မွမ်ဘိုင်းကိုတိုက်ခိုက်သူ အကြမ်းဖက်သမားတွေကို အိန္ဒိယတပ်ဖွဲ့ နှိမ်နင်း

27 November 2008

အိန္ဒိယနိုင်ငံရဲ့ စီးပွားရေးအချက်အချာဖြစ်တဲ့ မွမ်ဘိုင်းမြို့မှာ သေနတ်သမားတွေ သိမ်းပိုက်ထားတဲ့ ဇိမ်ခံဟိုတယ် နှစ်ခုအတွင်း ၀င်ရောက်ရှင်းလင်းဖို့ အိန္ဒိယ ကွန်မန်ဒိုတွေ၊ အိန္ဒိယ စစ်သားတွေဟာ အတော် ရောက်ရှိလာကြပါပြီ။ နောက်ဆုံးအခြေအနေ အဖြစ်အပျက်တွေကို ကိုသားညွန့်ဦးက တင်ပြပေးထား ပါတယ်။

မနေ့ညပိုင်းတုန်းက အကြမ်းဖက်သမားတွေရဲ့ စီစဉ်တိုက်ခိုက်မှုကြောင့် လူပေါင်း ၁၀၁ ဦး အနည်းဆုံး သေဆုံးခဲ့ပြီး ၂၈၇ ဦးကျော် ဒဏ်ရာရထားတယ်လို့ နယူးဒေလီမြို့ကနေ ဗွီအိုအေသတင်းထောက် အန်ဂျနာ ပတ်စ်ရစ်ချာ(Anjana Pasricha) က သတင်းပေးပို့ခဲ့ပါတယ်။ မွမ်ဘိုင်းမြို့က ဈေးအကြီးဆုံး ဇိမ်ခံဟိုတယ် နှစ်ခုဖြစ်တဲ့ တာ့ခ်ျ မဟာ (Taj Mahal) ဟိုတယ်နဲ့ အိုဘရိုင်း (Oberoi) ဟိုတယ်တွေမှာ အကြမ်းဖက် သမားတွေက ဓားစာခံလုပ် သိမ်းယူထားတာကိုကယ်တင်ဖို့ အခု ကြာသပတေးနေ့ အစောပိုင်းကပဲ နယူးဒေလီကနေ မွမ်ဘိုင်းက အယောက် ၂၀၀ ပါတဲ့ ကွန်မန်ဒိုအဖွဲ့တခု ချက်ချင်းရောက်လာပါတယ်။ စစ်သားတွေဟာ အဲဒီဟိုတယ်တွေကို ၀ိုင်းရံထားပါတယ်။

ကွန်မန်ဒိုတွေ ဟိုတယ်တွေထဲ ၀င်ရာက်ချိန်မှာပဲ အပြင်မှာတော့ ပစ်ခတ်သံတွေ တချက်တချက် ကြားနေရ ပါတယ်။ ဗုဒ္ဓဟူးနေ့ နှောင်းပိုင်းက လက်ပစ်ဗုံးတွေနဲ့ ပစ်ခတ်တိုက်ခိုက်ရာမှာ ဒီဟိုတယ်နှစ်ခုဟာလည်း ပစ်မှတ်ဖြစ်ခဲ့ပါတယ်။ အဲဒီအချိန်ကတည်းက ဟိုတယ် အတွင်းပိုင်းထဲမှာ နိုင်ငံခြားသားတွေရော အိန္ဒိယ နိုင်ငံသားတွေပါ ပိတ်မိနေခဲ့ပါတယ်။ အထဲမှာပိတ်မိနေသူတွေ အရေအတွက် ဘယ်လောက်ရှိ သလဲဆိုတာတော့ အတိအကျ မသိရပါဘူး။ ဒီဟိုတယ်နှစ်ခုစလုံးဟာ စီးပွားရေးသမားတွေ၊ နိုင်ငံခြားခရီး သွားလာ သူတွေ အများဆုံး တည်ခိုလေ့ရှိတဲ့ နေရာတွေပါ။

