2011-12-12
ပြည်ထောင်စုလွှတ်တော် နာယက ဦးခင်အောင်မြင့်နဲ့ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည် တို့ ရန်ကုန်မြို့မှာ မနေ့က ပထမဆုံးအကြိမ် တွေ့ဆုံ ဆွေးနွေးခဲ့ကြတယ်လို့ အမျိုးသားလွှတ်တော်နဲ့ နီးစပ်သူတွေက RFA ကို ပြောပါတယ်။
လွှတ်တော်နာယက ဦးခင်အောင်မြင့်ရဲ့ ဖိတ်ကြားချက်အရ ရန်ကုန်မြို့မှာရှိတဲ့ ဦးခင်အောင်မြင့်ရဲ့နေအိမ်မှာ တွေ့ဆုံခဲ့တာ ဖြစ်ပြီး တွေ့ဆုံချိန် တနာရီလောက် ကြာတယ်လို့ သိရပါတယ်။ အန်အယ်လ်ဒီပါတီ ပြောခွင့်ရပုဂ္ဂိုလ် ဦးဉာဏ်ဝင်းကတော့ အခုလို တွေ့ဆုံတဲ့ သတင်းကို ကြားရတာ ရှိပေမယ့် အတည်မပြုနိုင်ကြောင်း ပြောပါတယ်။
လွှတ်တော်အကြီးအကဲ ဦးခင်မောင်မြင့်ဟာ အန်အယ်လ်ဒီပါတီ အပြတ်အသတ် အနိုင်ရရှိခဲ့တဲ့ ၁၉၉ဝ ခုနှစ် ရွေးကောက်ပွဲ ရလာဒ်ကို အသိအမှတ် ပြုကြောင်း၊ ဒါဟာ ဖျောက်ဖျက်လို့ရတဲ့ ကိစ္စမဟုတ်ကြောင်း ရန်ကုန်တိုင်းမ် သတင်းဂျာနယ်နဲ့ အောက်တိုဘာလ ၃၁ ရက်နေ့က တွေ့ဆုံမေးမြန်းခန်းမှာ ပြောဆိုခဲ့ပါတယ်။
ဒါ့ပြင် ဒေါ်အောင်ဆန်းစုကြည်နဲ့ အန်အယ်လ်ဒီပါတီ မှတ်ပုံပြန်တင်မယ်ဆိုရင် လွှတ်တော် အကြီးအကဲဖြစ်တဲ့ မိမိနဲ့တကွ လွှတ်တော်ထဲက ကိုယ်စားလှယ်တွေက ကြိုဆိုမှာ ဖြစ်ကြောင်း၊ ဒေါ်အောင်ဆန်းစုကြည် အနေနဲ့ ပြည်သူတွေ ရွေးချယ်မယ်ဆိုရင် လွှတ်တော်ထဲကို ရောက်ရှိလာမှာ ဖြစ်ကြောင်း၊ ဒေါ်အောင်ဆန်းစုကြည်ဟာ နိုင်ငံတကာ ဗဟုသုတ ကြွယ်ဝတဲ့ ပညာတတ်တယောက် ဖြစ်တာကြောင့် နိုင်ငံ တည်ဆောက်ရေးအတွက် အများကြီး အားကိုးရမှာ ဖြစ်ကြောင်းကိုလည်း ပြည်ထောင်စုလွှတ်တော် နာယက ဦးခင်အောင်မြင့်က ထုတ်ဖော် ပြောဆိုခဲ့ပါတယ်။
Ref: RFA News
Tuesday, December 13, 2011
ဒေါ်အောင်ဆန်းစုကြည်နဲ့ လွှတ်တော်နာယက ဦးခင်အောင်မြင့်တွေ့ဆုံ
NLD ရွေးကောက်ပွဲ အမှတ်တံဆိပ်သစ် ကြေညာ
ဦးဝင်းမင်း
တနင်္လာ, 12 ဒီဇင်ဘာ 2011
