Monday, 17 January 2011
ထပ်မံတိုးချဲ့မည့် အရှေ့အလယ်ပိုင်းတိုင်းသို့ ပို့ရန် သျှမ်းပြည်မြောက်ပိုင်း သိန္နီနှင့် လားရှိုး ရှိနယ်မြေခံ တပ်ရင်းများမှ တပ် အင်အားများ ရွေးထုတ် စုဆောင်း ထားပြီးဖြစ်ကြောင်း သိန္နီ သတင်းရပ်ကွက် ထံမှ ကြားသိရသည်။
“ဒီလကုန်ရင် စစ်တိုင်းချုပ် ဒု ဗိုလ်ချုပ်ကြီးအောင်သန်းထွဋ် တောင်ကြီးကို လာထိုင် တော့မှာတဲ့။ အရှေ့ အလယ်ပိုင်း ပါရင် စစ်တိုင်း ၄ တိုင်းရဲ့ တိုင်းချုပ်ကြီး ဖြစ်တော့မှာပေါ့ ” ဟု စစ်တပ် အသိုင်းအ၀ိုင်းနှင့် နီးစပ်သည့် လားရှိုးဒေသခံ အမျိုးသမီး တဦးက သျှမ်းသံတော်ဆင့်သို့ ပြောပြသည်။
၁ တပ်ရင်း အင်အား ၆၀ ဖြင့် သိန္နီ စကခ ၁၆ လက်အောက်ခံ ခလရ ၆၉၊ ခလရ ၂၄၀၊ ၂၄၁၊ လားရှိုး ခမရ ၅၀၇ နှင့် ခလရ ၆၈ နှင့် ၄၁ တို့အပြင် အင်္ဂျင်နီယာတပ် ၉၀၂ ထဲမှလည်း ရွေးထုတ် ထားကြောင်း သိရသည်။
“ဆန္ဒအပြည့်ဝမ်းသာအယ်လဲနဲ့ သွားတဲ့ အရာရှိ တယောက်မှမရှိဘူး။ အရှေ့အလယ်ပိုင်းတိုင်း ထပ်တိုးမယ် ဆိုတာက တိုက်ဖို့ ခိုက်ဖို့ ရှေ့တန်းတက်ဖို့ အဓိကဘဲ ဆိုတော့ သေမှာ ကြောက်ကြတာလေ။ တချို့တောင်မှ ထွက်ခွင့် နားခွင့် တောင်းထားတယ် လို့တောင် ကြားရတယ်” ဟု အဆိုပါ အမျိုးသမီး နှင့် အမျိုးတော်စပ်သည့် စစ်တပ် အရာရှိကတော် တစ်ဦးကလည်း ပြောပြသည်။
ယခင်သျှမ်းပြည်တပ်မတော် ကေဒါဟောင်းတဦးက-“ စစ်တိုင်းတတိုင်းဆိုရင် အမှန်က ၂၅ တပ်ရင်း ရှိရ မယ် ။ အခုက သိန္နီနဲ့ လားရှိုးဘဲ ကြားရသေးတယ်။ အင်အားပြည့်ဖို့ တပ်သားသစ် ကောက်မယ့် ပြသနာ ရှိလာဦးမယ်။ ဒါပေမယ့် အရင်က အခြေအနေ ကို ပြန်ကြည့်ရင် နအဖ စစ်တပ်က ဘယ်လောက်ဘဲ တပ်သားသစ်တွေ ထပ်ကောက်ကော် တပ်အင်အားက သိသိသာသာ တိုးလာတာ မတွေ့ရဘူး။ ဘာလို့လဲ ဆိုတော့ လတိုင်း ထွက်ပြေးနေကြတာလေ။ နှစ်တိုင်း ထောင်ချီ ရှိတယ်လို့ သိရတယ်” ဟု သျှမ်းသံတော်ဆင့်အား ပြောပြသည်။
လားရှိုးအခြေစိုက် ယခင် ခလရ ၆၈ တွင် အိမ်ထောင်သည်လိုင်း စစ်တန်းလျား ၂၅ ခု အတွင်း လူပြည့်ခဲ့ ဖူးသော်လည်း ယခုအခါ လူနေသည့် အိမ်ထောင်သည်လိုင်း ၂-၃ ခုသာ ကျန်တော့ကြောင်း အဆိုပါ တပ်ရင်း၌ နေထိုင်ခဲ့ဖူးသူ တပ်မိသားစုဝင် တဦးက ပြောသည်။
“ ၁၉၉၀ လောက်တုန်းက ကျနော် ၆၈ မှာနေဖူးတယ်။ အောက်လိုင်းလို့ခေါ်တဲ့ အကြပ်တပ်သား အိမ်ထောင်သည်လိုင်း စစ်တန်းလျား ၂၅ တန်းက အပြည့်ဘဲ။ တတန်းလျားမှာ ၈ ခန်းရှိတယ်။ အပေါ်လိုင်းလို့ခေါ်တဲ့ အရာရှိလိုင်းတော့ လူမပြည့်ဘူး။ ၂၀၀၅ - ၂၀၀၆ တုန်းက တပ်ထဲ ပြန်သွားလည်တော့ လူပြည့်တဲ့ အောက်လိုင်းက ၂ တန်းဘဲ ကျန်တော့တယ်။ ကျန်တာ တွေ လူမရှိလို့ စုတ်ပြတ်သပ် ပေါက်ပြဲကုန်ပြီ။ စစ်ရေး လေ့ကျင့်မှု သင်တန်းလဲ ၁၉၈၈ အရေးအခင်း မတိုင်ခင် တုန်းက နှစ်တိုင်း တနှစ် ၂ သုတ် ရှိတယ်။ အဲ့တုန်းက တသုတ်မှာလူ ၃၀၀ လောက်နဲ့ သင်တန်းကာလ ၆ လ ကြာတယ်။ ၁၉၉၀ လောက် ရောက်တော့ သင်တန်းမှာ လူ ၆၀ လောက်ဘဲ ရှိတော့တယ်။ သင်တန်းကာလလဲ ၃ လဘဲ လုပ်တော့တယ်။ ၁၉၉၉ မှာတော့ စစ်ရေးလေ့ကျင့်မှု (ရဲဘော်သစ်သင်တန်း) ဆိုတာ မရှိတော့ဘူး” - ဟု ၎င်း၏ ကိုယ်တွေ့ ဖြစ်ရပ်ကို ပြောပြသည်။
Ref: သျှမ်းသံတော်ဆင့်
Tuesday, January 18, 2011
တိုးချဲ့မည့် အရှေ့အလယ်ပိုင်းတိုင်းသို့ ပို့ရန်နယ်မြေခံ တပ်ရင်းများမှ စစ်အင်အား အချို့ ရွေးထုတ်နေ
Subscribe to:
Post Comments (Atom)
Posts
0 comments:
Post a Comment