ဧရာဝတီ တိုင်းက ပြည်သူတွေရဲ့ဘက်တော်သား ဗိုလ်ချုပ်ဟောင်း တဦး

မောင်ထက်မွန်

ဖေဖေါ်ဝါရီလ ၈ ရက် ၂၀၁၃

လစ်လပ်နေတဲ့ သာသနာရေးဝန်ကြီးဌာန ၀န်ကြီး အဖြစ် ဧရာဝတီတိုင်းမှ လွှတ်တော် ဥက္ကဋ္ဌ ဦးဆန်းဆင့်ကို ခန့်အပ်ဖို့ ၂၀၁၃ ခုနှစ်၊ ဇန်န၀ါရီလ ၂၂ ရက်နေ့မှာ သမ္မတ ဦးသိန်းစိန်က လွှတ်တော်ကို သ၀ဏ်လွှာပေးပို့ ခဲ့တဲ့အတွက် ပြည်ထောင်စု လွှတ်တော်က ဇန်န၀ါရီလ ၃၁ ရက်နေ့မှာ အတည်ပြုပေးခဲ့ပါတယ်။

ဒါပေမဲ့ ဦးဆန်းဆင့်ကို လွှတ်တော်ဥက္ကဋ္ဌ အဖြစ်နဲ့ သက်တမ်းကုန်တဲ့အထိ ဧရာဝတီ တိုင်းမှာပဲ ဆက်ထားပေးဖို့ ဦးဆန်းဆင့်ရဲ့မဲဆန္ဒနယ်မြေဖြစ်တဲ့ ရေကြည်မြို့နယ် အပါအ၀င် ကျုံပျော်၊ ကန်ကြီးထောင့်၊ ငပုတော၊ ပုသိမ်၊ ငွေဆောင် စတဲ့ဒေသတွေက လယ်သမားတွေ၊ ရေလုပ်သားတွေ၊ ဒေသခံပြည်သူ ၇,၀၀၀ ကျော်က ဇန်န၀ါရီလ ၂၉ ရက်၊ အင်္ဂါနေ့မှာ လက်မှတ်ရေးထိုး တောင်းဆိုခဲ့ကြပါတယ်။

ကျုံပျော်မြို့နယ်က လယ်သမားတွေနဲ့တွေ့ဆုံရာမှာ ဦးဆန်းဆင့်က - “ ကျနော့်ကို လူကြီးအားလုံး နီးပါးက ပြည်ထောင်စု အဆင့် တာဝန် ထမ်းဆောင်ဖို့ လက်ခံ လိုက်ပါလို့ တိုက်တွန်းပါတယ်။ ကျနော် နှစ်သက်တာ ကတော့ အာဏာကို ရရှိတဲ့ အုပ်ချုပ်ရေး အာဏာနဲ့ ဆောင်ရွက်တဲ့ခေါင်းဆောင် မဖြစ်ချင်ပါဘူး။ ကျနော်တို့ မဲဆန္ဒနယ်ပြည်သူတွေရဲ့၊ ကျနော်တို့ တိုင်းဒေသကြီး ပြည်သူတွေရဲ့ ဆန္ဒနဲ့ဆောင်ရွက်တဲ့ခေါင်းဆောင် ဖြစ်ချင်တာ အမှန်ပါပဲ။

အဲတော့ ပြည်သူအများစုက ဒီမှာပဲလုပ်ပါ ဆိုရင် ကျနော် ဒီမှာပဲ လုပ်ပါမယ်။ ဒါမှမဟုတ် ပြည်ထောင်စု အဆင့်မှာ သင့်တော်ပါတယ် လို့ ပြည်သူက သဘောတူရင် ပြည်သူ့ ဆန္ဒအတိုင်း ကျနော် လုပ်ပါ့မယ်” လို့ သူ့ရဲ့ သဘောထားကို ထုတ်ဖော်ပြောဆို ခဲ့ပါတယ်။