လာမယ့်ကြားဖြတ်ရွေးကောက်ပွဲမှာသုံးမယ့် ပါတီရဲ့ အမှတ်အသားသစ်ကို အမျိုးသား ဒီမိုကရေစီ အဖွဲ့ချုပ်က ကြေညာ လိုက်ပါတယ်။ မြန်မာအစိုးရပိုင် သတင်းစာထဲမှာ တနင်္လာနေ့က ဖော်ပြလိုက်တဲ့ အမျိုးသား ဒီမိုကရေစီ အဖွဲ့ချုပ်ရဲ့ သင်္ကေတ ကြေညာချက်ထဲမှာ ပါတီအလံနဲ့ သဏ္ဍန်တူတဲ့ အနီရောင် အောက်ခံပေါ်မှာ ရွှေဝါရောင် ခွပ်ဒေါင်းက ကြယ်ဖြူကို ဦးတိုက်ထားတဲ့ပုံကို ဖော်ပြထားပါတယ်။ တခြား ပါတီတချို့က အရင် အမျိုးသား ဒီမိုကရေစီအဖွဲ့ချုပ်ရဲ့ ခမောက်တံဆိပ် အမှတ်အသားကို သုံးစွဲလာခဲ့တာမို့ ခြားနားမှုရှိအောင် အခုလို တံဆိပ်အသစ် ထုတ်ပြန် သုံးစွဲရတာဖြစ်တယ်လို့ အမျိုးသား ဒီမိုကရေစီအဖွဲ့ချုပ်က ဆိုပါတယ်။ ဒီအကြောင်းကို ကိုဝင်းမင်းက မေးမြန်းတင်ပြထားပါတယ်။
ဒေါ်အောင်ဆန်းစုကြည် ဦးဆောင်တဲ့ အမျိုးသားဒီမိုကရေစီအဖွဲ့ချုပ် NLD က မြန်မာ့လွတ်လပ်ရေးနဲ့ ဒီမိုကရေစီရေး လှုပ်ရှားမှုတွေမှာ ကျောင်းသားတွေကို ကိုယ်စားပြုခဲ့တဲ့ ခွပ်ဒေါင်းပုံရိပ်ကို ပါတီရဲ့ ရွေးကောက်ပွဲတံဆိပ်အဖြစ် သုံးဖို့ ရွေးချယ် ထုတ်ပြန် လိုက်ပါတယ်။ အခုလို ရွေးချယ်လိုက်တာကို ပြီးခဲ့တဲ့အပတ်က လုပ်ခဲ့တဲ့ NLD ပါတီရဲ့ ဗဟိုအလုပ်မှုဆောင် အစည်းအဝေးကနေ ဆုံးဖြတ်ခဲ့တာ ဖြစ်တယ်လို့ NLD ပါတီပြောရေးဆိုခွင့် ရှိသူ ဦးဉာဏ်ဝင်းက ဆိုပါတယ်။ NLD ရဲ့ ဒီ ရွေးကောက်ပွဲ တံဆိပ်မှာ NLD အလံမှာပါတဲ့ပုံနဲ့ အတူတူပဲဖြစ်တယ်၊ ကွဲတာက ဒီတံဆိပ်အောက်ပိုင်းမှာ အပြာရောင်နဲ့ ရေးထားတဲ့ အမျိုးသား ဒီမိုကရေစီ အဖွဲ့ချုပ် ဆိုတာ ထပ်ပါတာပဲ ဖြစ်တယ်လို့ ဦးဉာဏ်ဝင်းက ပြောပါတယ်။
အရင်က NLD အနေနဲ့ ၁၉၉၀ ခုနှစ် ရွေးကောက်ပွဲတွေမှာ အပြတ်အသတ် အနိုင်ရခဲ့တုန်းကတော့ မြန်မာနိုင်ငံမှာ လူဦးရေ အများဆုံးဖြတ်တဲ့ လယ်သမားတွေကို ကိုယ်စားပြုတဲ့ ခမောက်တံဆိပ်ကို ရွေးကောက်ပွဲမှာ အသုံးပြုခဲ့ပါတယ်။ ဒါပေမဲ့ ဘာကြောင့် အခုလို တံဆိပ်သစ်ပြောင်းပြီး ကြေညာခဲ့ရတယ် ဆိုတာကို ဦးဉာဏ်ဝင်းက အခုလို ရှင်းပြပါတယ်။
“အခု ဆင်တူယိုးမှား ခမောက်ရှိတယ်။ ခမောက် သုံးလုံးရှိတယ်။ တခြားပါတီတွေက ရွေးကောက်ပွဲ သင်္ကေတ တွေပေါ့။ အဲဒီတော့ ကျနော်တို့နဲ့ ခမောက်သင်္ကေတနဲ့ မဆိုင်ဘူးလို့ ကြေညာဖို့ လိုအပ်တယ်လို့ ယူဆတာ။ အဲဒါကြောင့် NLD ဟာ ရွေးကောက်ပွဲ အမှတ်တံဆိပ် အဖြစ် ခမောက်ကို အခု မသုံးတော့ဘူး။ အခု NLD ရဲ့ ပါတီအမှတ် တံဆိပ်ဟာ ခွပ်ဒေါင်း၊ NLD အမျိုးသား ဒီမိုကရေစီ အဖွဲ့ချုပ် ဆိုတဲ့ စာတမ်းပါတဲ့ဟာ ဖြစ်ပါတယ်လို့ ပြည်သူတွေ ရှင်းလင်းသွားအောင်လို့ သတင်းစာထဲမှာ ထည့်တာပါ။”