အခု သေနတ်သမားတွေက ဓားစာခံလုပ်ထားတဲ့အထဲမှာ နိုင်ငံခြားသားတွေလည်း ပါဝင်တယ်လို့ ယူဆရ ပါတယ်။ ညကတော့ တာ့ခ်ျမဟာ ဟိုတယ်မှာ အကြမ်းဖက်သမားတွေ လက်ပစ်ဗုံးနဲ့ ပစ်ခတ်တိုက်ခိုက် တာကြောင့် အဆောက်အဦး အစိတ်အပိုင်းအချို့ မီးသင့်ခဲ့ပါတယ်။ အဲဒီကနေ လူအတော်များများကို တညပေါက်လုံး မီးသတ်သမားတွေက ကယ်ထုတ်ခဲ့ကြပါတယ်။
တာ့ခ်ျဟိုတယ်ထဲမှာ လူတွေပိတ်မိနေတဲ့ အထဲက တချို့ကတော့ ပြင်ပသတင်းထောက် တွေနဲ့ ဖုန်းလိုင်း တွေက တဆင့် အဆက်အသွယ် လုပ်နိုင်ခဲ့ပါတယ်။

"ပြီးခဲ့တဲ့ ၁၅ မိနစ်လောက်အထိ ကျနော့်အခန်းနား လှေကားမှာ ပစ်ကြခတ်ကြပါတယ်။ မောင်းပြန်သေနတ် တွေနဲ့ပါ။ ဟိုတယ်အုပ်ချုပ်ရေးပိုင်းက အတော်လေးကို ကျနော့်အတွက် လုပ်ပေးခဲ့ပါတယ်။ ကျနော်တို့ကို မီးတွေပိတ်ထားဖို့ ပြောတယ်။ လိုက်ကာတွေချထားဖို့ မှာတယ်။ အထဲမှာပဲနေပြီးတော့ တံခါးခေါက်လာရင် ပြန်မဖြေဖို့၊ မဖွင်ပေးဖို့ မှာပါတယ်။"
အိန္ဒိယနိုင်ငံရဲ့ အငယ်တန်း ပြည်ထဲရေးဝန်ကြီး ရှရီပရာကေ့ရှ် ဂျေဆွယ်လ်(Sri Prakash Jaiswal) ကတော့ အခုအကြမ်းဖက်မှုဟာ အတော်လေးကို အစီအစဉ်တကျ လုပ်ခဲ့တာဖြစ်ပြီး ဒါဟာ အိန္ဒိယနိုင်ငံမှာ အဆိုးဆုံး ထဲက တခုဖြစ်တယ်လို့ ပြောပါတယ်။
"အခု အကြမ်းဖက်တိုက်ခိုက်မှုဟာ စစ်ပွဲတခုသဘော အစိုးရအနေနဲ့ မြင်ထားပြီး ဒါကိုစစ်ပွဲတပွဲ ရင်ဆိုင် တိုက်ခိုက်သလိုမျိုး ကိုင်တွယ်ဖြေရှင်းသွားမယ်" လို့ သူက ဟင်ဒီစကားနဲ့ ပြောသွားတာပါ။

မွမ်ဘိုင်းမြို့တွင်းမှာတော့ လူတွေ အိမ်အပြင်မထွက်ကြဖို့ ရဲက တိုက်တွန်းထားတာမို့ မွမ်ဘိုင်းမြို့ တမြို့လုံး ကတော့ လုံးဝ ငြိမ်သက်ခြောက်ကပ်နေပါတယ်။ စတော့ခ်ဈေးကွက်ကိုလည်း ပိတ်ထားရပါတယ်။ အာဏာပိုင်တွေအဖို့တော့ အိန္ဒိယနိုင်ငံသမိုင်းမှာ အဆိုးဆုံးတခုလို့ ပြောရမယ့် ဒီအကြမ်းဖက်မှုနဲ့ လုံးပမ်းနေရပါတယ်။ အခုသေဆုံး သွားတဲ့အထဲမှာတော့ မွမ်ဘိုင်းမြို့ရဲ့ အကြမ်းဖက်မှုဆန့်ကျင်ရေး ရဲအကြီးအကဲ တဦးနဲ့ အနည်းဆုံး ရဲတပ်သား ၁၁ ဦး ပါဝင်ပါတယ်။

မွမ်ဘိုင်းမြို့အစွန်ပိုင်းမှာ ဗုဒ္ဓသာသနာပြု ဦးဂိုအင်ဂါကျောင်းတိုက် ရှိလေတော့ မွမ်ဘိုင်းမြို့ဟာ မြန်မာ နိုင်ငံသားတွေ အ၀င်အထွက်ရှိတဲ့ မြို့တမြို့လည်း ဖြစ်ပါတယ်။ အဲဒီရောက်နေတဲ့ မြန်မာနိုင်ငံသားတွေ အခြေအနေကတော့ အခုအချိန်အထိ အားလုံး အေးအေးချမ်းချမ်း ပါပဲလို့ ဦးဂိုအင်ကာကျောင်းတိုက်က မစ္စတာဗားမားက ပြောပြပါတယ်။