အခုလို သမ္မတ ဦးသိန်းစိန်က ဦးဆန်းဆင့်ကို ဧရာဝတီတိုင်း လွှတ်တော် ဥက္ကဋ္ဌ နေရာမှ သာသနာရေး ၀န်ကြီးဌာန ၀န်ကြီး အဖြစ် ပြောင်းရွှေ့ တာဝန်ထမ်းဆောင်စေလိုတဲ့ အပေါ် ဝေဖန်သံ စကားတွေလည်း ထွက်ပေါ် လာခဲ့ပါတယ်။

၂၀၁၂ ခုနှစ် အတွင်းက ဧရာဝတီတိုင်းမှ လွှတ်တော် ဥက္ကဋ္ဌ ဦးဆန်းဆင့်နဲ့ တိုင်းဝန်ကြီးချုပ် ဦးသိန်းအောင်တို့ ကြားမှာ ပဋိပက္ခဖြစ်ခဲ့ ဖူးတာကြောင့် ကြံ့ဖွံ့ပါတီဝင် စစ်ဗိုလ်ချုပ်ဟောင်းများ အချင်းချင်းကြားမှာ နောက်ထပ်ပြဿနာတွေ ပေါ်မလာနိုင်အောင် လူခွဲထုတ်တဲ့ သဘောနဲ့ ဦးဆန်းဆင့်ကို ဧရာဝတီတိုင်းက ဆွဲထုတ်ပြီး၊ ပြည်ထောင်စု အဆင့် ၀န်ကြီးအဖြစ် ကန်တင် လိုက်တာ ဖြစ်တယ်လို့ မြန်မာ့ နိုင်ငံရေး စောင့်ကြည့်လေ့လာသူ တဦးက ဆိုပါတယ်။

သမတ ဦးသိန်းစိန် ဦးဆောင်တဲ့ အရပ်သားတပိုင်း အစိုးရအဖွဲ့နဲ့ လွှတ်တော်အတွင်းမှာ ဗိုလ်ချုပ် ပြုတ်တွေ၊ လက်ရှိ ဗိုလ်ချုပ်တွေနဲ့ ကြံ့ဖွံ့ပါတီတို့က ကြီးစိုး လွှမ်းမိုးထားတဲ့ ဟန်ပြ ဒီမိုကရေစီ ခေတ်ကြီးထဲမှာ ဦးဆန်းဆင့် လို တိုင်းလွှတ်တော် ဥက္ကဌ ဘ၀မှာ ပြည်သူဘက်က ရပ်တည်ပြီး၊ မဟုတ် မခံ တုန့်ပြန်တတ်သူ တဦးကို ပြည်ထောင်စု ၀န်ကြီးတပါး အဖြစ်သို့ တိုးမြှင့် ရွှေ့တင် လိုက်တာဟာ ၂၀၁၂ အောက်တိုဘာ ၁၄ ရက် ညီလာခံမှာ ကြံ့ဖွံ့ပါတီ ဒု-ဥက္ကဌ ဖြစ်လာသူ ဦးဌေးဦး ရဲ့ပယောဂ မကင်းနိုင်ဘူးလို့ သုံးသပ်နေကြသူတွေလည်း ရှိပါတယ်။

သွားလေသူ တပ်ချုပ်ကြီးက တိုင်းဒေသကြီးနဲ့ ပြည်နယ်အစိုးရ ၀န်ကြီးချုပ်နေရာတွေ အားလုံးမှာ တပ်မတော်မှ တိုင်းမှူးဟောင်း ကြံ့ဖွံ့ပါတီဝင် ဗိုလ်ချုပ်ပြုတ်တွေကို နေရာချထားပေးခဲ့တာကြောင့် “ဖွတ် မိချောင်းဖြစ် မြစ် မချမ်းသာ” ဆိုသလို ဖြစ်ခဲ့ရပါတယ်။

