အလုပ်ဖြုတ်ခံရတဲ့ အလုပ်သမား ၅၀ နီးပါးအတွက် ဆန္ဒပြ

2013-05-15

ရန်ကုန်တိုင်း လှိုင်သာယာမြို့နယ်၊ ငွေပင်လယ် စက်မှုဇုန်အတွင်းမှာရှိတဲ့ စံကောင်း ပီနံအိတ် စက်ရုံမှာ အလုပ်သမား ၄၉ ဦးကို အလုပ် ထုတ်လိုက်တဲ့ အတွက် အဲ့ဒီစက်ရုံက အလုပ်သမား ရာနဲ့ချီပြီး စက်ရုံရှေ့မှာ ဆန္ဒပြတောင်းဆိုနေကြပါတယ်။

ဒီကနေ့ဟာ ၄ ရက်မြောက်နေ့အဖြစ် ဆန္ဒပြခဲ့ကြတာဖြစ်ပြီး အလုပ်ဖြုတ် ခံရတဲ့ အလုပ်သမား ၅၀ နီးပါးကို အလုပ်ပြန် ခန့်ဖို့ တောင်းဆို ခဲ့ကြတာလို့ ဆန္ဒပြပွဲမှာ ပါဝင်တဲ့ အလုပ်သမား ကိုယ်စားလှယ် မဥမ္မာဝင်းက RFA ကို ပြောပါတယ်။

“၄၉ ယောက်ကို အလုပ်ဖြုတ်တဲ့ကိစ္စရယ်၊ နောက် တစ်ချက်က နိုင်ငံတော်က ခွင့်ပြုထားတဲ့ သမဂ္ဂ ရှိရဲ့သားနဲ့ သမဂ္ဂကို အသိအမှတ် မပြုပဲနဲ့ သူတို့ လုပ်ချင်တိုင်း လုပ်နေတဲ့ ပုံစံ အဲဒါ သမဂ္ဂကို အသိအမှတ်ပြုဖို့၊ ကြီးကြပ်ရေးက အလုပ်သမားတွေကို မင်းကို အလုပ်ဖြုတ်မယ်၊ မင်းအလုပ် ထွက်ရမယ်၊ မင်းကို အလုပ်ဖြုတ်လိုက်လို့ ငါတို့လျော်ကြေးပေးမယ်၊ အဲလိုမျိုးမ လုပ်ဖို့ကိုလည်း တောင်းဆို ထားပါတယ်၊ ဒီဝန်ထမ်းတွေ အကုန်လုံးကနေ စုပေါင်းတောင်းဆိုမှု ဆိုတာ ဖြစ်လာတာပါ”

ပီနံအိတ် အလုပ်သမားတွေအနေနဲ့ အလုပ်ထုတ်ခံရတဲ့ အလုပ်သမား ၄၉ ဦးကို အလုပ်ပြန်ခန့်ဖို့ အပြင်၊ အခြေခံ လုပ်ခလစာ တိုးပေးရေး၊ လုပ်ငန်းနဲ့ လုပ်သားအင်အား မျှတစွာ ထားရှိပေးဖို့ စတဲ့အ ချက်တွေ အပါအ၀င် ၄၃ ချက်ကို ဖြည့်ဆည်းဆောင်ရွက်ပေးဖို့ တောင်းဆိုနေကြတာပါ။

တရုတ်လူမျိုးတွေနဲ့ ဖက်စပ်လုပ်ကိုင်နေတဲ့ စံကောင်း ပီနံအိတ် စက်ရုံမှာ ပြီးခဲတဲ့ ဧပြီလ ၁၅ ရက်နေ့က အလားတူ ဆန္ဒပြခဲ့ ကြရာမှာ စက်ရုံတွင်း ဆူပူအောင် လှုံ့ဆော်တယ် ဆိုပြီး အလုပ်သမား ၄၉ ဦးကို အလုပ် ထုတ်ပစ်ခဲ့တာလို့ ဆိုပါတယ်။

အလုပ်သမားတွေရဲ့ တောင်းဆိုချက်တွေကို အလုပ်ရှင်နဲ့ အလုပ်သမား ကိုယ်စားလှယ်တွေက လှိုင်သာယာမြို့နယ် အထွေအထွေ အုပ်ချုပ်ရေးမှူး ရုံးခန်းမှာ သုံးပွင့်ဆိုင် ညှိနှိုင်းဆွေးနွေး ခဲ့ကြပေမယ့် အလုပ်ဖြုတ် ခံရတဲ့ အလုပ်သမား ၄၉ ဦး ပြန်လည် ခန့်ထားရေးကို အလုပ်ရှင် ဘက်က ငြင်းဆန် လိုက်တဲ့အတွက် ဒီပြဿနာကို မြို့နယ် ခုံသမာဓိရုံးမှာ ဆက်လက်ဖြေရှင်းဖို့ သဘော တူလိုက်ကြောင်းသိရပါတယ်။

Ref: RFA News