မင်းနိုင်သူ/ ၂၂ ဇန်န၀ါရီ ၂၀၀၉
စီးပွားကူးသန်းဝန်ကြီးဌာနက ပဲနှမ်းကုန်စည်ဒိုင်များမှ အလုပ်အမှုဆောင်များအား ပဲဝယ်ယူရေးဆိုင်ရာ ကုမ္ပဏီများ ဖွဲ့စည်းခိုင်းနေကြောင်း ကုန်သည်ပွဲစားများက ပြောသည်။
စီးပွားကူးသန်းဦးဆောင်မှုဖြင့် UMFCCI ရုံးချုပ်၌ ပဲနှမ်းကုန်စည်ဒိုင်များမှ အမှုဆောင်အဖွဲ့ဝင်များအား ယခုလ (၈) ရက်တွင် ခေါ်ယူကာ ယင်းကိစ္စ အကောင်အထည်ဖော်ရန် ညွှန်ကြားခဲ့ခြင်းဖြစ်ကြောင်း စုံစမ်းသိရှိရသည်။
“ဘယ်နေ့ဘယ်ရက်မှာ အပြီးသတ်ဖွဲ့ပါလို့တော့ မပြောဘူး။ အမြန်ဆုံးဆောင်ရွက်ပါလို့တော့ ညွှန်ကြားထား တယ်။ အများပိုင်တော့ မဟုတ်တော့ဘူး။ အများနဲ့မဆိုင်တဲ့ ကုမ္ပဏီပဲဖွဲ့တော့မှာ။ လူကြီးတွေက အများပိုင်ကို မသွားနဲ့ဦးဆိုပြီး ပြောင်းညွှန်ကြားလာပြန်တယ်။ ဒီက စိတ်ဝင်စားတဲ့ ကုန်သည်ပွဲစားနဲ့ ရန်ကုန်ကုမ္ပဏီတွေ ပူးပေါင်းပြီးဖွဲ့ရမှာ။ ဒီကလူတွေက ၀ယ်ယူပေါ့။ ရန်ကုန်ကုမ္ပဏီက တင်ပို့ရေး တာဝန်ယူလုပ်ပေါ့။ အဲလိုတော့ ပြောထားတယ်။ အသေးစိတ်ညွှန်ကြားမှုတွေတော့ မရှိသေးဘူး” ဟု မန္တလေး ကုန်စည်ဒိုင် အမှုဆောင်တဦးက ပြောသည်။
ဘုရင့်နောင်ပဲဈေးကွက်အတွင်း နိုဝင်ဘာလ၌ ပဲဈေးကွက်ပျက်ကာ ကုန်သည်များ ထွက်ပြေး တိမ်းရှောင် ခဲ့ကြသည်။ ယင်းဖြစ်ရပ်ကြောင့် ပြည်တွင်း ပဲဈေးကွက်၌ ကမောက်ကမ ဖြစ်ပွားခဲ့ပြီး ယခုအခါ အစိုးရက ပဲဈေးကွက်ကို ထိန်းချုပ် လိုက်ပြီဖြစ်သည်။
လာမည့်ကာလအတွင်း အိန္ဒိယ-မြန်မာ ပဲရောင်းဝယ်မှုကို အစိုးရချင်း တိုက်ရိုက် ချိတ်ဆက် ရောင်းဝယ်သွားတော့ မည်ဖြစ်သည်။ အိန္ဒိယအဖွဲ့ နေပြည်တော်သို့ ၂၀၀၈ ခုနှစ် နိုဝင်ဘာ (၂၃) ရက်တွင် ရောက်ရှိ်လာပြီး ပဲတန်ချိန် (၁) သန်း ၀ယ်ယူမည် ဆိုသော်လည်း အပြီးသတ် ညှိနှိုင်းမှု မရခဲ့ပေ။
