တောင်းဆိုချက် အချို့အလျှော့ပေးရန် တရုတ်တိုက်တွန်းချက် ၀ လက်မခံ

Monday, 22 March 2010

စစ်အစိုးရအား မူလတောင်းဆိုချက် ၉ ချက် အတိုင်း ပုံသေမသွားဘဲ အလျှော့အတင်း ပြုလုပ်၍ အကြေအလည် ဆွေးနွေးကြရန် တရုတ် တိုက်တွန်းချက်ကို လက်မခံနိုင်ကြောင်း ၀ ခေါင်းဆောင် အသိုင်းအ၀ိုင်းက ပြောကြပါသည်။

“၂၀၀၉ နိုဝင်ဘာ ၁၀ ရက် ရက်စွဲနဲ့ ဥက္ကဌကြီး လက်မှတ်ရေးထိုး တင်ပြတဲ့ ကန့်သတ်ချက်တွေ ထဲမှာ ၀ ဘက်က လိုက်လျောထားတာ အများကြီးပါ။ လုံးဝ အလျှော့မပေးတာ နအဖဘဲ” - ခေါင်းဆောင်ပိုင်း တဦးက ပြောကြောင်း - ၀ ခေါင်းဆောင် အချို့နှင့် နီးစပ်သူ တဦးက ပြောပါသည်။

နယ်စပ်ရှုပ်ထွေးမှုမဖြစ်ပေါ်စေရန် ယူနန်ပြည်နယ်မှ တရုတ်ဆက်ဆံရေး အရာရှိများ ၀ ခေါင်းဆောင်တို့အား ပြီးခဲ့သည့် အပတ်က တိုက်တွန်းခဲ့ခြင်း ဖြစ်သည်။

“တောင်ပိုင်း ၀ နယ်မြေတောင် တပ်ရုပ်ပေးဖို့မဖြစ်နိုင်ဘူး၊ မိုင်းပေါက် မိုင်းဖျဲန်နယ်မြေဆို ပိုဝေးတာပေါ့၊ အဲဒါ မြောက်ပိုင်း ၀ နယ်မြေရဲ့ အသက်ရှူပေါက်ဘဲ”- ဟု ၀ တပ်မှူးတဦးက လည်းဆို၏။

ထို့အပြင် အဆိုပါ ၀ တပ်မှူးက - အမှတ် ၁၇၁ စစ်ဒေသ တောင်ပိုင်း ၀ နယ်မြေမှ ၀ တပ်ရုပ်ပေးရေး စစ်အုပ်စုလိုလားမှု အပေါ် တရုတ်တို့၏ တိုက်တွန်းမှုကို လိုက်လျောပေးရန် မဖြစ်နိုင်ကြောင်း၊ တောင်ပိုင်း နယ်မြေအား အသက်ရာထောင်ချီ ရင်း၍ ခွန်ဆာ့လက်မှ တိုက်ယူရကြောင်း၊ တောင်ပိုင်းဒေသသို့ ၀ ပြည်သူများ ရွှေ့ပြောင်းခဲ့စဉ်က ဗိုလ်ချုပ်မှူးကြီး သန်းရွှေ၏ ကိုယ်စား ဗိုလ်ချုပ်ခင်ညွန့်က ညွှန်ကြားခဲ့ခြင်း ဖြစ်ကြောင်း၊ မိမိတို့ ဆန္ဒအရ ပြောင်းရွှေ့လာခြင်း မဟုတ်ကြောင်း၊ စီးပွားရေး ဘက်တွင်လည်း အရင်းအနှီးများစွာ မြုပ်နှံ ထားခဲ့ရပြီဖြစ်ကြောင်း ဆက်ပြောပါသည်။

သီးခြားအတည်မပြုနိုင်သေးသည့် သတင်းရပ်ကွက်အရ လာမည့် မတ်ခ်ျ ၂၅ ရက်၌ နအဖ နှင့် ၀ တပ်ဖွဲ့ ကိုယ်စားလှယ်များ တန့်ယန်းတွင် ထပ်မံ တွေ့ဆုံရန် ရှိသည်ဟု ဆိုသည်။

ဝ တပ်ဖွဲ့ တပ်ရုပ် ဆုတ်ခွါရန် - နအဖ အလိုရှိသော မိုင်းယန်းမြောက်ဘက် မိုင်းပေါက်နှင့် မိုင်းဖျဲန် ဒေသမှာလည်း ၀ နယ်မြေ ဖွဲ့စည်းပုံအရ ခရိုင်အဆင့် သတ်မှတ်ပြီး တပ်မဟာ ၄၆၈ ၏ ထိန်းချုပ် နယ်မြေဖြစ်၏။ တောင်ပိုင်း ၀ ဒေသတွင်လည်း အမှတ် ၁၇၁ စစ်ဒေသ လက်အောက်ခံ တပ်မဟာ ၅ ခုရှိ၏။

၂၀၀၂ ဧပြီ လားဟူအမျိုးသားဖွံ့ဖြိုးရေးအဖွဲ့ Lahu National Development Organisation ကထုတ်ပြန်သော (Un settling Moves, The Wa forced resettlement in Eastern Shan State ( 1999-2001) အစီရင်ခံစာ အရ ၀ လူထု ၁၂၀,၀၀၀ တောင်ဘက်ပိုင်း (သံလွင်အရှေ့ခြမ်း ထိုင်းနယ်စပ် တလျှောက် မိုင်းဆတ် မိုင်းတုံမြို့နယ်) သို့ ပြောင်းရွှေ့ခဲ့ကြသည်ဟု ထုတ်ပြန်ခဲ့ဘူးသော်လည်း ၀ အာဏာပိုင် များကမူ လူဦးရေ ၈ သောင်းသာ ပြောင်းရွှေ့ခဲ့သည် ဟု ပြောပါသည်။

Ref: သျှမ်းသံတော်ဆင့်