မိုင်ပေါင်း ၈၀၀ ကျော် ချီတက် လမ်းလျှောက်သူတွေ ပဲခူးမှာ တားဆီးခံရ

2013-01-22

ကချင်ပြည်နယ်က စစ်ပွဲတွေ ရပ်တန့်ပေးဖို့ လမ်းလျှောက်ဆန္ဒပြ သူတွေကို ဒီကနေ့ ဇန်နဝါရီလ ၂၂ ရက်နေ့ မနက်ပိုင်းက ပဲခူးတိုင်းဒေသကြီး အဝင်မှာ ပဲခူးတိုင်း အာဏာပိုင်တွေ က ရှေ့ဆက် သွားခွင့် မပေးပဲ တားဆီး ပိတ်ပင်ခဲ့ပါ တယ်။

ငြိမ်းချမ်းရေးအတွက် လမ်းလျှောက်သူတွေ သွားခွင့်မပေးဖို့ တားဆီး ခဲ့တာနဲ့ ပတ်သက်ပြီး အဲဒီ လမ်းလျှောက် ဆန္ဒပြရာမှာ ပါဝင်သူ ဦးအောင်မြင့် က RFA ကို အခုလို ပြောပါတယ်။

"ရန်ကုန်တိုင်းနဲ့ ပဲခူးတိုင်း အစပ်ရောက်တဲ့အခါကျတော့ ပဲခူးတိုင်းအာဏာပိုင်တွေကတားတယ်၊ ကျွန်တော် ကြားတာကတော့ ရန်ကုန်တိုင်း မှာပဲ ခွင့်ပြုချက်ယူပြီးတော့ ပဲခူးတိုင်းမှာ ခွင့်ပြုချက် မယူထားတဲ့ အတွက်လို့ ကြားတယ်၊ သူတို့တားတဲ့ တပ်ဖွဲ့ဝင် အင်အား ကတော့ ၃၀ လောက် ရှိတယ် ခင်ဗျ"

လမ်းလျှောက်ပွဲကို ဦးဆောင်တဲ့ ရဟန်း၊ သံဃာတော်တွေနဲ့ သက်ဆိုင်ရာ အာဏာပိုင်တွေ နေ့လည် ပိုင်းမှာ တွေ့ဆုံဆွေးနွေးပြီးနောက်မှာတော့ ငြိမ်းချမ်းရေး လိုလားသူတွေရဲ့ လမ်းလျှောက်ပွဲကို ဆက်သွားခွင့်ပြုလိုက်ပေမယ့် ငြိမ်းချမ်းရေး အလံတွေကိုတော့ ကိုင်ဆောင်ခွင့် မပေးခဲ့ဘူးလို့ သိရပါတယ်။

ကချင်ပြည်နယ်က စစ်ပွဲတွေ ရပ်တန့်ပေးဖို့ တောင်းဆိုကြတဲ့ ငြိမ်းချမ်းရေးလိုလားသူ လူဦးရေ ၈၀ လောက်ဟာ တရုတ်-မြန်မာ နယ်စပ် အနီးမှာ ရှိတဲ့ ကေအိုင်အို ဌာနချုပ် လိုင်ဇာမြို့အထိ မိုင်ပေါင်း ၈၀၀ ကျော် ချီတက်လမ်းလျှောက် ဆန္ဒ ထုတ်ဖော်ကြမှာဖြစ်ပြီး ဒီလမ်းလျှောက် ပွဲကို မနေ့က မနက်ပိုင်းကစလို့ ရန်ကုန်မြို့တော် ခန်းမရှေ့ကနေ စတင် ထွက်ခွာခဲ့ကြတာဖြစ်ပါတယ်။

Ref: RFA News