အပြောင်းအလဲတွေ စတင် လုပ်ဆောင်နေပါပြီ လို့ သမတ ဦးသိန်းစိန်က ပြောနေပေမဲ့လည်း ဧရာဝတီတိုင်း အတွင်းက ပြည်သူ လူထုတွေမှာတော့ တိုင်းဝန်ကြီးချုပ် ဦးသိန်းအောင်နဲ့ တိုင်းအစိုးရ အဖွဲ့ရဲ့ အုပ်ချုပ်မှု စီမံခန့် ခွဲမှုအောက်မှာ ရှားခဲအင်း ပဋိပက္ခ၊ ကျုံပျော်ပိုင် လှည်းဆိပ် အင်းပြဿနာ အပါအ၀င် သက်ဆိုင်ရာတွေ လက်ဝါးရိုက်ပြီး လက်ဝါကြီး အုပ်ကာ ထင်သလို လုပ်စားနေကြတဲ့ အင်းကိစ္စတွေ၊ အဓမ္မ မြေယာ သိမ်းခံရတဲ့ ကိစ္စတွေ၊ လ၀က ၀န်ထမ်း တချို့ရဲ့ အနိုင်ကျင့် ငွေတောင်းခံရမှုတွေ၊ မတရား အဖမ်းခံရသူ ခံရ၊ အဆမတန် ဒဏ်ရိုက်ခံရသူ ခံနေရတဲ့ တရား စီရင်ရေးဆိုင်ရာ ပြဿနာတွေ၊ မြို့ရွာလုံခြုံရေးနဲ့ တရားဥပဒေ စိုးမိုးရေးကို ထိထိရောက်ရောက် မဆောင်ရွက်ပေးတဲ့ တိုင်းရဲ တပ်ဖွဲ့မှူးရဲ့ စီမံ ခန့်ခွဲမှုပြဿနာတွေကို နဖူးတွေ့ ဒူးတွေ့ ကြုံတွေ့ခဲ့ရပြီး ဒုက္ခဆင်းရဲ မျိုးစုံကို ခံစားနေကြရပါတယ်။

ဒါကြောင့် ၂၀၁၂ ခုနှစ်၊ တနှစ်လုံး ဧရာဝတီတိုင်းအတွင်းမှာ တိုင်း အစိုးရရဲ့ ဖိနှိပ်ခံရသူ ပြည်သူတွေရဲ့ ဆန္ဒပြပွဲတွေနဲ့ သောသောညံ နေရတာဖြစ်ပါတယ်။
“ ကံဆိုးမ သွားရာ မိုးလိုက်လို့ ရွာ ” ဆိုတဲ့ စကားနဲ့ အညီ ၂၀၁၂ ခုနှစ် သြဂုတ်လအတွင်း ဧရာဝတီ တိုင်းဒေသကြီးမှာ ရေကြီးနစ်မြုပ်မှုတွေ ဖြစ်ပေါ်ခဲ့ပါတယ်။ မြို့နယ် (၂၁) မြို့နယ် ရေမြုပ်ပြီး (၈)မြို့နယ်မှာတော့ ဆိုးဆိုးဝါးဝါး ရေကြီး နစ်မြုပ်မှုတွေ ဆုံးရှုံးမှုတွေ ဖြစ်ခဲ့ပါတယ်။ ရေဘေး ဒုက္ခသည် ပြည်သူတွေကို သြဂုတ်လ ၂၅ ရက်နေ့မှာ လွှတ်တော်ဥက္ကဋ္ဌ ဦးဆန်းဆင့်နဲ့ လွှတ်တော် ကိုယ်စားလှယ်တွေက သွားရောက် ဖေးမ ကူညီ ဆောင်ရွက်ပေးခဲ့ကြပါတယ်။ ဒေသ အတွင်း ဖြစ်ပေါ်နေတဲ့ အင်းပြဿနာတွေ အတွက် ဘုံ ငါးဖမ်းကွက် အဖြစ် ရေချိုငါးဖမ်းဥပဒေကို ဧရာဝတီ တိုင်းဒေသကြီး လွှတ်တော်က ပြဋ္ဌာန်းပေးခဲ့ ပါတယ်။ တိုင်း အစိုးရ အဖွဲ့ရဲ့အုပ်ချုပ်ရေး စီမံခန့်ခွဲရေး ဌာနတွေနဲ့ ပြည်သူတွေ အကြားမှာ ပြဿနာ ကြီးထွားနေတဲ့ နယ်မြေတွေ ဆီသို့ လွှတ်တော် ကော်မတီတွေ စေလွှတ်ကာ ကွင်းဆင်းလေ့လာ စုံစမ်းမှုတွေ ပြုလုပ်ပြီး၊ လူထုနစ်နာမှုတွေ မကျေနပ်မှုတွေကို အချိန်နှင့်တပြေးညီ ဖြေရှင်း ဆောင်ရွက်ပေးဖို့ ဥပဒေကိုဖောက်ဖျက် ကျူးလွန်တဲ့ ဌာနဆိုင်ရာများကို အရေးယူဖို့ ကိစ္စရပ်တွေကို လွှတ်တော်မှာ အဆိုတင် ဆုံးဖြတ်ပြီး၊ တိုင်း အစိုးရကို လွှဲအပ်ဆောင်ရွက်စေခဲ့ပါတယ်။

