ထပ်မံတိုးချဲ့မည့် စစ်တိုင်းရုံးသစ် ယခုလကုန်ရုံးစိုက်နိုင်ရန်ပြင်ဆင်

Wednesday, 19 January 2011

တိုးချဲ့မည့် အရှေ့အလယ်ပိုင်းတိုင်းသစ်သတင်းနှင့် အတူသျှမ်းပြည်စစ်တိုင်း ၃ တိုင်းအတွင်းရှိ ဒေသခံ တပ်ရင်း အသီးသီးမှ တတိုင်းလျှင် အင်အား အယောက် ၃၀၀ ရွေးထုတ်၍ ယခုလကုန်ပိုင်း ပို့ဆောင် တပ်ချ နိုင်ရန် ပြင်ဆင် နေကြောင်းတောင်ကြီး သတင်းရပ် ကွက်က ဆိုသည်။

စစ်တိုင်း ၁ တိုင်းလျှင် အင်အား ၃၀၀ ဖြင့် သျှမ်းပြည်စစ်တိုင်း ၃ တိုင်းမှ ရရှိလာမည့် စုစုပေါင်း အင်အား ၉၀၀ နှင့် နေပြည်တော်မှ အင်အား ၁၀၀ ဖြည့်ဆည်းပေးမည်ဖြစ်ပြီး အင်အား ၁၀၀၀ ဖြင့် အခြေချ ရုံးစိုက်ဖို့ ရှိကြောင်း စစ်တိုင်းရုံးနှင့် နီးစပ်သည့် တောင်ကြီး ဒေသခံတဦးက သျှမ်းသံတော်ဆင့်သို့ ပြောပြသည်။

“စကခလက်အောက်ခံတပ်တွေတော့ မကောက်ဘူးပေါ့။ တပ်ရင်းအသီးသီးက စိတ်ချရတဲ့ လူရင်းတွေ၊ အကြပ်တပ်မှူး ငယ်တွေလောက်ဘဲ ရွေးတယ်လို့ သတင်း တွေ ထွက်နေတယ်။ အရှေ့ အလယ်ပိုင်းတိုင်းလို့ နာမည် ထွက်ပေမယ့် အဲဒီ စစ်ဌာနချုပ်ရဲ့ တရားဝင် အဆင့်နဲ့ နာမည်ကိုတော့ မသိရသေးဘူး။ တိုင်း ၄ တိုင်းကို စစ်တိုင်းချုပ် ဒု ဗိုလ်ချုပ်ကြီး အောင်သန်းထွဋ်က ကိုင်မယ်လို့လဲ ကြားနေရတယ်။” ဟု၎င်းကပြောသည်။

စစ်တိုင်းထပ်မံတိုးချဲ့မည့်သတင်းသိထားသော သျှမ်းပြည်အရှေ့ပိုင်းသားတချို့ နအဖက စစ်သားသစ် ကောက်ယူမည့် အရေး တွေးပူကာ မိမိတို့ သားသမီးများအား တခြားသို့ ပို့ဆောင်ရန် စီစဉ်နေကြကြောင်း သိရသည်။

မကြာသေးမီက ကျိုင်းတုံမြို့ ဆင်ခြေဖုံးတ၀ိုက် အခြေချနေထိုင်သည့် မိသားစုတခုက-“ ရွာမှာနေတုန်းက ၀ ၊ သျှမ်း၊ ပြည်သူ့စစ် တပ်ဖွဲ့တွေ စစ်သား ကောက်တာကို ရှောင်ရတယ်။ အခု မြို့ပေါ် ရောက်လာတာ စိတ်အေးရပြီ မှတ်တယ်။ ဘယ်ဟုတ်လို့လဲ။ ဗမာစစ် တပ်က စစ်မှုမထမ်း မနေရ ဥပဒေ အကောင်အထည် ဖော်တော့မယ် ဆိုတော့ ကျနော်တို့ ခလေးတွေ ထိုင်းကို ပို့လိုက်မှဘဲ အေးတော့မယ်” - ဟု ပြောသည်။

အလားတူ ကျိုင်းတုံ- တာချီလိတ်သို့ စီးပွါးရေးလုပ်ကိုင်ကြသောနိုင်ငံရေး အခြေခံ ရှိသူ၊ ရေဒီယိုသတင်း နားထောင်လေ့ ရှိသူ တချို့ ကလည်း- နအဖ၏ စစ်မှုမထမ်းမနေရ စနစ်မှာ တိုင်းပြည် ကာကွယ်ရန် အတွက် မဟုတ်ဘဲ၊ ပြည်တွင်း လက်နက်ကိုင် တော်လှန် ရေး တပ်ဖွဲ့များအား တိုက်ခိုက် ရှင်းလင်းရန် အတွက်သာ ဖြစ်သဖြင့် သားသမီးများအား စစ်မှု မထမ်းစေလိုကြကြောင်း၊ ထို့ကြောင့် တခြား ဒေသသို့ ပြောင်းရွှေ့ အလုပ်လုပ် ကိုင်ရန် (သို့မဟုတ်) ထိုင်းသို့ သွားရောက် အခြေချရန် တီးတိုး ပြောဆို တိုင်ပင်လာ ကြကြောင်း သိရသည်။

ထပ်မံတိုးချဲ့မည့် စစ်တိုင်းအသစ် အခြေစိုက်မည့် နေရာ အတိအကျ မသိရသေးသော်လည်း ပြီးခဲ့သည့် ဒီဇင်ဘာလက မြို့နယ်ခွဲ အဆင့် တိုးမြင့် လိုက်သော(နမ့်ဇန် မြို့နယ်) ခိုလမ်မြို့နယ်ခွဲ ၊ (ကွန်ဟိန်းမြို့နယ်) ကာလိမြို့နယ်ခွဲ နှင့် (မိုင်းရှူးမြို့နယ်) မိုင်းဇန်မြို့ နယ်ခွဲ ဒေသ တ၀ိုက်ဖြစ်နိုင်ကြောင်း သျှမ်းပြည် နိုင်ငံရေး၊ စစ်ရေးလေ့လာသည့် ပုဂ္ဂိုလ်များ ခန့်မှန်းကြသည်။

Ref: သျှမ်းသံတော်ဆင့်