မြ၀တီမြို့တွင်း တိုက်ပွဲဖြစ်မည့် အခြေအနေရှိ

ရဲရင့်
၁၂ အောက်တိုဘာ ၂၀၁၀

မြ၀တီမြို့ပြင်ရှိ ဒီကေဘီအေတပ်ရင်း (၉၀၂) ခွဲထွက်အဖွဲ့၏ တပ်စခန်း နယ်မြေ အနီးတွင် နအဖတပ်များ လာရောက် အခိုင်အမာ တပ်စွဲ ၀ိုင်းရံ ထားသဖြင့် မကြာမီ မြို့တွင်းတိုက်ပွဲများ ဖြစ်ပွား နိုင်သည်ဟု ဒီကေဘီအေ အဖွဲ့က ပြောသည်။

ယခုကဲ့သို့ နအဖတပ်၏ ၀ိုင်းရံပိတ်ဆို့မှုကို လက်မခံဘဲ လက်တုံ့ပြန်မှုများ ပြုလုပ်သွားမည်ဟု (၉၀၂) ဒီကေဘီအေ တပ်ရင်းမှူး ဗိုလ်ကျော်သက်က ပြောသည်။

၎င်းက “နအဖက ကျနော်တို့ကို မြ၀တီမြို့ထဲ နေလို့မရဘူး မောင်းထုတ်တော့ သူတို့ ဘာဆက်လုပ်မလဲ ကျနော်တို့ စောင့်ကြည့်မယ်။ နောက်ဆုံး သူတို့ဘက်က စတိုက် လာရင်တော့ ကျနော်တို့ ပြန်တိုက်ရမှာပဲ။ အောက်ခြေ အဖွဲ့အစည်းတွေက မြို့ထဲ နေလို့ မရဘူးလို့ လာပြောတယ်။ နေလို့ မရဘူးဆိုတာ ဘယ်ဗိုလ်ချုပ် အမိန့်လဲ၊ ဘာဖြစ်လို့ နေလို့မရလဲ၊ ဒီကိစ္စကို လုံးဝ လက်မခံဘူး” ဟု ပြောသည်။

ကလို့ထူးဘောဗျူဟာ အခြေစိုက် ဒီကေဘီအေ (၉၀၂) တပ်ရင်း အပါအ၀င် ဒီကေဘီအေ တပ်များသည် လွန်ခဲ့သည့် (၁၅) နှစ်ခန့်က စတင်၍ မြ၀တီ အပါအ၀င် ကရင်ပြည်နယ် အတွင်း မြို့တွင်း မြို့ပြင်၌ နေထိုင် လာခဲ့ရာမှ မြို့တွင်းသွားလာ နေထိုင်ခွင့်ကို နအဖ အာဏာပိုင်တို့က ပိတ်ပင် လိုက်ခြင်းဖြစ်သည်။

ဗိုလ်ကျော်သက်က “ကျနော်တို့လူတွေ အခု မြ၀တီမြို့အနီးမှာပဲ ရှိတယ်။ အရင်လိုပဲ သွားလာနေတယ်။ ကျနော်တို့ကို စပစ်လို့ ကတော့ မြ၀တီမြို့ပေါ်မှာပဲ မြို့တွင်း တိုက်ပွဲလုပ်မယ်။ ဒီတခါကတော့ တောတွင်းတိုက်ပွဲ မလုပ်တော့ဘူး” ဟု ပြောသည်။

မြ၀တီမှ ခရိုင်အာဏာပိုင်အဖွဲ့ဝင်တဦးက “ဒီကေဘီအေတွေကို မြ၀တီမြို့ထဲ အ၀င် မခံတာက ကျော်သက်တို့ အဖွဲ့ကိုပဲ။ အခြား အဖွဲ့တွေ ၀င်ထွက် နေကြတာပဲ။ ကျော်သက်တို့က ပြီးခဲ့တဲ့လ (၂၁) ရက်နေ့က အသိမ်းခံရတဲ့ သူတို့ လိုင်စင်မဲ့ ကားတွေ ပြန်ယူဖို့ မြ၀တီ ရဲစခန်းကို သူ့လူတွေနဲ့ လာဝိုင်းတယ်။ တပ်ကလည်း တခါသူတို့ကို ပြန်ဝိုင်းတယ်။ အဲဒီမှာ ပစ်မယ်ခတ်မယ်နဲ့ တပ်ကသာ အလျှော့မပေးရင် အကုန်သေကြမှာ။ ဒါကြောင့် သူတို့ကို မြို့ထဲ အ၀င်မခံဖို့ အထက်က အမိန့် ပေးထားတာ ဖြစ်တယ်” ဟု ပြောသည်။

