..............................

Wednesday, August 17, 2011

ပြည်ပအသံလွှင့်ဌာနများ အပေါ် ပုတ်ခတ်မှု အစိုးရသတင်းစာ ရပ်ဆိုင်း

ဦးသားညွန့်ဦး
အင်္ဂါ, 16 သြဂုတ် 2011

မြန်မာအစိုးရ သတင်းစာတွေမှာ နေ့စဉ် ဖော်ပြနေခဲ့တဲ့ မြန်မာလို လွှင့်ထုတ်တဲ့ ပြည်ပရေဒီယို သတင်း ဌာနတွေ အပေါ် ပုတ်ခတ် ရေးသားတဲ့ ဆောင်ပုဒ်တွေကို ဒီကနေ့ထုတ် သတင်းစာတွေမှာ ဖြုတ်လိုက်တာ တွေ့ရပါတယ်။ ပြည်တွင်း သတင်းနဲ့ မီဒီယာ သမားတွေကတော့ ဒါဟာ အစိုးရသစ်ရဲ့ အပြောင်း အလဲတရပ် ဖြစ်သလို အမျိုးသား ရင်ကြားစေ့ရေး လုပ်ငန်းရဲ့ အစိတ် အပိုင်းတခု ဖြစ်တယ် ဆိုပြီး ကြိုဆို ခဲ့ကြပါတယ်။ သူတို့ရဲ့ သဘောထားကိုတော့ ကိုသားညွန့်ဦးက ဆက်သွယ် မေးမြန်းပြီး တင်ပြ ပေးထားပါတယ်။

ပြည်ပ အသံလွှင့် သတင်းဌာနတွေ ဖြစ်ကြတဲ့ VOA, BBC, RFA, DVB သတင်းဌာနတွေကို ဝေဖန်ပုတ်ခတ်တဲ့ ဆောင်ပုဒ် တွေကို စစ်အစိုးရ လက်ထက်ကစပြီး အစိုးရသစ် ဖွဲ့စည်းပြီး အချိန်အထိ နေ့စဉ် တောက်လျှောက် ဖော်ပြ လာရာကနေ ဒီကနေ့ သတင်းစာ တွေမှာ အဲဒီ ဆောင်ပုဒ်တွေ ဖြုတ်လိုက်တာကို အတော်များများ သတိထား မိသလို ဒါဟာ အပြောင်း အလဲတခု ဖြစ်တယ်လို့ တွက်ဆ ကြပါတယ်။ သတင်းဂျာနယ် အယ်ဒီတာ တဦးဖြစ်တဲ့ စာရေးဆရာ မောင်ဝံသကတော့ ဒါဟာ ပြန်လည် ရင်ကြားစေ့ရေး သဘောထား ဖြစ်တယ်လို့ ရှုမြင်ပါတယ်။

“ကျနော်တို့တော့ အင်မတန် ၀မ်းသာပါတယ်ဗျာ။ မီဒီယာသမား အချင်းချင်းလည်း ကျနော်တို့က မျက်နှာပူစရာ ဖြစ်တယ်။ နိုင်ငံရေး အရ ဆန့်ကျင်ဘက် သဘောထားတွေ ရှိတယ်လို့ သုံးသပ်ပြီးတော့ VOA တို့၊ BBC တို့၊ RFA တို့၊ DVB တို့ကို အဲဒီလို ရှုမြင်တာပေါ့ဗျာ။ ကျနော်တို့ကလည်း ပြည်တွင်းမှာ မီဒီယာ လုပ်နေတဲ့ သတင်းသမားတွေ ဆိုတော့ သတင်းသမား အချင်းချင်း အနေနဲ့က မျက်နှာ ပူတာပေါ့။ အခု ပြည်တွင်း မီဒီယာတွေနဲ့ ပတ်သက်ပြီးတော့ သမ္မတကြီး ဦးသိန်းစိန်ကလည်း ပြောပါတယ်၊ စတုတ္ထ မဏ္ဍိုင်ပေါ့ဗျာ၊ စတုတ္ထမဏ္ဍိုင် အနေနဲ့ ကျနော်တို့ကို အသိအမှတ် ပြုတာလည်း ၀မ်းသာတယ်။

“အခု ပြည်ပမီဒီယာတွေကို အရင်ကဆိုရင်တော့ ရန်သူလို သဘောထားတာပေါ့။ အခုအချိန်မှာ ကျတော့ ပြည်ပ မီဒီယာ၊ မြန်မာလို အသံလွှင့်တဲ့ မီဒီယာတွေကို အဲဒီလို သုံးသပ်တာမျိုး မဟုတ်တော့တဲ့ အတွက် ဒါ ကောင်းတဲ့ လက္ခဏာပဲလို့ မြင်ပါတယ်။ ပြန်ပြီးတော့ ရင်ကြားစေ့တဲ့ သဘောတခုပါပဲ။”

ဒီလို စာတမ်းတွေ ဖြုတ်လိုက်တာကို မြန်မာနိုင်ငံ စာပေနဲ့ စာနယ်ဇင်းအဖွဲ့ အတွင်းရေးမှူး ဦးကိုကို (စက်မှု) ကလည်း ကြိုဆို လိုက်ပါတယ်။ ဒါဟာ အစိုးရသစ်ရဲ့ အပြောင်းအလဲ၊ အထူးသဖြင့် ပြန်ကြားရေး မျက်နှာစာရဲ့ အပြောင်းအလဲ တခု ဖြစ်တယ်လို့ သူ့အမြင်ကို ပြောပါတယ်။

