ရဲဘော်ဖိုးသံချောင်း
တနင်္ဂနွေနေ့၊ သြဂုတ်လ ၁၄ ရက် ၂၀၁၁တနေ့တုန်းကပဲ ကြံ့ဖွတ် စစ်အစိုးရဟာ “ပြောရေးဆိုခွင့်နှင့် သတင်းထုတ်ပြန်ရေး အဖွဲ့” ဆိုတာကို ဖွဲ့စည်း လိုက်ကြောင်း ကြေညာ လိုက်ပါတယ်။ ကမ္ဘာမှာ တွေ့ရခဲလှတဲ့ “ပြောရေးဆိုခွင့်နှင့် သတင်း ထုတ်ပြန်ရေး အဖွဲ့” ဆိုတာကို ကြားရတော့ သဘာဝ ကျစွာပဲ လူတွေက ကြံ့ဖွတ် စစ်အစိုးရ ဘာတွေများ အကြံအဖန် လုပ်ပြန်ပြီလဲလို့ တွေးမိကြပါတယ်။ လက်ရှိ ပြောရေး ဆိုခွင့်ရှိသူ ဗိုလ်(ဦး)ကျော်ဆန်း ကိုပဲ တယောက်ထဲ လွှတ်မထားချင်လို့လား၊ သတင်းစာ ဆရာတွေနဲ့ တွေ့ဆိုရာမှာ သူတို့ဘက်က အင်အား ပြချင်လို့လား၊ လူများပွဲစည် ဆိုပြီး စတန့်ထွင်တာလား သို့လော၊ သို့လော တွေအများကြီး ဖြစ်လာ ပါတယ်။
ဒါပေမဲ့ ဒီလူ ၁၁ ဦးပါတဲ့ ဒီအဖွဲ့ ပေါ်ထွက်လာတဲ့ အတွက် တခုခု ထူးလာမယ်၊ ပိုပွင့်လင်းလာမယ် လို့တော့ ဘယ်သူကမှ မထင်ပါဘူး။ ကြံ့ဖွတ် စစ်အစိုးရ ဘာဉာဏ်နီ ဉာဏ်နက်တွေများ ထုတ်အုံးမလဲ လို့သာ သံသယ အထောင်အသောင်း နဲ့ စောင့်ကြည့် နေကြပါတယ်။ သတင်း ထုတ်ပြန်ရာမှာ လူတဦးထဲ ထုတ်ပြန်တယ် ဆိုတာထက် လူအများနဲ့ ထုတ်ပြန်တယ် ဆိုတာက ဘာများ ပိုထူးမှာလဲ။ ပါးစပ်ပေါက် ပိုများလာတာဟာ အသံ ကျယ်လာတာထက် မပိုနိုင်ပါဘူး။
ဒီဟာလေး ဖြည့်လိုက်ပါအုံး၊ ဟိုဟာလေး မချန်လိုက်ပါနဲ့ ဆိုပြီး ပိုကျယ်ပြန့်လာ ပွင့်လင်းလာမယ်လို့ မျှော်လင့်နိုင်ပါသလား။ တယောက်က ဟိုဟာဖြတ်လိုက်၊ နောက်တယောက်က ဒီဟာလည်းတောက်လိုက်နဲ့ ပိုလို့သာ တင်းကြပ်၊ ကျဉ်းမြောင်း သွားနိုင်တယ်လို့ ထင်ပါတယ်။ အရေးပါတဲ့ ဝန်ကြီးဌာန တွေက တာဝန် ရှိသူတွေနဲ့ ဖွဲ့စည်းထားတာမို့ သတင်း တည်းဖြတ် ရာမှာ အားဖြည့်တဲ့ သဘော ပိုဆောင်နေပါတယ်။ သတင်းပိုပေးချင်ရင် သက်ဆိုင်ရာ ဌာနက တိုက်ရိုက် ထုတ်ပြန် ပြောဆိုလို့ ရတယ် ထင်ပါတယ်။ ကော်မတီ၊ အစုအဖွဲ့တွေ ဖွဲ့နေဖို့မလိုပါဘူး။ အခုပိုဖြစ်နိုင်တာက သူတို့ချင်း တယောက်ကိုတယောက် မဲတင်းဖို့၊ သတင်း ပိုအမှောင်ချဖို့သာ ဖြစ်ပါတယ်။ ဝန်ကြီးဌာနတွေ တဌာနကို တဌာန အကြောခံရတယ်လို့ ထင်နေလို့ ဖန်တီး လာတာလည်း ဖြစ်ကောင်း ဖြစ်နိုင်ပါတယ်။
