လက်ပံတောင်းတောင် သပိတ် ဖြိုခွဲရာ တားမြစ်လက်နက်သုံးခဲ့

ကိုကျော်ထင်
14.02.2013

လက်ပံတောင်းတောင် သပိတ်စခန်းတွေကိုဖြိုခွဲရာမှာ သုံးတဲ့လက်နက်ဟာ ဂျနီဗာ သဘော တူညီချက်အရ မသုံးစွဲရ လို့ တားမြစ်ထားတဲ့ စစ်သုံး လက်နက်ဖြစ်တဲ့ White Phosphorus မီးစုန်းငွေ့ လက်ပစ်ဗုံးဖြစ်တယ်လို့ မြန်မာနိုင်ငံရှေ့နေများ ကွန်ယက်နဲ့ အမေရိကန် အခြေစိုက် Justice Trust တို့ရဲ့ စုံစမ်း စစ်ဆေးရေး အစီရင်ခံစာက ဆိုပါတယ်။
အပြည့်အစုံကို အစီရင်ခံစာနဲ့ ပတ်သက်တဲ့ သတင်းစာ ရှင်းလင်းပွဲသို့် တက်ရောက် သတင်းယူခဲ့တဲ့ VOA မြန်မာပိုင်း သတင်းထောက် ကိုကျော်ထင်က တင်ပြပေးထားပါတယ်။

မြန်မာနိုင်ငံရှေ့နေများကွန်ယက်နဲ့ အမေရိကန်အခြေစိုက် Justice Trust တို့ဟာ အစီရင်ခံစာပြုစုဖို့ ကွင်းဆင်း စစ်ဆေးမှုတွေ အပါဝင် လက်နက် အမျိုးအစား စစ်ဆေးဖို့အတွက် ALS ဓါတု သရုပ်ခွဲ အုပ်စုနဲ့ လက်နက် ကျွမ်းကျင်သူတွေကိုပါ ချဉ်းကပ် ခဲ့တယ်လို့ ရန်ကုန်မြို့ တော်ဝင်နှင်းဆီ စားသောက်ဆိုင်မှာ ဒီကနေ့ပြုလုပ်တဲ့ သတင်းစာ ရှင်းလင်းပွဲမှာ ပြောဆို ပါတယ်။ ရှေ့နေများကွန်ယက် တာဝန်ရှိသူ ဦးလှထွန်းက ရဲတပ်ဖွဲ့ကသုံးတဲ့ မီးစုန်းငွေ့ဗုံးဟာ ကန့်သတ်ထားတဲ့ လက်နက်အမျိုးအစားဖြစ်တယ်လို့ပြောပါတယ်။

“ဂျနီဗာသဘောတူညီချက်အမှတ် (၃)အရ အရပ်သားပြည်သူလူထု အပေါ်မှာ လုံးဝ သုံးစွဲခြင်း မပြုရ ဆိုပြီးတော့ တားမြစ် ပိတ်ပင်ထားတဲ့ လက်နက် အမျိုးအစားဖြစ်ပါတယ်၊ အဲဒါကြောင့်မို့ ဒီအချက်က အင်မတန်မှ တရားဥပဒေ စိုးမိုးရေးနဲ့ တရားမျှတရေးမှာ အင်မတန်မှ အရေးကြီးတဲ့ ဥပဒေဆိုိင်ရာ အချက်အလက်လည်းဖြစ်နေပါတယ်။”

ဒီလက်နက်ဟာ စစ်မြေပြင်သုံး လက်နက်အမျိုးစားဖြစ်ပြီး ၁၉၆၀ ခုနှစ်နောက်ပိုင်းမှာ အမေရိကန်ပြည်ထောင်စုက ထပ်မံ မထုတ်လုပ်ပေမယ့် တခြားနိုင်ငံတွေက အလွယ်တကူ ထုတ်လုပ်နိုင်တယ်လို့ Justice Trust အဖွဲ့ကပြောပါတယ်။ တကယ်လို့ ဒီလိုလက်နက်တွေ သုံးမယ် ဆိုရင်လည်း အထူးလေ့ကျင့်ပြီးသား တပ်ဖွဲ့တွေက စစ်မြေပြင်မှာပဲ သုံးကြတာကြောင့် မြန်မာနိုင်ငံ ရဲတပ်ဖွဲ့မှာ ဒီလက်နက်မျိုး သုံးစွဲခွင့် ရှိနေတာဟာ မေးခွန်း တစ်ခုဖြစ်တယ် လို့လည်း Justice Trust အဖွဲ့ တာဝန်ရှိသူ ပါမောက္ခ Roger Normand က သတင်းစာ ရှင်းလင်းပွဲမှာပြောသွားပါတယ်။