“ကျနော်ကတော့ အခု အစိုးရက ကြေညာနေတဲ့ အမျိုးသား ပြန်လည်စည်းလုံး ညီညွတ်ရေး ဆိုတာပေါ့ဗျာ။ အမျိုးသား ပြန်လည်စည်းလုံး ညီညွတ်ရေး ဆိုရာမှာလည်း ကျနော်တို့ ဘာပဲပြောပြော မီဒီယာတွေ အချင်းချင်းပေါ့ဗျာ၊ ဘယ်လိုပဲဖြစ်ဖြစ် သဘောထား အယူအဆ မတူညီကြတဲ့သူတွေ စည်းလုံးမှုမှာ မီဒီယာတွေလည်း ပါဝင်စေချင်ပါတယ်။ အဲတော့ အခု ဒီလိုမျိုး နိုင်ငံပိုင် သတင်းစာတွေ ထဲမှာ ပုံမှန်ပါနေကြ ကဏ္ဍတွေကို ဖြုတ်လိုက်တဲ့ အတွက်ကြောင့် ကျနော်ကတော့ မီဒီယာသမားတဦး အနေနဲ့ကတော့ ၀မ်းသာပါတယ်၊ ကြိုလည်း ကြိုဆိုပါတယ်။

“ဘာပဲပြောပြော အနည်းဆုံးတော့ အစိုးရအဖွဲ့ အပြောင်းအလဲတခု ရှိတယ်ဆိုတဲ့ နေရာမှာ ပြန်ကြားရေးရဲ့ မျက်နှာစာ တခုကလည်း ပြောင်းလဲပါတယ် ဆိုတာကိုတော့ ကျနော်တို့ ပြသဖို့ လိုပါတယ်။ အဲဒီအတွက်ကိုတော့ ဒါဟာ ပြသမှုရဲ့ အစိတ်အပိုင်း တခု အနေနဲ့ ထင်ရ လိမ့်မယ်လို့ ကျနော် မျှော်လင့်ပါတယ်။ ဒီလိုမျိုး ဖျောက်လိုက်ခြင်း အားဖြင့်လည်း နားလည်မှုတွေ လွဲနေတာတွေ ရှိကောင်း ရှိနိုင်ပါတယ်၊ ကောင်းတဲ့ဘက်ကို ပိုပြီး ဦးတည်လာလိမ့်မယ့် အနေအထားလို့ပဲ ကျနော် မြင်ပါတယ်။”

စာရေးဆရာ ဒါရိုက်တာ ချိုတူးဇော်ကတော့ အစိုးရတရပ်ရဲ့ ပြန်ကြားရေးကို ကိုယ်စားပြုတဲ့ သတင်းစာတွေကနေ အခုလို အရေးအသား မျိုးတွေဟာ အရင်ကတည်းက မဖြစ်သင့်တာမို့ ဒါတွေကို ပြန်ဖြုတ်လိုက်တဲ့ အပေါ် အကောင်းဘက်က ကြိုဆိုပါတယ်။

“ကောင်းတဲ့အလားအလာလို့ပဲ မြင်ပါတယ်ဗျာ။ ကျနော့်အမြင်ကတော့ ဒီကိစ္စကြီးက လုပ်စရာ၊ ရေးစရာ မလိုဘူး။ မီဒီယာပေါ့၊ နိုင်ငံကို ကိုယ်စားပြုတဲ့ ပြန်ကြားရေး ၀န်ကြီးဌာန တရပ်အနေနဲ့ ဒီလို လေယူလေသိမ်း၊ ဒီလို အသုံးအနှုန်းတွေနဲ့ ပြောသင့် ပြောထိုက်တာ မဟုတ်ဘူးဗျ။ အဲတော့ အခုလိုမျိုး မပြောတော့ဘူး၊ ဒါမျိုးတွေ မထည့်တော့ဘူး ဆိုတာ အရမ်းကို ကောင်းတဲ့ အလားအလာလို့ မြင်ပါတယ်။”

မြန်မာအစိုးရ သတင်းစာတွေမှာတော့ အရင် စစ်အစိုးရ လက်ထက်တုန်းက မပြတ် ဖော်ပြခဲ့တဲ့ နိုင်ငံရေး၊ စီးပွားရေး၊ လူမှုရေး ဦးတည်ချက် တွေကိုလည်း နောက်ပိုင်းမှာ မတွေ့ရ တော့ပါဘူး။ ပြည်သူ့ဆန္ဒ သဘောထား ဆိုတဲ့ ဆောင်ပုဒ် ဆိုရင်လည်း အတွင်းပိုင်း စာမျက်နှာမှာ ပြောင်းထည့် လာပါတယ်။ တို့တာဝန် အရေးသုံးပါးကိုပဲ မူလ မျက်နှာဖုံးမှာ ထားရှိပါတယ်။

အခုလိုမျိုး ပြည်ပ သတင်းဌာနတွေကို ဝေဖန် ပုတ်ခတ် ရေးသားတဲ့ ဆောင်ပုဒ်တွေကို ၂၀၀၇ ခုနှစ် ရွှေဝါရောင် သံဃာ့ လှုပ်ရှားမှု ပြီးကတည်းက စပြီး မြန်မာ အစိုးရ သတင်းစာတွေမှာ နေ့စဉ်လိုလို ဖော်ပြခဲ့တာ ဖြစ်ပါတယ်။

Ref: VOA News

0 comments:

အပေါ်သို့