သမ္မတရဲ့အမိန့်အတိုင်း ကာကွယ်ရေး ဦးစီးချုပ်က လိုက်နာဆောင်ရွက်မည်

2013-01-19

လဂျားယန်ဒေသအပါအ၀င် ကချင်ပြည်နယ်နဲ့ ရှမ်းပြည်မြောက်ပိုင်းက အစိုးရစစ်တပ်နဲ့ ကေအိုင်အေ ပဋိပက္ခဖြစ်နေတဲ့ နေရာ အားလုံးမှာ ခုခံ ကာကွယ်ရန်မှ အပ ပစ်ခတ် တိုက်ခိုက်မှုများ မပြုလုပ်ရေးဆိုတဲ့ နိုင်ငံတော် သမ္မတရဲ့ ညွှန်ကြားချက် အတိုင်း ကာကွယ်ရေး ဦးစီးချုပ်က လိုက်နာဆောင်ရွက် သွားမှာဖြစ်တယ်လို့ သမ္မတရဲ့ ပြောရေးဆိုခွင့်ရှိသူ ပြန်ကြားရေး ၀န်ကြီးဌာန ဒုတိယ၀န်ကြီး ဦးရဲထွဋ်က RFA ကို ပြောပါတယ်။

"တပ်မတော်ကာကွယ်ရေးဦးစီးချုပ်က ပြောတာသည် ကချင်ပြည်နယ်နဲ့ရှမ်းပြည်နယ် မြောက်ပိုင်းက လက်ရှိကေအိုင်အေနဲ့ ပဋိပက္ခဖြစ်နေတဲ့ အချိန်မှာ သမ္မတကြီးရဲ့ မူအတိုင်း လိုက်နာဆောင်ရွက် သွားမယ်လို့ ပြောတာဖြစ်ပါတယ်"

အစိုးရသတင်း ထုတ်ပြန်ရေးအဖွဲ့ရဲ့ ဇန်န၀ါရီ ၁၈ရက်နေ့စွဲနဲ့ ထုတ်ပြန်ချက်မှာ ကချင်ပြည်နယ် လဂျားယန်ဒေသမှာ အစိုးရ စစ်တပ်ရဲ့ စစ်ဆင်ရေးတွေ ရပ်ဆိုင်းမယ်လို့ ရေးသား ထားတာနဲ့ ပတ်သက်လို့ RFA ရဲ့ မေးမြန်းချက်ကို သမ္မတရဲ့ပြောရေးဆိုခွင့် ရှိသူ ဦးရဲထွဋ်က အခုလိုပြောလိုက်တာ ဖြစ်ပါတယ်။

ကေအိုင်အို ကချင်လွတ်မြောက်ရေးအဖွဲ့ကလည်း အစိုးရရဲ့ ထိုးစစ်ဆင်နေတာတွေကို လဂျားယန်ဒေသ တစ်ခုတည်း မှာပဲ ရပ်ဆိုင်း လိုက်တာမဟုတ်ဘဲ ကချင်ပြည်နယ်ဒေသ အနှံ့ အစိုးရရဲ့ ထိုးစစ်ဆင်လှုပ်ရှားမှုတွေ လျော့ချသင့်တယ်လို့ ကြေညာချက် တစ်စောင် ဒီကနေ့ ထုတ်ပြန် လိုက်ပါတယ်။

Ref: RFA News