အများပိုင်ကုမ္ပဏီဖွဲ့ရမည်ဟူသော သတင်းများ ပေါ်ထွက်ခဲ့သော်လည်း အစိုးရက မူဝါဒပြောင်းသွားပြန်ကာ အစုရှယ်ယာဝင် (၅၀) ဦးထက် မပိုရသော ကုမ္ပဏီများအသွင် ဖွဲ့စည်းခိုင်းခဲ့ခြင်းဖြစ်သည်။
“(၅၀) ထက်ပိုရင် မြန်မာနိုင်ငံရဲ့ ကုမ္ပဏီစုဖွဲ့မှုဆိုင်ရာ ဥပဒေအရ အများပိုင်ကုမ္ပဏီအဖြစ် သတ်မှတ်တော့ အခုတော့ (၅၀) ထက်မပိုစေနဲ့လို့ ပြောထားတယ်။ ဒီမှာကတော့ သိပ်စိတ်မ၀င်စားကြပါဘူး။ စောစောပိုင်းက အများပိုင် ကုမ္ပဏီဖွဲ့ဖို့ဆိုပြီး အမှုဆောင်အဖွဲ့က ဝေတဲ့အဆိုပြုလွာမှာ ပါဝင်လိုတဲ့ ပွဲစားက (၂၀၀) လောက်ပဲ ရှိတယ်။ ကုန်စည်ဒိုင်အသင်းသား (၇၀၀) ရှိတဲ့အထဲက (၂၀၀) လောက်ပဲဆိုတော့ ထောက်ခံမှုတ၀က်တောင် မရဘူးဆိုရမှာပေါ့” ဟု မုံရွာပွဲစားက ပြောသည်။
စီးပွားကူးသန်းဒု-၀န်ကြီးနှင့် ပုဂ္ဂလိကကုမ္ပဏီတဖွဲ့ အညာဒေသရှိ ကုန်စည်ဒိုင်များသို့ လှည့်လည်ကာ ကုမ္ပဏီဖွဲ့ရေးဆွေးနွေးသွားခဲ့ကြရာ မုံရွာကုန်စည်ဒိုင်သို့ ယခုလ (၁၈) ရက်တွင် ရောက်ရှိခဲ့ကြောင်း သိရသည်။
“ဒီကိစ္စက မလွယ်ပါဘူး။ အစိုးရက ကုမ္ပဏီဖွဲ့၊ ရန်ကုန် ကုမ္ပဏီတွေနဲ့ ပေါင်းလုပ်ဆိုတော့ ရန်ကုန်ကုမ္ပဏီတွေက ဘယ်လောက်ရုံ ရမှာမို့တုန်း။ ပြီးတော့ သူတို့က ကုမ္ပဏီပါ သူတို့နဲ့ တပါတည်းခေါ်လာပြီး ပွဲစားလုပ် တယ်ဆိုတော့ သူတို့နဲ့ ပတ်သက်နေတဲ့ ကုမ္ပဏီတွေပဲဖြစ်မှာပေါ့။ သူတို့ကုမ္ပဏီဆိုရင်တော့ ဒီက..နယ်က လူတွေ သူတို့လုပ်သမျှ ခံပေရော့ဖြစ်မှာပဲ။ ရေနံမှော် တွေကိုပဲကြည့် ဘယ်တုန်းကများ ဒေသခံက ကောင်းကောင်း လုပ်စားရလို့တုန်း။ သူတို့နဲ့ ပတ်သက်တဲ့ ကုမ္ပဏီကပဲ ခေါင်းပုံဖြတ် အမြတ်ကြီးထုတ်၊ လုပ်ချင်သလို လုပ်သွားတာ။ အခုလည်း ဒီလိုဖြစ်မယ့် သဘောတွေ တွေ့နေရတယ်” ဟု မုံရွာပဲကုန်သည်က သုံးသပ်ပြောဆိုသည်။
Ref: ခေတ်ပြိုင်
Friday, January 23, 2009
ပဲဝယ်ယူရေးဆိုင်ရာ ကုမ္ပဏီများဖွဲ့ခိုင်း
Subscribe to:
Post Comments (Atom)
Posts
0 comments:
Post a Comment