ကေအိုင်အေတပ် စခန်းကို နအဖစစ်တပ်က ပစ်ခတ်

Monday, 06 December 2010

ဗန်းမော်ခရိုင် လွယ်ဂျယ်မြို့အနီးရှိ ကချင်ပြည် လွတ်လပ်ရေး တပ်မတော် KIA တပ်စခန်း တစ်ခုကို ဒီဇင်ဘာလ ၄ ရက်နေ့ မွန်းလွဲ ၃ နာရီခန့်က မြန်မာ စစ်တပ်က စတင် ပစ်ခတ်ရာ နှစ်ဘက် အပြန်အလှန် ပစ်ခတ်ခဲ့ကြောင်း သိရသည်။

လွယ်ဂျယ်မြို့နှင့် မိုင်ဂျာယန် အကြား ကောင်းဆာရွာအနီးရှိ ကေအိုင်အေ တပ်ရင်း ၁၆ လက်အောက်ခံ တပ်စခန်း တစ်ခုကို မြန်မာ စစ်တပ်၏ ခလရ ၂၃၆ တပ်ဖွဲ့များက ပစ်ခတ်ခဲ့ခြင်း ဖြစ်သည်။

ကေအိုင်အေ တပ်ရင်း ၁၆ တပ်ဖွဲ့ဝင်များက ကောင်းဆာရွာ အတွင်း ၀င်ရောက်၍ တပ်သားသစ် စုဆောင်း နေရာမှ ယခု ပစ်ခတ်မှု စတင်ခဲ့ပြီး နအဖ ဘက်မှ ထိုးစစ်ဆင်သည့် အနေအထား မဟုတ်ကြောင်း ဒေသခံတစ်ဦးက သျှမ်းသံတော်ဆင့်သို့ ပြောသည်။

“စုဆောင်းရေးဆွဲရာကနေ စဖြစ်တာ ကေအိုင်အေက ကောင်းဆာရွာမှာလူလာဖမ်းတာ မူးယစ်ဆေးဝါး နှိမ်နှင်းရေးလည်း လုပ်နေတယ် ဆိုတော့ ဘယ်လို ဖမ်းလဲမသိဘူး အဲဒီရွာက ကေအိုင်အေ စခန်းနဲ့ နီးနီးလေးပဲ ကေအိုင်အေ အဖွဲ့ စခန်းပေါ် တက်ပြေးတော့ နအဖက စခန်းကို ပစ်တာ နှစ်ဘက် အပြန်အလှန် ပစ်ကြတာပေါ့ ” - ဟု ဒေသခံ တစ်ဦးက ပြောသည်။

ထိုနေ့က မြောက်ပိုင်းတိုင်းစစ်ဋ္ဌာနချုပ် တိုင်းမှူး ဗိုလ်မှူးချုပ်ဇေယျာအောင် လွယ်ဂျယ်မြို့သို့ ရောက်ရှိနေရာ နှစ်ဘက် တပ်များ လုံခြုံရေး တိုးမြှင့် ထားချိန်နှင့် တိုက်ဆိုင်နေကြောင်း သိရသည်။

ယခု ပစ်ခတ်မှုအတွင်း နှစ်ဘက်အကျအဆုံးမရှိကြောင်း ကေအိုင်အို သတင်း ရပ်ကွက်က ပြောသည်။

စက်တင်ဘာ ၂၃ ရက်နေ့ကလည်း ကေအိုင်အို ဋ္ဌာနချုပ်ရှိရာ တရုတ်နယ်စပ်အနီးရှိ လိုင်ဇာမြို့သို့ နအဖ စစ်ရဟတ်ယာဉ် တစ်စီး နယ်ကျော် ၀င်ရောက်ခဲ့ရာ ကေအိုင်အိုဘက်မှ ပစ်ခတ် သတိပေးခဲ့ရကြောင်း သိရသည်။

လတ်တလော မြစ်ကြီးနားနှင့် ဗန်းမော်မြို့ဘက်မှ ကုန်ကားများ လိုင်ဇာသို့ သွားလာမှုကို ပိတ်ပင်ထားသဖြင့် လိုင်ဇာမြို့၌ ကုန်စည် စီးဆင်းမှု ရပ်ဆိုင်း နေကြောင်း ကချင်လူမှုဖွံ့ဖြိုးရေး ကွန်ယက် အဖွဲ့မှ ဦးအောင်ဝါက ပြောသည်။

နယ်ခြားစောင့်တပ်ငြင်းဆန်နေသည့် ကေအိုင်အိုနှင့် နအဖတို့ အကြား စစ်ရေးတင်းမာနေရာ လွန်ခဲ့သည့် လက ကချင်ပြည် နယ်အတွင်း ဖွင့်လှစ်ထားသော ကေအိုင်အို ဆက်ဆံရေး ရုံးများကို ပိတ်ပစ်ရန် နအဖက ကေအိုင်အိုကို အကြောင်းကြား ခဲ့ပြီး ယခု လဆန်းပိုင်းက ကချင်ပြည်နယ်အတွင်း နအဖတပ်များ စစ်အင်အား ဖြည့်တင်းနေကြောင်း သိရသည်။

Ref: သျှမ်းသံတော်ဆင့်