“ကြေးနီစီမံကိန်းအတွက် ဒေသခံတွေကို လျှော်ကြေးပေးပြီးအတင်းအကျပ် လယ်မြေ သိမ်းယူမှုကလည်း ဥပဒေ ချိုးဖေါက်တာဖြစ်တယ်လို့ အစီရင်ခံစာမှာ ပါရှိပါတယ်။ ပဋိညာဉ် ဥပဒေနဲ့ ပတ်သက်ပြီး တရားလွှတ်တော်ရှေ့နေကြီးဦးအောင်သိန်းက ခုလိုပြောပါသေးတယ်။

“တရားမျှတမှုမရှိတဲ့ ပဋိညာဉ် ဟာ ပဋိညာဉ် အက်ဥပဒေအရ ပဋိညာဉ် မမြောက်ဘူးလို့ ဆိုရမှာဖြစ်ပါတယ်၊ အဲ့တော့ ပဋိညာဉ် ဥပဒေအရ ကျနော်တို့ ထိမ်ချန်မှုတွေ၊ သြဇာလွှမ်းမိုးမှုတွေ၊ ငြိမ်းခြောက်မှုတွေ၊ မတရား နစ်နာစေရန် တဘက်သတ် ဆုံးရှုံးစေမှုတွေ၊ ပဋိညာဉ် ပြုလုပ်တဲ့ သဘော သဘာဝကို ရှင်းလင်းနား လည်နိုင်အောင် ဖေါ်ပြထားခြင်း မရှိရင် ပဋိညာဉ် တွေဟာ ပျက်ပျယ်တဲ့ ပဋိညာဉ် ဖြစ်တယ်၊ အဲဒီ ပဋိညာဉ် တွေကို အာမခံတဲ့သူတွေရဲ့ တာဝန်ရှိတယ်ဆိုတဲ့ ရေးသားဖေါ်ပြထားတာတွေ့ရပါတယ်။”

ဒါ့အပြင် ငြိမ်းချမ်းစွာစုရုံးခွင့်ကို ရဲတပ်ဖွဲ့က အကြိမ်ကြိမ်တားမြစ်ပယ်ချခြင်းနဲ့ အကြမ်းဖက် လူစုခွဲခြင်းဟာ ဥပဒေနဲ့ကိုက်ညီမှုရှိ- မရှိ ဆိုတာလည်း ရှေ့နေများ ကွန်ယက်က ထောက်ပြထားပါသေးတယ်။

အစိုးရက ဖွဲ့ပေးတဲ့လက်ပံတောင်းတောင် စုံစမ်းစစ်ဆေးရေးကော်မရှင်ဟာ သပိတ်တွေ စခန်းဖြိုခွဲမှုကို စစ်ဆေးပိုင်ခွင့် မရှိဘူးလို့ သိရပါတယ်၊ ဒေါ်အောင်ဆန်းစုကြည် ဦးဆောင်တဲ့ကော်မရှင်နဲ့ ရှေ့နေများ ကွန်ယက် တို့ စုံစမ်း စစ်ဆေးနိုင်ခွင့် မတူဘူးလို့ ဦးလှထွန်းက ဆက်ပြောပါသေးတယ်။

“ကျနော်တို့မိတ်ဆွေရှေ့နေကြီးရှင်းပြချင်တာက လက်ပံတောင်းတောင် စုံစမ်းစစ်ဆေးရေး အဖွဲ့က လွှတ်တော်က ဖွဲ့ပေးတဲ့ ကော်မရှင်ဖြစ်ပြီးတော့ ကျနော်တို့ အဖွဲ့ကတော့ ဒေါ်အောင်ဆန်းစုကြည်နဲ့ အခါအားလျော်စွာ ဦးသိန်းစိန် တို့ပြောကြားခဲ့တဲ့ အတိုင်းပါပဲ လွတ်လပ်စွာ CSO အနေနဲ့ ပါဝင်ဆောင်ရွက်ခြင်းဖြစ်ပါတယ်။”

ဒီအစီရင်ခံစာကို ဒေါ်အောင်ဆန်းစုကြည်နဲ့ လူ့အခွင့်အရေး အထူးကိုယ်စားလှယ် မစ္စတာ ကင်တားနား တို့ဆီလည်း ပေးပို့ ထားတယ်လို့သိရပါတယ်။ ဥပဒေ ချိုးဖေါက်သူတွေကို လက်ပံတောင်းတောင်ဒေသခံတွေက တရားစွဲမယ် ဆိုရင်လည်း ရှေ့နေများ ကွန်ယက်က ကူညီ သွားမယ်လို့ သိရပါတယ်။

Ref: VOA News