“ ကျွန်တော် ဧရာဝတီတိုင်းသား စစ်စစ်ပါ။ ထို့အတူ ကျွန်တော်တို့ လွှတ်တော် ကိုယ်စားလှယ် များဟာလည်း ဧရာဝတီ တိုင်းသားများ ဖြစ်ပါတယ်။ မိမိ တိုင်းဒေသသားများ ယခုလို ဒုက္ခ ကြုံတွေ့နေရ ချိန်မှာ ကျွန်တော်တို့တတွေ ကူညီဖေးမစောင့်ရှောက် ရတာဟာ ကျွန်တော်တို့တွေရဲ့ ကိုယ့်တိုင်းဒေသအပေါ်မှာ ထားရှိတဲ့ မိသားစုစိတ်ဓါတ်၊ မိသားစု တာဝန်ဝတ္တရားပဲ လို့ ကျနော် ခံယူပါတယ်။ ” လို့ ဦးဆန်းဆင့် က ပြောဆိုခဲ့ပါတယ်။

အခုလို ကြံ့ဖွံ့ပါတီဝင် စစ်ဗိုလ်ချုပ်ဟောင်းများ ဖြစ်ကြတဲ့ တိုင်းလွှတ်တော်ဥက္ကဌနဲ့ တိုင်းအစိုးရ ၀န်ကြီးချုပ်တို့ အကြား တင်းမာမှုတွေ ရှိနေတဲ့အပေါ် ကြံ့ဖွံ့ပါတီ ဗဟို အထွေထွေ အတွင်းရေးမှူး ဦးဌေးဦးက ပါတီ ဦးစီးချုပ်ကိုင်မှုနဲ့ ၀င်ရှင်းရာမှာ ပြေလည်မှုမရဘဲ၊ ပိုမို ရှုပ်ထွေးမှုတွေ ပေါ်ပေါက် လာကာ ဗိုလ်ချုပ် ဟောင်း (၃) ဦးရဲ့ အာဏာပြိုင်ပွဲ ပမာ ဖြစ်လာခဲ့ပါတယ်။ ဦးဆန်းဆင့် ကလည်း လွှတ်တော်အပေါ် အစိုးရ၊ ပါတီနဲ့ ဌာနဆိုင်ရာ များရဲ့ဖိအားပေးမှုတွေ ရှိနေကြောင်း တိုင်းဒေသကြီး လွှတ်တော်မှာကျင်းပတဲ့ သတင်းစာရှင်းလင်းပွဲမှာ ထုတ်ဖော်ပြောဆို ခဲ့ပါတယ်။ “ အင်းနားနေ အင်းရေသောက် ဆိုတဲ့ ရှေးဆိုရိုး စကား ပျောက်အောင် ” လူထုအပေါ် နှိပ်စက်ခဲ့တာတွေကြောင့် ကျွန်တော်တို့လွှတ်တော်ကို ရင်ဖွင့်လာတဲ့ စာတွေကို အစိုးရ အဖွဲ့သို့ အချိန်မီဆောင်ရွက်နိုင်ရန် အကြောင်းကြားပေမဲ့။ လူထုထံက တိုင်စာတွေသာ ထပ်ထပ် တက်လာ တာ တွေ့ရပါတယ်။”

