တရုတ်ပိုက်လိုင်း စီမံကိန်း ကန့်ကွက်ဆန္ဒပြသူ ခေါင်းဆောင် ၁၀ ဦးကို စတင် ရုံးထုတ်

2013-05-06

ရခိုင်ပြည်နယ် ကျောက်ဖြူမြို့နယ် မဒေးကျွန်းမှာ တရုတ်နိုင်ငံပိုင် ရေနံပိုက်လိုင်း စီမံကိန်းကို ကန့်ကွက် ဆန္ဒပြခဲ့ကြတဲ့ ခေါင်းဆောင် ၁၀ ဦးကို ငြိမ်းချမ်းစွာ စီတန်း လှည့်လည်ခြင်း ဆိုင်ရာ၊ ဥပဒေပုဒ်မ (၁၈) နဲ့ ကျောက်ဖြူမြို့နယ် တရားရုံးမှာ ဒီကနေ့ စတင် စစ်ဆေး ခဲ့ပါတယ်။

သက်ဆိုင်ရာ အာဏာပိုင်တွေက တရားလိုပြုလုပ်ပြီး တရားစွဲဆိုခဲ့တာဖြစ်တယ်လို့ တရားစွဲဆို ခံရသူ တစ်ဦးဖြစ်တဲ့ ဦးထွန်းကြည်က RFA ကို ပြောပါတယ်။

ဒီကနေ့ ရုံးထုတ်စစ်ဆေးစဉ် မဒေးကျွန်းဒေသခံ ၅၀၀ လောက်က သူတို့ကိုပါ အရေးယူပေးဖို့ ကျောက်ဖြူမြို့နယ် တရားရုံး ဘက်ကို လမ်းလျှောက် ချီတက် ခဲ့ကြတယ်လို့ သိရပါတယ်။

အဲဒီလိုချီတက်လာတဲ့အတွက် အာဏာပိုင်တွေဖက်က တရားရုံး ပတ်ပတ်လည်မှာ လုံခြုံရေးတွေ အပြည့် ချထားခဲ့ပြီး တရားစွဲဆို ခံရတဲ့ ၁၀ ဦးကိုလည်း အာမခံနဲ့ ပြန်လည် လွှတ်ပေးခဲ့ပါတယ်။ ချီတက်လာတဲ့ ဒေသခံတွေကလည်း တရားစွဲ ခံရသူတွေကို ပြန်လွှတ်ပေးတဲ့ အတွက် လူစု ခွဲလိုက်ကြပါတယ်။

မဒေးကျွန်းဒေသခံတွေဟာ ဆုံးရှုံးခဲ့တဲ့ လယ်ယာမြေတွေအတွက် နိုင်ငံတကာ စံချိန်စံနှုန်း အတိုင်း သတ်မှတ်လျော်ကြေးပေးဖို့၊ မဒေးကျွန်း ဆိပ်ကမ်းကနေ ကျောက်တန်း၊ ရွာမ၊ ပန်းထိမ်ဆည် စတဲ့ကျေးရွာတွေရဲ့ ဆက်သွယ်ရေးကောင်းမွန်အောင် လုပ်ဆောင်ပေးဖို့၊ အလုပ်သမား ကဒ်ပြား ရရှိထားတဲ့ဒေသခံတွေ အလုပ်အကိုင်ရရှိဖို့၊ လုပ်အားခတွေကို နိုင်ငံတကာ စံနှုန်းအတိုင်းပေးဖို့စတဲ့အချက် ၉ ချက်နဲ့ ပြီးခဲ့တဲ့ ဧပြီလ ၁၈ ရက်နေ့က မဒေးကျွန်းပေါ်မှာရှိတဲ့ တရုတ်နိုင်ငံပိုင် China National Petroleum Cooperation(CNPC) ကုမ္ပဏီရုံးရှေ့မှာ တောင်းဆိုဆန္ဒပြခဲ့ကြတာပါ။

ဒီအမှုကို လာမယ့် မေလ ၁၆ ရက်နေ့ ထပ်မံရုံးချိန်းလိုက်တယ်လို့လည်း သိရပါတယ်။

Ref: RFA News