြောလို့ မကောင်းဘူးနော်။ အဲဒါလောက်ကို မြင်စေချင်တယ်။ ကျနော့် ပန်းတိုင်လေးကို support လုပ်ပေးပါ။ အဲဒီကို ရောက်သွားရင် အကောင်ကြီးတွေနဲ့ စကား ပြောတော့မယ်။ ဗမာပြည်ကို စီးပွားရေး ပိတ်ဆို့မှုတွေ လုပ်ပြီးတော့ ဘာမှ အက်ရှင် မပါပဲနဲ့ အချိန်တွေ ဖြုန်းနေတာ”

CoI ကိစ္စ လုပ်နေသူတချို့က ကိုထူးထူးဟန် အခုလို လုပ်လိုက်ခြင်းဟာ သူတို့ လုပ်ငန်းတွေကို အနှောက်အယှက် ဖြစ်စေနိုင်တယ်လို့ ထင်မြင်ချက်တွေ ရှိနေပါတယ်။ ဒါကို ဘယ်လို ဖြေရှင်းချင်ပါသလဲ။

“ ကျနော်က သူတို့အဖွဲ့ကိုတောင် မသိဘူးဖြစ်နေတယ်။ ကျနော်က တယောက်ထဲ အမြဲ ပြေးနေတာ။ ကျနော့် ဟာတွေ ကို တချို့က လိုက်မမီဘူးဗျ။ ကျနော်က ဒီမှာရှိတဲ့ နိုင်ငံရေး သမားတွေ၊ ခေါင်းဆောင်တွေကို တန်းတူ ပြောနိုင်တဲ့ အဆင့်ရှိတယ်။ ဗမာတွေနဲ့ ပြောရတဲ့ အချိန်မှာ အရမ်း အဟောင်းကြီးတွေ ဖြစ်နေတယ်။ ဗျူရိုကရက်တွေ များတယ်ဗျာ။ စုံစမ်း စစ်ဆေးရေးတွေ။ ကျနော်တို့မှာ အချိန် အဲလောက် မရှိတော့ဘူးဗျ”

အခု ဘရစ်ဘန်းမြို့မှာ ဘာအလုပ် လုပ်ကိုင်နေပါသလဲ။

“ကျနော်က ပန်းချီဆရာပါ။ ဆုတွေရတယ်။ မနှစ်က တသောင်းဆု ရတယ်လေ”

ပန်းချီဆွဲပြီး ရပ်တည်တာလား။

“ရောင်းရတဲ့ ပန်းချီတော့ မဟုတ်ဘူး။ ကျနော့်ပန်းချီကားတွေက ဈေးအရမ်း ကြီးတယ်။ တော်ရုံ တန်ရုံလူ မဝယ်နိုင်ဘူး။ ကျနော့်ဟာ ကျနော် ဆွဲတယ်။ စိတ်ပြေလက်ပျောက် လုပ်တယ်။

မရောင်းရဘူးဆိုတော့ စားဝတ်နေရေးကို ဘယ်လိုဖြေရှင်းလဲ။

“ဆုတွေကတော့ ရတယ်ဗျာ။ ကျနော့်နံရံမှာ ဆုတွေကတော့ ပြည့်နေတာပဲ။ ၁၅ဝဝ၊ ၆ဝဝဝ၊ ၁ဝဝဝဝ အဲလိုမျိုး ရထားတာ”