၁၉၉၀ ရွေးကောက်ပွဲမှာ အနိုင်ရခဲ့တဲ့ NLD ကို အာဏာမလွှဲပေးဘဲ ဆက်ပြီးအုပ်ချုပ်ခဲ့တဲ့ ဗိုလ်ချုပ်မှူးကြီး သန်းရွှေ ဦးဆောင်တဲ့ စစ်အစိုးရဟောင်း အနေနဲ့ ၂၀၁၀ မှာ ရွေးကောက်ပွဲတွေကို ထပ်မံ ကျင်းပပေးခဲ့ပါတယ်။ ၂၀၁၀ ရွေးကောက်ပွဲ ကျင်းပနေချိန်မှာ ဒေါ်အောင်ဆန်းစုကြည်က အကျယ်ချုပ် ကျနေခဲ့ပြီး တင်းကျပ်တဲ့ ရွေးကောက်ပွဲ ဥပဒေတွေနဲ့ စစ်အစိုးရက တဘက်သတ် ရေးဆွဲခဲ့ပြီး ဒီမိုကရေစီ မကျဘူးလို့ ယူဆခဲ့တဲ့ ၂၀၀၈ အခြေခံ ဥပဒေကြောင့် NLD အနေနဲ့ ရွေးကောက်ပွဲမှာ ၀င်မပြိုင်ခဲ့ပါဘူး။ ဒါပေမဲ့ အခုလို NLD က ရွေးကောက်ပွဲမှာ ၀င်မပြိုင်ခဲ့တဲ့အပေါ် သဘောထားကွဲပြီး ရွေးကောက်ပွဲ ၀င်ပြိုင်ခဲ့တဲ့ ဦးခင်မောင်ဆွေ ဦးဆောင်တဲ့ အမျိုးသား ဒီမိုကရေစီအင်အားစု NDF ပါတီက ဒီ ခမောက်တံဆိပ်ကို NLD ကန့်ကွက်တဲ့ကြားထဲကပဲ ရွေးကောက်ပွဲ ကော်မရှင်က ခွင့်ပြုလို့ အသုံးပြုလာခဲ့ပါတယ်။
နောက်ပိုင်း ရွေးကောက်ပွဲအပြီး NDF ပါတီကနေ ထပ်ခွဲလာခဲ့တဲ့ ဦးသိန်းညွှန့် ဦးဆောင်တဲ့ အမျိုးသား ဒီမိုကရေစီ ပါတီသစ် ကလည်း ခမောက်သုံးခုပါတဲ့ တံဆိပ်ကို ထပ်ပြီး အသုံးပြုလာခဲ့ပါတယ်။ ဒါကြောင့်မို့ ဒီပါတီတွေနဲ့ မဆိုင်ဘဲ NLD က သီးသန့်ဖြစ်တယ် ဆိုတာကို ပြနိုင်ဖို့ အခုလို တံဆိပ်သစ်ကို ရွေးချယ်ဆုံးဖြတ် ထုတ်ပြန်ခဲ့တာ ဖြစ်တယ်လို့ ဦးဉာဏ်ဝင်းက ဆိုပါတယ်။ ဒီအလံမှာရော၊ တံဆိပ်မှာပါ ပါတဲ့ အရောင်နဲ့သင်္ကေတတွေရဲ့ အဓိပ္ပါယ်ကို ဦးဉာဏ်ဝင်းက အခုလို ရှင်းပြပါတယ်။
“အခုကတော့ အနီရောင်က ရဲရင့်ခြင်းပေါ့ဗျာ။ ခွပ်ဒေါင်းဆိုတာကတော့ တကယ့်ကို တိုက်ပွဲဝင် အမှတ်အသားပေါ့။”
