ပြည်ထောင်စုကြီး တည်တံ့ဖို့ အားလုံးတာဝန် ရှိကြောင်း ၁၀ ပါတီ ပြောကြား

2013-02-12

ဒီမိုကရေစီမိတ်ဆွေပါတီတွေ ပူးပေါင်းပြီး ဒီကနေ့မှာ ကျရောက်တဲ့ ၆၆ နှစ်မြောက် ပြည်ထောင်စုနေ့ အခမ်း အနားကို ရန်ကုန်မြို့၊ ဘိုကလေးဈေး လမ်းမပေါ်မှာရှိတဲ့ YWCA ခန်းမ မှာ ဖေဖေါ်ဝါရီလ ၁၂ ရက် ဒီကနေ့ နေ့လည်ပိုင်းက ကျင်းပခဲ့ပါတယ်။

လက်ရှိနိုင်ငံတော်အာဏာကို ရယူထားတဲ့ ခေါင်းဆောင်တွေအပါအဝင် တပ်မတော် ခေါင်းဆောင်တွေ အနေနဲ့ ပြည်ထောင်စုကြီး တည်တံ့ ခိုင်မြဲအောင်ဆောင်ရွက်ဖို့ တာဝန်ရှိတယ်လို့ ရခိုင် တိုင်းရင်းသားများ တိုးတက်ရေးပါတီ အထွေထွေ အတွင်းရေးမှူး ဦးဦးလှစောက အခမ်းအနားမှာ ပြောကြားခဲ့ပါတယ်။

ဒီကနေ့ ထုတ်ပြန်တဲ့ ဒီမိုကရေစီမိတ်ဆွေ ၁၀ ပါတီရဲ့ ပူးတွဲကြေညာချက်ထဲမှာ ပြည်တွင်း လက်နက်ကိုင် ပဋိပက္ခတွေ ပြီးဆုံးပြီး နိုင်ငံရေးအဖွဲ့အစည်းတွေ အားလုံးပါဝင်တက်ရောက်နိုင်မယ့် ပြည်ထောင်စုငြိမ်းချမ်းရေး ညီလာခံတစ်ရပ်ကို အစိုးရအနေနဲ့ ဦးဆောင်ကျင်းပပေးဖို့အတွက် တိုက်တွန်းထားပါတယ်။

ဒါ့အပြင် ဒီကနေ့အခမ်းအနားမှာ နိုင်ငံရေးပါတီတွေနဲ့ ၈၈မျိုးဆက်ကျောင်းသားများ အဖွဲ့က ပြည်ထောင်စုနေ့ အထိမ်းအမှတ် သ၀ဏ်လွှာတွေ ပေးပို့ခဲ့ပါတယ်။

ဒီအခမ်းအနားကို ဒီမိုကရေစီမိတ်ဆွေ ၁၀ ပါတီက ကိုယ်စားလှယ်တွေ၊ ပါတီဝင်တွေနဲ့ တခြားနိုင်ငံရေး ပါတီတွေ၊ ၈၈မျိုးဆက်ကျောင်းသား အဖွဲ့တွေနဲ့ လူမှုရေးအဖွဲ့အစည်းတွေ အသီးသီး တက်ရောက် ခဲ့ကြပါတယ်။

Ref: RFA News