သမ္မတဟောင်းမူရှရက်ဖ်ကို ဖမ်းဝရမ်းထုတ်

စနေ, 12 ဖေဖော်ဝါရီ 2011

ဝန်ကြီးချုပ်ဟောင်း ဘနာဇီယာဘူတို (Benazir Bhutto) ကို လုပ်ကြံ သတ်ဖြတ်မှုနဲ့ ပတ်သက်တယ် ဆိုပြီး ပါကစ္စတန် သမ္မတဟောင်း ပါဗက်ဇ် မူရှရက်ဖ် (Pervez Musharraf) ကို အကြမ်းဖက်မှု တားဆီးရေး ဆိုင်ရာ တရားရုံးက ဖမ်းဆီးဖို့ ၀ရမ်း ထုတ်ထားတယ်လို့ ပါကစ္စတန် အာဏာပိုင်တွေက ပြောဆို လိုက်ပါတယ်။

မစ္စတာ မူရှရက်ဖ်ကို ဖေဖော်ဝါရီလ ၁၉ ရက်နေ့မှာ တရားရုံးကို လာဖို့ တရားသူကြီး ရာနာနီဆာအာမတ် (Rana Nisa Ahmad) က စနေနေ့က ဆင့်ခေါ်ပြီး ဒီဖမ်းဆီးမိန့်ကို ထုတ်ခဲ့တယ်လို့ ဆိုပါတယ်။ မစ္စတာ မူရှရက်ဖ်ဟာ အင်္ဂလန်နိုင်ငံမှာ သွားရောက် နေထိုင်ခဲ့တာ ၂ နှစ် ကျော်ကြာပြီ ဖြစ်ပါတယ်။

ရရယ်ပင်းဒီး (Rawalpindi) မြို့မှာ လူထုနဲ့ တွေ့ဆုံပွဲ လုပ်နေစဉ် ၂၀၀၇ ခုနှစ် ဒီဇင်ဘာ ၂၇ ရက်နေ့က အသေခံဗုံးခွဲ တိုက်ခိုက်မှုနဲ့ သေနတ်ပစ် တိုက်ခိုက်မှု တွေကြောင့် မစ္စ ဘူတို လုပ်ကြံ ခံ့ရပါတယ်။ နိုင်ငံလုံးဆိုင်ရာ ရွေးကောက်ပွဲတွေမှာ အတိုက်အခံ ပါကစ္စတန် ပြည်သူ့ ပါတီခေါင်းဆောင် အဖြစ်နဲ့ မစ္စဘူတို က ပါဝင်ယှဉ်ပြိုင်ခဲ့တာ ဖြစ်ပါတယ်။ သူမရဲ့ ခင်ပွန်း အလီဇာဒါရီ (Ali Zardari) က ဒီပါတီကို ဆက်ခေါင်းဆောင်ပြီး ရွေးကောက်ပွဲမှာ အနိုင်ရခဲ့လို့ လက်ရှိသမ္မတ ဖြစ်လာခဲ့တာ ဖြစ်ပါတယ်။


Ref: VOA News