ဒီမှာ ၁၅ နှစ် ကြာပြီဆိုတော့ အရင်တုန်းကရော ဘာတွေ လုပ်ခဲ့လဲ။

“ရောက်ခါစကတော့ စာမတတ်တော့ ဂရေးဟွန်းမှာ အလုပ် ဝင်လုပ်တယ်။ စာတတ်တော့ ပန်းချီ ဆွဲတယ်ပေါ့။ အလုပ်တွေ တော်တော်များများ လုပ်ပါတယ်။ နိုင်ငံရေး လုပ်တယ်။ Kevin Rudd ဗမာပြည် သွားဖို့လည်း ကျနော် လုပ်ပေး လိုက်တာပဲ။ ကျနော်ဒီမှာ လော်ဘီ လုပ်ထားတာ အများကြီးပဲ။ သတင်းစာတွေထဲမှာ ဗမာပြည် မသွားရင် မင်းငါ့ကို လိမ်တာပဲ ဆိုတဲ့ အထိ ကျနော်က ပြောထားတယ်။ အတိုက်အခံ ဖြစ်နေတုန်းက မင်းနဲ့ ငါနဲ့ တွေ့တုန်းက မင်းငါ့ကို ဗမာပြည် သွားမယ်ဆိုပြီး ကတိ ပေးခဲ့တယ်။ မင်း ဝန်ကြီးဖြစ်လာတဲ့ အချိန်မှာ မသွားဘူးလို့ သတင်းစာမှာ ထုတ်တော့ သိပ်မကြာဘူး။ သူ သွားရတယ်။ တချို့တွေက မသိဘူး။ ကျနော်က အစိုးရက လူတွေနဲ့ တိုက်ရိုက် လုပ်နေတာ။ ခုကိစ္စလည်း လူတော်တော် များများက လိုက်မီမှာ မဟုတ်ဘူး။ ဒါကြောင့် ကျနော် တောင်းပန်တယ်။ ပွဲပြီးတဲ့အထိ ကြည့်ပါ။ ခုတော့ လူယုတ်မာ၊ သစ္စာဖောက်ပေါ့။ လူသတ်သမားပေါ့”

မြန်မာပြည်အရေးကိစ္စကို ICC ရောက်ရေး လုပ်တယ်ဆိုတော့ တကယ်ပဲ ရောက်သွားနိုင်တယ် ထင်လို့လား ခင်ဗျ။

“အခု ပြဿနာ အဲဒါ တက်သွားတာပေါ့။ ကြားထဲက နားမလည်တဲ့ အဖွဲ့တွေက ကျနော့်ကို ကန့်ကွက်တယ်။ အဲတော့ အစိုးရက မဖမ်းရဲဘူးပေါ့။ ဖမ်းလို့ ICC ရောက်သွားရင် ကျနော် အောင်မြင်ပြီ”

မြန်မာပြည်အရေး ICC ရောက်ရေးကိစ္စ ကြိုးပမ်းနေကြတဲ့ အင်အားစုတွေ ရှိပါတယ်။

“ရှိတယ်ဆိုရင် ကျနော် အရမ်းစကားပြောချင်တယ်။ ဖြတ်လမ်းက ကျနော်က တက်တဲ့သဘော ဖြစ်နေတယ်။ သူတို့က လုပ်ထုံး လုပ်နည်းကြီးနဲ့ တက်တယ်ဆိုတော့ မရဘူး။ ဒုက္ခသည် တယောက်ကို ဘန်ကီမွန်း အနေနဲ့ စကား မပြောဘူး။ သူတို့ကို တွေ့ချင်တယ် ဆိုရင် ဖြတ်လမ်းက တက်ဖို့လိုတယ်”

ခုနက ၉ ယောက်က သြစတြေးလျမှာပဲ နေတာဆိုတော့ တခြားနိုင်ငံတွေမှာရော ရှိသေးလားဗျ။

“မမေးနဲ့တော့ဗျာ။ အဲလောက်ဆို ခင်ဗျား သဘောပေါက်ပြီ။ အားလုံးက ကျောင်းသားတွေပါပဲ။ ကျနော် အလုပ် လုပ်နေတယ်။ ကျနော့်ပန်းတိုင်ကို သွားမယ်။ ဒီလိုမျိုး ဖြစ်သွားတယ်၊ လူသတ်ခဲ့တယ် ဘာညာ ဆိုတာကလည်း ကျနော့်ရဲ့ စတိုရီ ပေါ့။ ဒါပေမယ့် စတိုရီ ဆိုတာက စတိုရီပဲဖြစ်တယ်။ ထရူးစတိုရီက သပ်သပ်။ စတိုရီက သပ်သပ်”

