တာချီလိတ်မှာ မူးယစ်ဆေး၊ ဒေါ်လာနဲ့ လက်နက် ဖမ်းမိ

2012-11-07

ရှမ်းပြည်နယ် အရှေ့ပိုင်း ထိုင်း - မြန်မာ နယ်စပ်ရှိ တာချီလိတ်မြို့မှာ လူသတ်မှုနဲ့ပတ်သက်ပြီး မသင်္ကာဖြစ်သူ တစ်ယောက်ရဲ့နေအိမ်ကို မြို့နယ် ရဲတပ်ဖွဲ့ ဝင်တွေက ဝင်ရောက် ရှာဖွေခဲ့ရာ ရာဘ ခေါ် စိတ်ကြွ ဆေးပြား အလုံးရေ ၅ သိန်းကျော်နဲ့ သေနတ် တစ်လက် အပါအ၀င် သိန်းနဲ့ချီတဲ့ နိုင်ငံခြားငွေတွေ ဖမ်းဆီး ရမိခဲ့တယ်လို့ သိရပါတယ်။

တာချီလိတ်မြို့မှာ လွန်ခဲ့တဲ့ တစ်လခန့်က ဖြစ်ပေါ်ခဲ့တဲ့ လူသတ်မှုနဲ့ပတ်သက်ပြီး မသင်္ကာသူ တစ်ဦးကို တာချီလိတ် ရဲစခန်းမှာ ခေါ်ယူ စစ်ဆေးခဲ့ပြီး သူနေထိုင်ရာ ဆန်စိုင်းရပ်ကွက်ရှိ နေအိမ်ကို တနင်္ဂနွေနေ့ နေ့ခင်းပိုင်းမှာ ရုတ်တရက် ၀င်ရောက် ရှာဖွေခဲ့ရာမှာ အခုလို ဖမ်းဆီး ရရှိတာလို့ မြို့နယ်အုပ်ချုပ်ရေး အာဏာပိုင်နဲ့ နီးစပ်သူ မြို့ခံတဦးက ပြောပါတယ်။

ဖမ်းဆီးခံရသူဟာ စိုင်းဝန်းတစ်ဆိုသူ အသက်၃၈ နှစ်အရွယ်ဖြစ်ပြီး သူ့ကို မူးယစ်ဆေးဝါးမှု၊ တရားမဝင် လက်နက် ကိုင်ဆောင်မှု၊ နိုင်ငံခြားငွေ လက်ဝယ် ထားရှိမှုတွေနဲ့ တရားစွဲဆို ထားကြောင်း သိရပါတယ်။

သူ့နေအိမ်ကိုဝင်ရောက်ရှာဖွေစဉ်မှာ အမေရိကန်ဒေါ်လာတွေနဲ့အတူ ရေခဲသေတ္တာ၊ ရုပ်မြင် သံကြားစက် ၊ မီးအားမြှင့်စက်၊ ရာဘ ခေါ် မြင်းဆေး ထုတ်လုပ်စက် အပါအဝင် ကလေးကစားစရာ စတဲ့ လျှပ်စစ်သုံးပစ္စည်း အမြောက်အများ သိမ်းဆည်း ရရှိတယ်လို့လည်း မြို့ခံနောက်တစ်ဦးက ပြောပါတယ်။

ရှမ်းပြည်နယ် တာချီလိတ်မြို့နယ်မှာ မကြာခဏ မူးယစ် စိတ်ကြွဆေးနဲ့ လက်နက်ပစ္စည်းတွေ ဖမ်းဆီး ရရှိလေ့ ရှိပြီး ပြီးခဲ့တဲ့ သောကြာနေ့ ကလည်း RPJ ဗုံးသီး ၃ လုံးနဲ့ လက်နက်ကျည်ဆံ တစ်ချို့ ဖမ်းဆီး ရရှိကြောင်းသိရပါတယ်။

Ref: RFA News