"ကျနော့် ဓမ္မဂီရိမှာ ရောက်လာတဲ့ အင်္ဂလန်က ယောဂီတွေက ကျန်းကျန်းမာမာပါပဲ။ ပြီးတော့ ဗမာပြည်က ဘုန်းကြီးတပါးလည်း ရောက်တယ်။ သူတို့လည်း ကျန်းကျန်းမာမာပဲ။ အခု ဘုံဘေမှာရောက်နေတယ်။ အပြင်မှာတော့ အခြေအနေ ကောင်းနေတုန်းပဲ။ တကယ်တော့ အဲဒီရပ်ကွက်ကို သွားခွင့်မရှိဘူး၊ ထွက်ခွင့်မရှိဘူး။"

အသွားအလာတွေရော ဘယ်လိုနေပါလဲခင်ဗျ။

"သွားလာနေပါပြီ။ ရထားတွေလည်း ထွက်နေတယ်။ အခု ဗမာပြည်ကရောက်နေတဲ့ ဧည့်သည်တွေက မိုးရီးပနီကနေ မူဂျယားပြည်နယ်ကိုသွားမယ်။ သူတို့ကိုပို့ဖို့အတွက် ကျနော် ဒီဘူတာရုံကို ရောက်နေတယ်။ ဒါ ဘုံဘေဘူတာရုံတခုပါ။"

ဦးဗားမား ဘူတာရုံမှာရောက်တော့ရော ဒီအခြေအနေနဲ့ပတ်သက်လို့ လူတွေက ဘာများ ပြောကြပါလဲ။

"ဘာမှမပြောပါဘူး။ ကျနော် ဘယ်သူနဲ့မှလည်း စကားမပြောရသေးပါဘူး။ ပုလိပ်တွေက နေရာတကာမှာ ရှိနေပါတယ်။"

နောက်ဆုံးအခြေအနေ ဘာများကြားပါသလဲ။ သေနတ်သမားတွေက ဘယ်နေရာမှာ အဓိက နေရာယူ ထားပါလဲ။

"အဓိကကတော့ သူတို့က အိုဘရိုင်းဟိုတယ်ရယ်၊ တာ့ခ်ျဟိုတယ်ရယ်။ အဲဒီနေရာတွေမှာ ပုလိပ်တွေ အများကြီးပဲ။ အဲတော့ ၀င်ခွင့်ထွက်ခွင့် မရှိတော့ဘူး။"

အခု အကြမ်းဖက်သမားတွေရဲ့ တိုက်ခိုက်မှုကြောင့် ရာနဲ့ချီတဲ့ ထိခိုက်ဒဏ်ရာရသူတွေဟာ ဆေးရုံတွေ မှာတော့ ပြည့်နှက်နေပါတယ်။ ဒီအထဲမှာ နိုင်ငံခြားသားတွေလည်း ပါဝင်ပါတယ်။ အခုတိုက်ခိုက်မှုကိုတော့ ဒီကန် မူဂျာဟစ်ဒင် (Deccan Mujahideen) အဖွဲ့က သူတို့လုပ်တာလို့ ကြေညာထားပါတယ်။ ဒီအဖွဲ့ကိုတော့ လူသိနည်းပါတယ်။ မျက်မြင်အချို့ အပြောအရတော့ သူတို့ဟာ အမေရိကန်နဲ့ ဗြိတိန် နိုင်ငံသားတွေကို ပစ်မှတ်ထား ရှာဖွေနေတယ်လို့ ဆိုပါတယ်။

အခုနောက်ဆုံးသိရတဲ့ အခြေအနေအရ သေနတ်သမားတွေ သိမ်းထားတဲ့ ဟိုတယ်နှစ်ခု ထဲက တာ့ခ်ျဟိုတယ်က ဓားစာခံတွေ ပြန်လွတ်လာတယ်လို့ ဆိုပါတယ်။ ဒါပေမယ့် ဟိုတယ်အတွင်းမှာတော့ အကြမ်းဖက်သမားတွေ ရှိနေတုန်းလို့ သိရပါတယ်။ ဟိုတယ် အပြင်ဘက်မှာတော့ ပစ်ခတ်သံတွေ၊ ပေါက်ကွဲသံတွေ တချက်တချက် ကြားနေရတယ်လို့ သိရပါတယ်။

Ref: VOA News