အမျိုးသားဒီမိုကရေစီအဖွဲ့ချုပ် အထွေထွေ အတွင်းရေးမှူး ဒေါ်အောင်ဆန်းစုကြည်ရဲ့ ရုံး ဒါရိုက်တာ ဦးဝင်းထိန် ကလည်း ဒီတံဆိပ် အမှတ်အသား တွေဟာ အပြောင်းအလဲအတွက် ရုန်းကန် လှုပ်ရှားမှုတွေကို ကိုယ်စားပြုတာ ဖြစ်တယ်၊ ခွပ်ဒေါင်းကလည်း ကျောင်းသားတွေရဲ့ ၁၉၈၈ ခုနှစ် ဒီမိုကရေစီရေး စွန့်လွှတ် လှုပ်ရှားမှုတွေကို အသိအမှတ်ပြုတာ ဖြစ်တယ်လို့ အေအက်ဖ်ပီ သတင်းဌာနကို ပြောခဲ့ပါတယ်။ NLD အနေနဲ့ ၂၀၁၀ ရွေးကောက်ပွဲတွေကို သပိတ်မှောက်ခဲ့ပေမဲ့ ရွေးကောက်ပွဲ အပြီး ဒေါ်အောင်ဆန်းစုကြည် လွတ်လာအပြီးနဲ့ ဦးသိန်းစိန် အစိုးရတက်လာ အပြီးမှာ ဒီခေါင်းဆောင်နှစ်ဦးတို့ တွေ့ဆုံကြတဲ့ ဆွေးနွေးပွဲတွေ ကနေတဆင့် ပါလီမန်သစ် ဘက်ကလည်း ရွေးကောက်ပွဲ ဥပဒေတွေကို လျှော့ပေါ့ ပေးခဲ့တဲ့အပေါ်မှာ စပွင့်လင်းလာတဲ့ အခြေအနေကို ဆုပ်ကိုင်ပြီး NLD အနေနဲ့ ရှေ့နှစ်မှာကျင်းပမယ့် အမတ်နေရာ ၅၀ နီးပါး လျစ်လပ်ထားတဲ့ နေရာအတွက် ကြားဖြတ် ရွေးကောက်ပွဲ တွေမှာ ပါဝင်ဖို့ ဆုံးဖြတ်ခဲ့ပါတယ်။
ဒီကြားဖြတ် ရွေးကောက်ပွဲတွေကို ဘယ်နေ့ ကျင်းပရမယ်ဆိုတာ မသိသေးပေမဲ့ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်း စုကြည်ကတော့ သူမအနေနဲ့လည်း ဒီရွေးကောက်ပွဲတွေမှာ ၀င်ပြိုင်ဖို့ရှိတယ်၊ အခုလို ရွေးကောက်ပွဲတွေမှာ အမျိုးသား ဒီမိုကရေစီအဖွဲ့ချုပ် အနေနဲ့ ပြည်တွင်းစစ် ရပ်စဲရေး၊ တရားဥပဒေ စိုးမိုးရေးနဲ့ အခြေခံဥပဒေ ပြင်ဆင်ရေးတွေကို ပါတီရဲ့ အဓိက ဦးတည်ချက်တွေ အဖြစ် ဦးစားပေးလုပ်သွားဖို့ ရှိတယ်လို့ ပြောလာခဲ့ပါတယ်။
Ref: VOA News
ကလေးရောင်းဝယ်ခြင်းမှာ တိုင်းပြည်အနာဂတ်ကို အလောင်းအစားလုပ်ဟု ဒေါ်စု ပြော
ထွန်းထွန်း
တနင်္လာနေ့၊ ဒီဇင်ဘာလ ၁၂ ရက် ၂၀၁၁
နယူးဒေလီ (မဇ္ဈိမ) ။ ။ ကလေးသူငယ်များအား ကူးသန်း ရောင်းဝယ်နေခြင်းသည် တိုင်းပြည်၏ အနာဂတ်အား အလောင်းအစား ပြုလုပ်နေခြင်း ဖြစ်ကြောင်း နိုင်ငံတကာ ကလေးကူးသန်း ရောင်းဝယ်ရေးနေ့၌ လူထုခေါင်းဆောင် ဒေါ်အောင်ဆန်းစုကြည်က ပြောဆိုလိုက်သည်။
ထိုင်း-မြန်မာနယ်စပ် မဲ့ဆောက်မြို့တွင် ကလေးကူးသန်း ရောင်းဝယ်မှုတားဆီးရေး အဖွဲ့ - Burma ACT အဖွဲ့မှ ဦးစီး ပြုလုပ်သည့် ယင်းအထိမ်းအမှတ်နေ့ ပွဲသို့ ပေးပို့သည့် ဗီဒီယိုမိန့်ခွန်းမှတဆင့် ပြောဆိုခဲ့ခြင်း ဖြစ်သည်။
