စနေနေ့၊ 01 သြဂုတ်လ 2009
၂၀၁၀ ရွေးကောက်ပွဲ မတိုင်မီ ပြည်သူ့စစ်တပ်ဖွဲ့အဖြစ် အသွင်ပြောင်းရန် အပစ်ရပ် သျှမ်းပြည် တပ်မတော် SSA မြောက်ပိုင်း တပ်ဖွဲ့ ဥက္ကဌအား လားရှိုး အခြေစိုက် အရှေ့မြောက်တိုင်း (ရမခ) တိုင်းမှူးက လားရှိုး စစ်တိုင်းရုံးသို့ ထပ်မံခေါ်ယူ တွေ့ဆုံ တိုက်တွန်း ဖိအားပေးခဲ့ကြောင်း မြောက်ပိုင်း သျှမ်းပြည် သတင်းရပ်ကွက်က ဆိုသည်။
“ပြီးခဲ့တဲ့ ၂၇ ရက်နေ့ကပေါ့၊ လားရှိုးတိုင်းမှူး ဆင့်ခေါ်လို့ ဥက္ကဌကြီး စ၀်လွယ်မောဝ် စစ်တိုင်းရုံး ရွှေလီရိပ်သာ အထိ သွားတွေ့ရတယ်၊ ပြည်သူ့စစ်တပ်ဖွဲ့ အဖြစ်ပြောင်းဖို့ ထပ်ပြောတယ် ဆိုဘဲ”- ဟု လားရှိုး စစ်တိုင်းရှုံး အရာရှိများ နှင့် နီးစပ်သည့် အသိုင်းအ၀ိုင်းက ဆိုသည်။
ထိုတွေ့ဆုံပွဲ၌ လားရှိုးစစ်တိုင်းမှူး ဗိုလ်ချုပ်အောင်သန်းထွဋ်က အပစ်ရပ် SSA မြောက်ပိုင်း ဥက္ကဌအား ပြည့်သူ့စစ် တပ်ဖွဲ့ အဖြစ် အသွင်ပြောင်းရန် အဆင်သင့် ဖြစ်မဖြစ် မေးမြန်းခဲ့ကြောင်း၊ စ၀်လွယ်မောဝ်ကလည်း သျှမ်းပြည် တပ်မတော် အပစ်ရပ် တပ်ဖွဲ့ အနေဖြင့် ဂျွန် ၂၃ ရက်နေ့က ဗိုလ်ချုပ်ရဲမြင့်ထံ အခြေအနေမှန် အားလုံး တင်ပြခဲ့ပြီး ဖြစ်ကြောင်း၊ အောက်ခြေ အဆင့် လူငယ် အရာရှိများ/ တပ်မှူးများက အစိုးရ၏ စေတနာအပေါ် နားလည်ရန် အချိန်ယူ ရှင်းပြနေရကြောင်း၊ အလယ် အလတ် စစ်ရေး ခေါင်းဆောင် အများစု လက်မခံနိုင် သေးသဖြင့် ဘာမျှ မတတ်နိုင်ကြောင်း၊ ရွေးကောက်ပွဲပြီး၍ ဒီမိုကရေစီ အစိုးရသစ်ပေါ် ပေါက်လာမှသာလျှင် အသွင်ပြောင်းရေး ကိစ္စ ပြန်လည် ဆွေးနွေး စေလိုကြောင်း၊ စိတ်ရှည်သီးခံရန် မေတ္တာရပ်ခံ လိုကြောင်း ပြောကြားခဲ့သည်ဟု ဆို၏။
“စ၀်လွယ်မောဝ်ကအဲဒီလို လှည့်ပတ်ငြင်းတော့ တိုင်းမှူးကြီးက ဘာမှ ဆက်မဆွေးနွေး တော့ဘူး၊ အခြား အပစ်ရပ်အဖွဲ့ တော်တော် များများကလဲ လက်ခံဘူး ကျနော်တို့လဲ လက်မခံနိုင် သေးဘူးလို့ အဓိပ္ပါယ်ပေါက်တဲ့ အချက် အလက်တွေလဲ ပြောတယ်”- ဟု အဆိုပါ ပုဂ္ဂိုလ်က သျှမ်းသံတော်ဆင့်သို့ ပြောပြပါသည်။
(စစ်အစိုးရ၏ နိုင်ငံတော်ပုန်ကန်မှုအပြင် အခြားအမှုပေါင်း များစွာ စွပ်စွဲမှုဖြင့် ခန္တီးထောင်၌ ထောင်ဒဏ် ၁၀၆ နှစ် ပြစ်ဒဏ် ကျခံရသူ) SSA ခေါင်းဆောင် ဗိုလ်ချုပ်ဆေထဲန် နှင့် န၀တ အစိုးရတို့ ၁၉၈၉ စက်တင်ဘာ ၂၄ ရက်က - ၁။ နှစ်ဦးနှစ် ဘက် အပစ်အခတ် ရပ်စဲထားရန်၊ ၂။ ဒေသဖွံ့ဖြိုးရေး လုပ်ငန်းများကို နှစ်ဖက် ပူးပေါင်း လုပ်ဆောင်ရန်၊ ၃။ နိုင်ငံရေး ကိစ္စများကို နောင် တက်လာမည့် ဒီမိုကရေစီ အစိုးရသစ်နှင့်သာ ပြောဆို ဆွေးနွေးရန် စသည့် သဘောတူညီချက် များဖြင့် အပစ်ရပ်ခဲ့ကြောင်း - ဆိုပါသည်။
ဤအချက်အလက်များကို အပစ်ရပ် သျှမ်းပြည် တပ်မတော် တပ်မှူးများ၊ အရာရှိများ ခိုင်ခိုင်မြဲမြဲ စွဲကိုင် ကျင့်သုံးသောကြောင့် ပြည်သူ့စစ် အသွင် ကူးပြောင်းရေးကို လက်ခံလာအောင် စည်းရုံးနိုင်ရန် များစွာ အခက်အခဲ ရှိကြောင်းလည်း ၂၃/၆/၀၉ စရဖ အရာရှိချုပ် ဗိုလ်ရဲမြင့်ထံ ပေးစာ၌ အတိအလင်း ဖေါ်ပြခဲ့သည်ဟု ဆို၏။
Ref: သျှမ်းသံတော်ဆင့်
Monday, August 3, 2009
ပြည်သူ့စစ် အသွင်ပြောင်းရန် SSA-N ခေါင်းဆောင် ထပ်မံ ခေါင်းခါ
Subscribe to:
Post Comments (Atom)
Posts
0 comments:
Post a Comment