အင်အား(၆.၈)ရစ်တာ စကေးရှိငလျှင်ကြောင့် သေဆုံးပျောက်ဆုံး သူများရှိ

2012-11-11

နိုဝင်ဘာလ ၁၁ ရက် မြန်မာစံတော်ချိန် (၇)နာရီ ( ၄၃) မိနစ်က ရွှေဘို ငလျင်တိုင်းတာရေး စခန်းရဲ့ အရှေ့မြောက်ဘက် (၃၅) မိုင် အကွာနေရာကို ဗဟိုပြုပြီး၊အင်အား (၆.၈) ရစ်ခ်ျတာ စကေးရှိတဲ့ ငလျှင် တစ်ခု လှုပ်ခတ်သွားခဲ့ပါတယ်။

ငလျှင်ဒဏ်ကြောင့် မန္တလေးတိုင်းဒေသကြီး၊ စဥ့်ကူးမြို့နယ်၊ သပိတ်ကျင်းမြို့နယ်၊ စစ်ကိုင်းတိုင်းဒေသကြီး၊ ကန့်ဘလူ မြို့နယ်၊ ရွှေဘို မြို့နယ်နဲ့ ကျောက်မြောင်း စတဲ့ဒေသတွေမှာ လူ အသေအပျောက် ၊ အိုးအိမ် အပျက်အစီးတွေ ရှိခဲ့ပါတယ်။

ငလျှင် လှုပ်ခတ်မှုဒဏ်ကို ပြင်းထန်စွာ ခံစားခဲ့ရတဲ့ စဥ့်ကူးမြို့နယ်က အခြေအနေနဲ့ ပတ်သက်လို့ မြို့နယ် NLD အတွင်းရေးမှူး ဦးမောင်မောင်ဝင်းက RFA ကို ခုလိုပြောပါတယ်။

"စဥ့်ကူးမြို့နယ်မှာ ဆိုရင် ခက်သင်၊ ဘိုသာကုန်းရွာ အထိနာဆုံးခင်ဗျ။ ခက်သင်ရွာနားမှာရှိတဲ့ ခက်သင်တောင်က တစ်ခြမ်းလုံးပြိုကျသွားတယ်။ ဘုရားကျောင်းတွေ၊ ဘုန်းကြီးကျောင်း တော်တော်များများရှိတယ်။ ဘုန်းကြီးကျောင်းတွေ အဓိကပျက်စီးသွားတယ်။ သံဃာတော် တစ်ပါးက ပျံလွန်တော်မူသွားတယ်။ တစ်ပါးက အခြေအနေတော်တော်ဆိုးနေတယ်။ သုံး ပါးလောက်က ဆေးရုံတင်ထားရတယ်။ ရတနာသိင်္ဃတံတားကျတော့ အဲဒီမှာသံဘောင်ပြုတ်ကျပြီးတော့ ဆောက်လုပ်ရေးလုပ်သား (၄) ဦး သံဘောင်နဲ့အတူ မြစ်ထဲထိုးကျသွားတာ အဲဒီ(၄) ဦးကပျောက်ဆုံးနေတယ်။ အလောင်းလည်းမတွေ့ဘူး။ ဒီတံတားခွင်မှာ လုပ်နေတဲ့ ဆောက်လုပ်ရေးလုပ်သား (၁၀) ဦးလောက်က ဆေးရုံတင်ထားရတယ်ခင်ဗျ။ ပြင်းထန်တဲ့လူနာတွေကတော့ မန္တလေးဆေးရုံကြီးကို သွားကြတယ်။"

သပိတ်ကျင်းမြို့နယ်ထဲက ကွင်းသုံးဆယ် ရွှေလုပ်ကွက်မှာ ရွှေတူးဖော်နေကြသူ (၁၁)ဦးဟာ ငလျှင်ဒဏ်ကြောင့် ရွှေတွင်းထဲမှာ ပိတ်မိနေတယ်လို့ သိရပါတယ်။ စစ်ကိုင်းတိုင်းဒေသကြီး၊ ကန့်ဘလူမြို့ပေါ်မှာတော့ တစ်စုံတစ်ရာ ထိခိုက်ပျက်စီးမှု မရှိခဲ့ပေမယ့် မလယ်တိုက်နယ်၊ ရေရှင်၊ ဇီးကုန်း၊ သပြေသာ၊ ထန်းတပင်စတဲ့ နယ်တွေဘက်မှာတော့ လူနာဆောင်၊ မူလတန်းကျောင်းဆောင်၊ ရှေးဟောင်းစေတီပုထိုး၊ အိုးအိမ် တိုက်တာ၊ ဘုန်းတော်ကြီးကျောင်း စတာတွေ ပျက်စီးခဲ့ပါတယ်။
ဒီကနေ့ မနက်က လှုပ်ခတ်သွားတဲ့ ငလျှင်ဒဏ်ကြောင့် ထိခိုက် ဒဏ်ရာရသူတွေကို ရွှေဘိုဆေးရုံ၊ ကျောက် မြောင်းဆေးရုံ၊ စဥ့်ကူးဆေးရုံ တွေကို တင်ပို့ကုသနေကြပြီး ပြင်းထန်သူတွေကိုတော့ မန္တလေးပြည်သူ့ ဆေးရုံကြီးကို သယ်ဆောင်ကုသမှုခံယူနေကြပါတယ်။

Ref: RFA News