ကိုထူးထူးဟန် သြစတြေးလျမှာ နေထိုင်စဉ် ဆေးကုသမှု ခံယူခဲ့ရဖူးတယ်လို့ သိရပါတယ်။

“ကျနော်က ထောင်တွေထဲမှာ ရက်ရက်စက်စက် နှိပ်စက်၊ အရိုက်ခံ ထားရတာကိုး။ သာယာဝတီ ထောင်ထဲမှာ ကျနော် မရောက်ဖူးတဲ့ တိုက်ခန်း မရှိဘူး။ သြစတြေးလျ ရောက်မှ စိတ်ကျရောဂါ ရတယ်။ အပြင်းအထန်တော့ မဟုတ်ဘူး။ တခါတလေ အိပ်ဆေးလေး ဘာလေး သောက်တယ်။ နှစ်သိမ့်ဆွေးနွေး ပညာပေးမှု Counselling တွေ သွားတွေ့တယ်။ ကျနော် ဖြစ်ခဲ့တဲ့ အမှတ်သညာ memory တွေ ရှိခဲ့တာကိုး။ ကျနော် ဖြတ်သန်းခဲ့တဲ့ လိုင်းတွေက အရမ်းမြင့်မားတော့ ဒီအမှတ်သညာတွေကို ပျောက်သွား စေချင်တယ်”

အခု ဆက်လက်ကုသမှု ခံယူနေဆဲပဲလား။

“ခုထက်ထိပေါ့။ ဒါပေမယ့် အခုက mentally fit ဖြစ်နေပြီလေ။ ဒါကြောင့် ဒါတွေ လုပ်နိုင်တာပေါ့။ ဦးနှောက်ပိုင်း ဆိုင်ရာ ကောင်းလို့ ပန်းချီတွေ ဆွဲတယ်၊ ဆုတွေ ရတယ်။ အရူးတယောက်ကို ဆုမပေးဘူးဗျ။ အရူးတော့ မဟုတ်ဘူးဗျာ။ စိတ်ကျ ရောဂါတော့ ရှိတယ်။ စိတ်ပိုင်း ဆိုင်ရာနဲ့ ဆေးကုသမှု ခံယူနေရတယ်။ ဒီနိုင်ငံက ပရီမီယာတွေတောင် ရှိတာ။ သူတို့ ထုတ်ပြောတယ်လေ။ စိတ်ကျ ရောဂါနဲ့ ရူးတာနဲ့ မတူဘူးဗျ။ ရူးတာက လုံးဝ ရူးသွားတာ။ ပတ်ဝန်းကျင်မှာ အဟောင်းကြီးတွေ ဖြစ်နေကြတယ်။ ကျနော့် တိုင်းပြည်အတွက် အရမ်း စိုးရိမ်တယ်”

နောက်ထပ် ဘာဆက်လုပ်ဖို့ အစီအစဉ်ရှိလဲခင်ဗျ။

“သူတို့ဖမ်းတာကို စောင့်နေတယ်။ ခုထက်ထိ လာမဖမ်းသေးဘူး။ ဖမ်းရင် ဥပဒေ ပညာရှင်နဲ့ သွားမယ်။ ICC ပို့ချင်လည်းပို့။ ဥပဒေ မရှိဘူး ဆိုရင်လည်း သူတို့ သဘောပဲလေ။ မီဒီယာက ပြဿနာ ရှာမှာပေါ့။ ဒီနိုင်ငံမှာ ဒီလောက် လူတွေ သတ်လာတဲ့ သူတယောက်ကို လက်ခံထားလား ဆိုတာ ကမ္ဘာကြီးမှာ ရှိတဲ့ မီဒီယာမှာ အကုန်လုံး ပါသွားပြီ။ ပွဲပြီးတဲ့အထိ ကြည့်ပါလို့ အားလုံးကို ကျနော် ပြောပရစေ”


Ref: မဇ္ဈိမ