“ လွှတ်တော်က ဥပဒေကို ထမ်းပြီး ပြည်သူ့အကျိုးစီးပွားက လွဲ၍ မည်သည့်အကျိုးကိုမျှ ငဲ့ကွက် စရာ မလိုပါဘူး၊ ဥပဒေပြုပေးလိုက် တဲ့ လွှတ်တော်က မိမိ ဥပဒေကို ထိန်းသိမ်းရမှာပဲ ဆိုတာ ရှင်းလင်းလိုပါတယ် ”
“ လွှတ်တော်ကိုယ်စားလှယ် အဖြစ် အရွေးခံရပြီ ဆိုကတည်းက ယင်း လွှတ်တော်ကိုယ်စားလှယ် ကို ပြည်သူက ပိုင်သွားပြီ ဖြစ်ပါတယ်။ လွှတ်တော်တွင်း ဆောင်ရွက်မှု များဟာ ပြည်သူ့အတွက်ပဲ ဖြစ်ရပါမယ်၊ ပြည်သူတို့စေခိုင်းရာကိုပဲ ဆောင်ရွက်ပေးရမှာ ဖြစ်ပါတယ် ”

“ ပါတီဝင်ဖြစ်လို့ လွှတ်တော်ကိုယ်စားလှယ်ဖြစ်လို့ ၀န်ကြီးချုပ်ဖြစ်လို့ ဆိုပြီး ပါတီကို ငဲ့ညှာတာ လုပ်ရင် ပြည်သူကို ကျေးဇူးကန်းရာ ရောက်သွားနိုင်ပါတယ်” လို့ ဦးဆန်းဆင့်က သူ့ရဲ့ ရပ်တည်ချက် သဘောထားတွေကို ထုတ်ဖေါ်ပြောဆို ခဲ့ပါတယ်။

ဦးဆန်းဆင့်ဟာ စစ်ရာထူးခန့်ချုပ် ဒုတိယဗိုလ်ချုပ်ကြီး အဖြစ်နဲ့ တပ်မတော်မှာ တာဝန်ထမ်း ဆောင်ခဲ့သူ ဖြစ်ပြီး၊ နအဖ စစ်အစိုးရရဲ့ တပ်မတော် ထိပ်ပိုင်းခေါင်းဆောင်များ ထဲမှာ အပါအ၀င် ဖြစ်ခဲ့သူ ဖြစ်ပါတယ်။ ဒါပေမဲ့ ဧရာဝတီတိုင်း လွှတ်တော် ဥက္ကဋ္ဌ ဖြစ်လာချိန်က စလို့ မဲဆန္ဒရှင် ပြည်သူတွေရဲ့ သစ္စာကို စောင့်သိပြီး ဧရာဝတီ တိုင်းဒေသကြီးရဲ့ လွှတ်တော် ဥက္ကဋ္ဌ တာဝန်ကို အကောင်းဆုံး ဆောင်ရွက်ခဲ့တာကြောင့် ဧရာဝတီတိုင်းမှ ပြည်သူတွေရဲ့ အားကိုး ယုံကြည်မှုနဲ့ အတူ လေးစားချစ်ခင်မှုကို ပြန်လည် ရရှိလာသူ ဖြစ်ပါတယ်။

ဒါကြောင့် ဦဆန်းဆင့်ကို စံနမူနာ ပုံခိုင်းပြီး၊ သမတဦးသိန်းစိန် ဦးဆောင်တဲ့ အစိုးရ အဖွဲ့နဲ့ လွှတ်တော်တွင်းမှ အငြိမ်းစား ဗိုလ်ချုပ်ကြီးများ၊ တပ်မတော်မှ ဗိုလ်ချုပ်ကြီးများ အပါအ၀င် မြန်မာ့ တပ်မတော်သား အားလုံး ပြည်သူချစ်တဲ့ မြန်မာ့ တပ်မတော် ဘ၀သို့ ပြန်လည် ရောက်ရှိနိုင်အောင် ပြည်သူ့အရေး အလေးထားကာ ပြည်သူ့အကျိုးကို ဦးထိပ်ပန်ဆင် ဆောင်ရွက်ကြဖို့ လိုပြီ ဖြစ်ကြောင်း တင်ပြလိုက်ရပါတယ်။