ဒီနေ့ဗမာပြည်ရဲ့သတင်းလောကမှာ အကြီးဆုံး ပြဿနာ တခုက သက်ဆိုင်ရာဌာနတွေက သတင်းမှန် တွေကို မထုတ်ပြန်ပဲ လံကြုတ် သတင်းတွေ ထုတ်ပြန်နေတဲ့ ကိစ္စပါ။ ဒီလိုဖြစ်နေတာဟာ သတင်း ထုတ်ပြန်တာကို အဖွဲ့အစည်းနဲ့ မထုတ်ပြန်လို့ မဟုတ်ပါဘူး။ တကယ် ပြောရရင် အခု ထုတ်ပြန် နေတာတွေဟာ ဗိုလ်(ဦး)ကျော်ဆန်း တဦးထဲက လိမ်ညာ နေတာလည်း မဟုတ်ပါဘူး။ တကယ်က စစ်အစိုးရ အဆက်ဆက်ဟာ သတင်းစာ ရှင်းလင်းပွဲ ဆိုတာတွေမှာ သူတို့ အယုံ ကြည် အစိတ်ချဆုံး လူတွေကိုပဲ သူတို့ကိုယ်စား ထွက်လိမ်ခိုင်းနေတာ ဖြစ်ပါတယ်။ တနည်းပြောရရင် ဒီပြောရေးဆိုခွင့် ရှိသူဆိုသူ(တွေ)ဟာ ခိုင်းတာ လုပ်ရသူတွေချည်း ဖြစ်ပါတယ်။ သူ့တဦးထဲရဲ့အမြင်ကို မပြောဝံ့ပါဘူး။ မီဒီယာ သမားတွေနဲ့ တွေ့ဆုံတိုင်း သူတို့ရဲ့ ခေါင်းထဲမှာ နံပတ်ဝမ်းကြီးရဲ့ ပုံရိပ်ကြီးက အမြဲ လွှမ်းမိုးနေတာ ဖြစ်ပါတယ်။
ဒါဖြင့်ဒါကဘာလုပ်တာလဲ။ ဗိုလ်(ဦး)သိန်းစိန်တက်လာတဲ့နောက် လုပ်နေတဲ့ သဏ္ဌာန်ဆံတဲ့ လုပ်ရပ်တွေ ထဲက တခု ဖြစ်တယ် ဆိုတာကတော့ ဘာမှ အငြင်းပွားစရာ မရှိပါဘူး။ ဒါ့အပြင် နောက်ရည်ရွယ်ချက် တခုက ဒီနေ့လို မီဒီယာတွေ များပြား၊ ဆက်သွယ်ရေး စနစ်တွေ မျိုးစုံ ထွန်းကားနေတဲ့ အချိန်မှာ သူတို့ ဌာနတွေထဲက လူတွေကို မဗျူး နိုင်အောင် ထိပ်ကနေ ပိတ်ဆို့ ထားတာလည်း ဖြစ်ပါတယ်။ မီဒီယာတွေ အနေနဲ့ မေးချင်တာရှိရင် ဒီအဖွဲ့ကိုပဲမေး၊ တခြားလူတွေကို မမေးနဲ့ ဆိုတာမျိုး၊ ဒါမှမဟုတ် ဒီအဖွဲ့မှ အပ တခြား အစိုးရ ဌာနနဲ့ ဝန်ထမ်းတွေ ပြောတာ မှန်သမျှ တရားမဝင်ဘူး ဆိုတာမျိုးဖြစ်အောင် လုပ်လာ ပါလိမ့်မယ်။ သူတို့ စိုးရိမ်တာက သူတို့အထဲက လူတွေက အမှန်တွေ ထုတ်ပြောမှာ၊ သတင်းတွေ သူတို့ ပါးစပ်ပေါက် ထဲက မဟုတ်ပဲ တခြား ပါးစပ်ပေါက် တွေက ထွက်မှာကိုပါပဲ။
ပြည်သူတွေကြားချင်၊ သိချင်နေတာဟာအမှန်တရားပါ။ မျက်နှာတွေ၊ ပါးစပ်ပေါက်တွေ မဟုတ်ပါဘူး။ ဗိုလ်(ဦး) သိန်းစိန်တို့ အနေနဲ့ သူတို့ကိုယ် သူတို့ နအဖ အစိုးရနဲ့ လမ်းခွဲခဲ့ပါတယ် ဆိုတဲ့ အဓိပ္ပာယ်မျိုး ပြသချင်ရင် ဗမာပြည်က စာနယ် ဇင်းတွေ၊ ဗီဒီယိုတွေကို ဖွင့်လိုက်တိုင်း တွေ့နေရတဲ့ အင်မတန် အကျည်းတန်တဲ့ “ဦးတည်ချက်လေးရပ်”၊ “ပြည်သူ့ ဆန္ဒသဘောထား”၊ “ဆူပူမှုဖြင့်ဒီမိုကရေစီမရနိုင်”၊ “VOA, RFA ရန်တိုက် ပေးနေသည်” စတဲ့ တဖက်သတ် ဝါဒဖြန့်၊ အနိုင်ကျင့်မှုတွေကို ဖယ်ရှား ပေးတာမျိုးကို အရင်ဆုံး လုပ်ပြသင့်ပါတယ်။ သူတို့ရဲ့ဒီကြွေးကြော်သံ တွေဟာ မီဒီယာလောက ကိုရော မီဒီယာများကို ဖတ်- ကြည့်-နားထောင် နေသူများကိုပါ ခြိမ်းခြောက်နေတာ ဖြစ်ပါတယ်။
