လစ်ဗျား ဆန္ဒပြပွဲအတွင်း အစိုးရ အဆောက်အဦးတချို့ မီးရှို့ခံရ

တနင်္လာ, 21 ဖေဖော်ဝါရီ 2011

လစ်ဗျားနိုင်ငံမှာ သမ္မတ မိုမာ ကဒါဖီ (Moammar Gadhafi) အပေါ် ဆန့်ကျင် ဆန္ဒပြမှုတွေ တိုးမြင့် လာနေတာနဲ့ အတူ လုံခြုံရေးတွေ၊ အစိုးရ လိုလား သူတွေနဲ့ ဆန္ဒပြသူတွေ ကြားမှာ အဓိကရုဏ်း ဖြစ်ပွားပြီး အစိုးရ အဆောက်အဦး တချို့လည်း မီးလောင် ကျွမ်းခဲ့တယ်လို့ ထရီပိုလီ မြို့တော်က မျက်မြင်တွေက ပြောပြပါတယ်။

တနင်္လာနေ့မှာတော့ နိုင်ငံရဲ့ ပါလီမန် အဆောက်အဦးနဲ့ အဆင့်တူတဲ့ ပြည်သူ့ခန်းမ အပါအ၀င် အစိုးရ အဆောက်အဦး တော်တော်များများ မီးလောင် ကျွမ်းခဲ့တယ်လို့ မျက်မြင်တွေက ပြောပါတယ်။

တနင်္ဂနွေနေ့က သမ္မတ ကဒါဖီကို သစ္စာခံသူတွေ နေရာယူထားတဲ့ အချက်အချာ ကျတဲ့ မြို့လယ်ကို ဆန္ဒပြ သူတွေက ဝင်ရောက် သိမ်းပိုက်ဖို့ ကြိုးစားစဉ်မှာ သေနတ်နဲ့ ပစ်ခတ်မှုတွေ ရှိခဲ့ပါတယ်။ ဆန္ဒပြမှု အတွင်း မြို့တော်ထဲမှာ ပထမဆုံး သေနတ် ပစ်သံတွေ ကြားရတာလည်း ဖြစ်ပါတယ်။

ဆန္ဒပြသူတွေကို လူစုခွဲတဲ့ အနေနဲ့ ရဲတွေက မျက်ရည်ယို ဗုံးတွေနဲ့ ပစ်ခဲ့တယ်လို့လည်း မျက်မြင်တွေက ပြောပါတယ်။

နိုင်ငံရဲ့ ဒုတိယ အကြီးဆုံးမြို့ဖြစ်တဲ့ ဘန်ဂါဇီမြို့မှာတော့ ဆန္ဒပြသူတွေက မြို့ကို သူတို့ ထိန်းချုပ် ထားနိုင်ပြီလို့ ဆိုပြီး ဒီနေ့မှာ အောင်ပွဲ ခံနေကြပါတယ်။

သမ္မတ ကဒါဖီရဲ့သား ဆာအိဖ် အယ်လ်-အစ်စ်လာမ် ကဒါဖီ (Saif al-Islam Gadhafi) ကလည်း တနင်္ဂနွေနေ့က ရုပ်မြင် သံကြားပေါ်ကနေ သူ့ဖခင်ဟာ စစ်တပ်ရဲ့ ထောက်ခံမှုနဲ့ တိုင်းပြည်ကို ဆက်လက် အုပ်ချုပ် နေဆဲပဲလို့ ပြောကြား ခဲ့ပါတယ်။

တနင်္လာနေ့ကစပြီး နိုင်ငံအရှေ့ပိုင်းမှာ စခဲ့တဲ့ ဆန့်ကျင် ဆန္ဒပြမှုတွေဟာ ပြည်ပရောက် လစ်ဗျားတွေ၊ အစ္စလာမ် ဝါဒီတွေ၊ နိုင်ငံခြား သတင်း မီဒီယာတွေ၊ မူးယစ်ဆေး စွဲနေသူနဲ့ ဒုစရိုက် သမားတွေကြောင့် လို့လည်း ဆိုပါတယ်။

ဒါပေမဲ့ လစ်ဗျား လုံခြုံရေးတွေဘက်ကလည်း ဒီလို အခြေအနေမျိုး ကိုင်တွယ် ဖြေရှင်းဖို့ ကျကျနန လေ့ကျင့် ထားတာမျိုး မရှိတဲ့ အတွက် ဆန္ဒပြ သမားတွေ အပေါ် နှိမ်နင်းတဲ့ နေရာမှာ အမှားတချို့ လုပ်ခဲ့တယ်လို့ သူက ရုပ်မြင်သံကြား မိန့်ခွန်းမှာ ထည့်ပြော ခဲ့ပါတယ်။

အခုလို သမ္မတ ကဒါဖီကို ဆန့်ကျင် ဆန္ဒပြမှုတွေဟာ မြို့တော် ထရီပိုလီ အထိ ပျံ့နှံ့ ရောက်ရှိနေတဲ့ အတွက် လစ်ဗျားမှာ ရှိနေတဲ့ ဥရောပ သမဂ္ဂ အဖွဲ့ဝင် နိုင်ငံတွေက နိုင်ငံသားတွေကို ကယ်ထုတ် နိုင်ရေးအတွက် ဘရပ်ဆဲလ်မှာ ဆွေးနွေး နေကြပါတယ်။


Ref: VOA News