ကျောက်မီးသွေးသုံး စက်ရုံကြောင့် ဒေသခံများ ပြောင်းကြမည်

ကွန်းချမ်း
အင်္ဂါနေ့၊ မတ်လ ၂၀ ရက် ၂၀၁၂

စံခလပူရီ (မဇ္ဈိမ) ။ ။ တနင်္သာရီတိုင်း၊ ကော့သောင်းမြို့တွင် ဆောက်လုပ်ပြီးစီးလုနီးပါး ဖြစ်သည့် ကျောက်မီးသွေး လောင်စာသုံး လျှပ်စစ် ဓါတ်အားပေး စက်ရုံ လည်ပတ်ပါက အိုးအိမ်စွန့်ကာ ပြောင်းရွှေ့ကြမည် ဖြစ်ကြောင်း စက်ရုံ အနီး နေထိုင်သူတို့က ပြောသည်။

စက်ရုံမှ ဖြစ်ပေါ်လာမည့် ဆိုးကျိုးကြောင့် ကျန်းမာရေး ထိခိုက်မည်ကို စိုးရိမ်သည့်အတွက် အေးရိပ်ငြိမ် ရပ်ကွက်မှ စက်ရုံအနီး နေထိုင်သည့် အိမ်ခြေ ၅ဝ ခန့်မှ မိသားစု ၇ဝ ခန့် ပြောင်းရွှေ့ရန် ပြင်ဆင်ကြခြင်း ဖြစ်သည်။

“ကျောက်မီးသွေးနဲ့ ပတ်သက်ပြီးတော့ အသားအရေ ယားယံတာတွေ၊ အသက်ရှု ကျပ်တာတွေ လောက်ပဲ ကျနော်တို့ သိပါတယ်။ တခြား ဘယ်လို အန္တရာယ် ရှိမယ်ဆိုတာ ကျနော်တို့ အကြောင်းစုံတော့ မသိဘူးပေါ့။ စက်ရုံ လည်ရင်တော့ ကျနော်တို့ အားလုံးက ဒီနေရာကနေ ပြောင်းရွှေ့ကြမှာပဲ” ဟု စက်ရုံအနီး နေထိုင်သူတဦးက ပြောသည်။

အခြား တဦးကလည်း “ကျနော်တို့ ကျောက်မီးသွေး စက်ရုံနားမှာပဲ နေတယ်။ ကျနော်တို့ ရပ်ကွက်က အကုန်လုံး ဒီစက်ရုံကို ကန့်ကွက် ကြတယ်။ ကျနော်တို့ သိတာက ကျောက်မီးသွေးနဲ့ ပတ်သက်ပြီးတော့ ကျနော်တို့အတွက် အန္တရာယ် ဖြစ်လာမယ့် ဟာကိုပဲ စိုးရိမ်တယ်” ဟု ပြောသည်။

၎င်းတို့အနေနှင့် စက်ရုံလည်ပတ်ခြင်း ကိစ္စကို ကန့်ကွက်နေသည့် ဒီမိုကရက်တစ်ပါတီ (မြန်မာ) DPM နှင့် ပူးပေါင်း လုပ်ဆောင် သွားမည်ဟု ဆိုသည်။

လျှပ်စစ်ဓါတ်အား ၈ မဂ္ဂါဝပ် ထုတ်လွှတ်မည့် အေးရိပ်ငြိမ် နှင့် ရွှေပြည်သာ လူနေရပ်ကွက်ကြားရှိ ထိုစက်ရုံသည် လူနေအိမ်နှင့် ပေ ၅ဝ ခန့်သာ ကွာဝေးပြီး မီးခိုး ခေါင်းတိုင်မှာလည်း ပေ ၄၀ ခန့်သာ မြင့်ကာ စက်ရုံနှင့် နှစ်ဖာလုံကျော် တွင် ကော့သောင်းမြို့မှ သောက်သုံးရေ အဖြစ် ရယူနေသည့် ရေလှောင်ကန်လည်း ရှိသည်။

ယခင် တနင်္သာရီတိုင်း ဝန်ကြီးချုပ် ဦးခင်ဇော် လက်ထက်က ခွင့်ပြုချက် ရရှိပြီး ‘သန်းဖြိုးသူ’ သတ္တုတူးဖေါ်ရေး လုပ်ငန်း ကုမ္ပဏီ လိမိတက် ပိုင်သည့် ထိုစက်ရုံကို ၂၀၁၁ ခု နှစ်လယ်ခန့်တွင် စတင် တည်ဆောက်ခဲ့ရာ ၉၅ ရာနှုန်း ဆောက်လုပ် ပြီးစီးပြီ ဖြစ်သည်။

ထိုစက်ရုံကို ဧပြီလ ၁ဝ ရက်နေ့တွင် စမ်းသပ်ကာ ဇွန်လတွင် စတင် လည်ပတ်မည် ဖြစ်သည့်အတွက် ဒေသခံများ အနေနှင့် စက်ရုံမှ ဖြစ်ပေါ် လာမည့် ဆိုးကျိုးများကို သိရှိနားလည်ရန် အတွက် မတ်လ ၂၂ ရက်နေ့တွင် ပညာပေး လက်ကမ်း စာစောင်များ စတင် ဖြန့်ဝေသွားမည်ဟု DPM ပါတီ တနင်္သာရီတိုင်း စည်းရုံးရေးမှူး ကိုသန်းထွန်းက ပြောသည်။