ဗိုလ်နေဝင်းအစပြုလိုက်တဲ့ လူဗိုလ်ပုံအလယ်မှာမျက်ရည်ကျပြတဲ့ စတိုင်အချိုးကို အခု ဗိုလ်(ဦး)ကျော်ဆန်း က သတင်းစာ ရှင်းလင်းပွဲမှာ လုပ်ပြ လာတာ တွေ့ရပါတယ်။ ဒါပေမဲ့ ဗိုလ်(ဦး)ကျော်ဆန်း အကြောင်းကို နောကျေနေတဲ့ ဗမာပြည် သတင်း လောကနဲ့ နိုင်ငံရေး လောက က လူတွေကတော့ ဒါဟာ မိကျောင်း မျက်ရည်ထက် မပိုနိုင်ဘူး လို့ပဲ ဆိုကြပါတယ်။ ဘယ်သူမှ ဒီမျက်ရည်တွေကြောင့် ဗိုလ်(ဦး)သိန်းစိန် အစိုးရနဲ့ ဗိုလ်(ဦး)ကျော်ဆန်းလို သတင်း ထုတ်ပြန်သူတွေကို “အော်- သူတို့ခမျာ မျက်ရည်တောင် ကျရှာတယ်”လို့ စာနာ ထောက်ခံစိတ် မပေါ်မိပါဘူး။ ဒီလို မျက်ရည်ကျတဲ့ သတင်းစာ ရှင်းလင်းပွဲမျိုးမှာ ဘာပြော သွားတယ် ဆိုတာကို ပိုသတိထား မိပါတယ်။ ဒီအကြိမ်မှာ ထင်ရှားတဲ့အချက်တခုကတော့ “အင်န်အယ်လ်ဒီကို နိုင်ငံရေး ပါတီ အဖြစ် မှတ်ပုံတင်”ခိုင်းပြန်တာပါပဲ။ အသွင် ပြောင်းပေမယ့် အနှစ်သာရ မပြောင်းကြောင်း ပြောချင်တာပါ။
မီဒီယာတွေနဲ့ သတင်းစာရှင်းလင်းပွဲတွေအကြောင်းပြောတယ်ဆိုတော့ တပါထဲမှာ ဗမာပြည် သတင်း လောကမှာ အင်မတန် အရုပ်ဆိုးတဲ့ ဖြစ်ရပ်တခု ဒီနှစ်ပိုင်းထဲမှာ ဖြစ်ခဲ့ဖူးတာကို သတိရ မိပါတယ်။ အဲဒါက သတင်း ထုတ်ပြန်တဲ့ တာဝန်ခံ ပုဂ္ဂိုလ်ကြီးက မေးမြန်းတဲ့ မီဒီယာသမားကို ငေါက်ငမ်း ခြိမ်းခြောက်တာ ဖြစ်ပါတယ်။ ဒါဟာ သူတို့ အာဏာရှင် တွေရဲ့ အကျင့်ပဲလို့ စဉ်းစား နားလည် ယူလို့ရပေမယ့် သတင်း ထုတ်ပြန်ပွဲမှာ လူတဦးထဲက ထုတ်ပြန်နေတဲ့ အခါ တဦးထဲက ငေါက်ပြီး အဖွဲ့နဲ့ ထုတ်ပြန်နေရင် အဖွဲ့လိုက် ငေါက်မှာ-ဟောက်မှာလား ဆိုတာ စဉ်းစားစရာ ဖြစ်နေပါတယ်။ ဒါနဲ့ တဆက်ထဲပဲ နောင်သတင်းစာ ရှင်းလင်းပွဲတွေမှာ ဒီသတင်း ထုတ်ပြန်ရေး အဖွဲ့ဝင် ၁၁ယောက်စလုံး ထွက်ငို ပြနေရင် ဆိုတာကိုလည်း တွေးနေ မိပါတယ်။
နှစ်ခါအလှည့်စားခံရရင် ကိုယ့်အပြစ်ပေါ့လေ။
Ref: မဇ္ဈိမ
Posts
0 comments:
Post a Comment