ဒီကေဘီအေတပ်ရင်း (၉၀၂) သည် နယ်ခြားစောင့်တပ်အဖြစ် အသွင်ပြောင်းမည့် နအဖ၏ အစီအမံကို လက်မခံဘဲ နအဖဘက်မှ မက်လုံးပေး စည်းရုံး သိမ်းသွင်းမှုများကိုလည်း ပယ်ချခဲ့သည်ဟု ဗိုလ်ကျော်သက်က ပြောသည်။

နအဖတပ်၏ စစ်ဦးစီးပထမတန်း ဒု-ဗိုလ်မှူးကြီးမျိုးမြင့်က (၉၀၂) တပ်ရင်း အပါအ၀င် ဒီကေဘီအေ တပ်မဟာ (၅) လက်အောက်ခံ တပ်များ နယ်ခြားစောင့်တပ် အဖြစ် အသွင် ပြောင်းပါက တပ်မဟာမှူး အပါအ၀င် တပ်ရင်းမှူးများကို ဖားကန့် လုံခင်းဘက်တွင် ကျောက်တွင်း လုပ်ပိုင်ခွင့်နှင့် အခြား လုပ်ငန်းများ အပါအ၀င် ကုမ္ပဏီ တည်ထောင်ခွင့် များကိုလည်း ချပေးမည်ဟု ပြောကြားခဲ့သည်။

လက်ရှိ တင်းမာနေသည့် နှစ်ဖက်အနေအထားများကြောင့် မြ၀တီမြို့ခံများ စိုးရိမ် ထိန့်လန့်မှုဖြစ်ပြီး မြို့တွင်း တိုက်ပွဲဖြစ်လျှင် ကြိုတင် ရှောင်ရှားနိုင်မည့် အစီအစဉ်များ လုပ်ဆောင် ထားကြသည်ဟု မြ၀တီမြို့ခံ တဦးက ပြောသည်။

၎င်းက “အခုအနေအထားကတော့ စိုးရိမ်ရတယ်။ နှစ်ဖက်စလုံးကတော့ လျှော့ကြမယ့်ပုံ မမြင်ဘူး။ မြ၀တီမြို့တွင်း မြို့ပြင်မှာ တပ်က လက်နက်ကိုင် အင်အားတွေ ရပ်ကွက်တိုင်းမှာ ချထားတယ်။ မြို့ပြင်ဘက်ကိုလည်း လက်နက်ကြီးတွေ ချိန်ထားတယ်။ ညဘက်ဆိုရင် မြို့ထဲမှာ လူမရှိသလောက်ပဲ၊ ကောင်းကောင်း မအိပ်ရဲကြဘူး။ အခြေအနေက နေ့လားညလားပဲ” ဟု ပြောသည်။

မြ၀တီမြို့တွင် ယခုရက်ပိုင်းအတွင်း နအဖတပ်မှ တပ်ဖွဲ့ဝင်များ ကားများဖြင့် ညစဉ် ကင်းလှည့်ကြပြီး မြို့တွင်း လူအ၀င် အထွက်များကိုလည်း လုံခြုံရေး တိုးမြှင့်ထားသည်ဟု ထိုမြို့ခံက ပြောသည်။

ဒီကေဘီအေတပ်မဟာ (၅) အဖွဲ့သည် မြ၀တီခရိုင် တောင်ဘက်ရှိ ဝေါ်လေဒေသကို အခြေစိုက်၍ စစ်ရေး လှုပ်ရှားနေသည့် အဖွဲ့ ဖြစ်ပြီး နအဖ၏ နယ်ခြားစောင့်တပ်ကို လုံးဝ လက်မခံသည့် တခုတည်းသော ဒီကေဘီအေ ခွဲထွက် အဖွဲ့ဖြစ်သည်။

Ref: ခေတ်ပြိုင်