၎င်းတို့ အနေနှင့် ဒေသခံများနှင့် ပူးပေါင်းပြီး လက်ကမ်းစာစောင် တသောင်းကို ကော့သောင်းမြို့အနှံ့ ဖြန့်ဝေ သွားမည့် အပြင် ရပ်ကွက် တိုင်းတွင်လည်း နံရံကပ် စာစောင်များ ကပ်သွားမည်ဟု ဆိုသည်။

စာဖြန့်ဝေခွင့် ရရန်အတွက် မတ်လ ၁၆ ရက်နေ့က ‘ကျောက်မီးသွေး စက်ရုံနှင့် စက်လျဉ်း၍ ဆိုးကျိုးများ ဖော်ပြထား သည့် စာရွက် စာတမ်းများ ဝေမျှခြင်း ကိစ္စ’ အကြောင်းအရာဖြင့် တိုင်းဝန်ကြီးချုပ်ရုံးသို့ လိပ်မူပြီး တင်ပြ ထားသော်လည်း အကြောင်း မပြန်လာ သေးကြောင်းလည်း သူက ပြောသည်။

“ဝန်ကြီးချုပ် ခွင့်မပြုလည်း ကျနော်တို့ ဇွတ်ဝေမှာပဲ။ ဘာဖြစ်လို့လဲဆိုတော့ သူတို့ကို ကျနော်တို့ အသိပေး ထားပြီးပြီလေ။ ကော့သောင်း ပြည်သူ လူထုကလည်း ကျောက်မီးသွေး စက်ရုံရဲ့ ကောင်းကျိုး၊ ဆိုးကျိုးကို လုံးဝ မသိသေးဘူး” ဟု ကိုသန်းထွန်းက ပြောသည်။

စက်ရုံ တည်ဆောက်နေစဉ် လွန်ခဲ့သည့် ၂၀၁၀ ခုနှစ် အောက်တိုဘာလ အတွင်းတွင် တကြိမ်၊ ၂၀၁၂ ခုနှစ် မတ်လ ၁ ရက်နေ့တွင် တကြိမ် ကော့သောင်း DPM ပါတီက စက်ရုံ ဆောက်လုပ်ခြင်း ကိစ္စကို ကန့်ကွက်ခဲ့သော်လည်း ဆက်လက် ဆောက်လုပ်လျက် ရှိပြီး ရပ်ကွက် အတွင်းတွင်လည်း ဓါတ်တိုင်များ စိုက်ထူရန်အတွက် တွင်းများ တူးဖော်လျက် ရှိသည်ဟု ဆိုသည်။

စက်ရုံ လည်ပတ်ရန်အတွက် လိုအပ်သည့် ကျောက်မီးသွေးကို တနင်္သာရီတိုင်း၊ ကော့သောင်းခရိုင်၊ ဘုတ်ပြင်း မြို့နယ်၊ လေညာ သစ်တောကြိုးဝိုင်း အတွင်းမှ ထုတ်ယူကာ လိုအပ်မည့် ရေကို ထိုင်း-မြန်မာနယ်စပ်အဖြစ် သတ်မှတ်ထားသည့် ပါချန်မြစ်မှ စုတ်ယူ သုံးစွဲမည် ဖြစ်သည်။

ဒေသခံများနှင့် ပညာရှင်များ၏ ကန့်ကွက်ပြောဆိုမှုကြောင့် အီတာလျံ-ထိုင်း ဖွံ့ဖြိုးရေး ကုမ္ပဏီက အကောင် အထည် ဖော်မည့် ထားဝယ် အထူး စီးပွားရေးဇုန် စီမံကိန်း အတွင်းရှိ မဂ္ဂါဝပ် ၄,၀၀၀ ကျောက်မီးသွေးသုံး လျှပ်စစ် ဓာတ်အားပေး စက်ရုံကို ဇန်နဝါရီ လဆန်းတွင် အစိုးရက ဆောက်လုပ်ခွင့် မပြုဘဲ ရန့်တန့်ပေးခဲ့သည်။

ကျောက်မီးသွေး လောင်စာသုံး ဓာတ်အားပေး စက်ရုံမှ ကာဗွန်ဒိုင်အောက်ဆိုဒ်ဓာတ်ငွေ့၊ အက်ဆစ်မိုးကို ရွာသွန်း စေနိုင် သည့် ဆာလဖာဒိုင် အောက်ဆိုဒ် ဓါတ်ငွေ့၊ အသက်ရှူ လမ်းကြောင်းတွင် ကင်ဆာရောဂါ ဖြစ်စေနိုင်သည့် အမှုန်အမွှား အများအပြား ထွက်လာနိုင်သည့် အပြင် ကာဗွန်မို နောက်ဆိုဒ်၊ သောက်သုံးရေနှင့် ပင်လယ်ရေထုကို ညစ်ညမ်းစေနိုင် သည့် ပြဒါး၊ စိန် ဆိုသည့် အာစင်းနစ်ဓါတ် စသည့် လေထု၊ ရေထုနှင့် မြေထုကို ညစ်ညမ်းစေနိုင်သည့် ဓာတ်ငွေ့ပေါင်း များစွာ ထွက်ရှိလာနိုင်ကြောင်း သဘာဝ ပတ်ဝန်းကျင် ထိန်းသိမ်းရေး ပညာရှင်များက ပြောသည်။

Ref: မဇ္ဈိမ