“ကလေးသူငယ်တွေကို ကူးသန်းရောင်းဝယ်ရေး လုပ်တယ်၊ ကျမတုိ့ရဲ့ အနာဂတ်ကို ကုန်ကူးတယ် ဆိုတာဟာ အင်မတန်မှ မလုပ်သင့်တဲ့ ကိစ္စပါ။ ဒါဟာ လူသားမဆန်တဲ့ အပြင် အင်မတန်မှ ပညာမဲ့တဲ့ ကိစ္စ ဖြစ်ပါတယ်။ ကိုယ့်ရဲ့ အနာဂတ်နဲ့ လောင်းကစား လုပ်နေသလိုပါပဲ” ဟု လူထုခေါင်းဆောင် ဒေါ်အောင်ဆန်းစုကြည်က ပြောဆိုသည်။
အမျိုးသမီးနှင့် ကလေးများအား လူကုန်ကူးခြင်းအား ရာဇဝတ်မှုအဖြစ် သတ်မှတ်၍ နိုင်ငံတကာက ပူးပေါင်း တိုက်ဖျက်ရန် အတွက် ရည်ရွယ်သည့် ပါလာမိုစာချုပ် စတင် အသက်ဝင်သည့် ဒီဇင်ဘာလ ၁၂ ရက်နေ့ကို အစွဲပြု၍ ကလေး ကူးသန်းရောင်းမှု ဆန့်ကျင်ရေးနေ့ အဖြစ် နိုင်ငံတကာက သတ်မှတ်ခဲ့ခြင်း ဖြစ်သည်။
ယင်းအထိမ်းအမှတ်ပွဲကို ထိုင်း-မြန်မာနယ်စပ် မဲ့ဆောက်မြို့ရှိ CDC ကျောင်းတွင် ပြုလုပ်ခြင်းဖြစ်ကာ ကျောင်းသား ကျောင်းသူ၊ ဆရာဆရာမ၊ ကျောင်းသားမိဘများ၊ ဒီမိုကရေစီရေး လုပ်ဆောင်နေသည့် အဖွဲ့အစည်းများမှ တက်ရောက် ခဲ့ပြီး လူအင်အား ၂၀၀၀ ကျော်ရှိသည်။
ကလေးများအား ကူးသန်းရောင်းဝယ်ခြင်းအား ယနေ့မှတင်မဟုတ်ဘဲ နေ့တိုင်းနေ့တိုင်းအား ကလေး ကူးသန်း ရောင်းဝယ်မှု ဆန့်ကျင်ရေး အဖြစ် သတ်မှတ်ရလည်း လူထုခေါင်းဆောင်က ဗီဒီယိုမိန့်ခွန်းမှ တိုက်တွန်းထားသည်။
“ကလေးတွေဟာ ရိုးရိုးလေးပြောရရင် သူတို့ကို မွေးပေးပါ ဆိုပြီးတော့ ဒီလောကကြီးထဲကို ရောက်လာတာ မဟုတ် ပါဘူး။ လူကြီးတွေက မွေးလိုက်လို့ ရောက်လာတာတဲ့ ကလေးလေးတွေ ဖြစ်ပါတယ်။ ဒါကြောင့်မို့လို့ ကျမတို့ လူကြီးတွေ အားလုံးဟာ ကျမတို့ အနာဂတ်ဖြစ်တဲ့ ရင်သွေးလေးတွေ အတွက် တာဝန်ရှိတယ်ဆိုတာ ကို နေ့တိုင်းနေ့တိုင်း သတိရပြီးတော့၊ နေ့တိုင်းနေ့တိုင်းဟာ ကလေးသူငယ်များ ကူးသန်း ရောင်းဝယ်ရေး ဆန့်ကျင်ရေးနေ့ ဆိုပြီးတော့ ကျမတို့ စွဲစွဲမြဲမြဲ မှတ်ထားဖို့ လိုတယ်” ဟု လူထု ခေါင်းဆောင်က ဆိုသည်။
မြန်မာနိုင်ငံတွင် လူကုန်ကူးမှု တိုက်ဖျက်ရေး နှစ်ပတ်လည်အစီရင်ခံစာအရ ၂ဝ၁၁ ဇွန်လအထိ လူကုန်ကူးမှု ပေါင်း ၆၈ မှုရှိပြီး တရားခံ ၁၆ဝ ဦးကို ဖမ်းမိထားသည်ဟု သိရသည်။
မြန်မာနိုင်ငံ လူကုန်ကူးမှုတိုက်ဖျက်ရေးဆိုင်ရာ ၂ဝဝ၆-၂ဝ၁ဝ ငါးနှစ်စီမံကိန်းအတွင်း လူကုန်ကူးမှုပေါင်း ၃၂၆ မှုရှိခဲ့ပြီး အများဆုံးမှာ ရှမ်းပြည် မြောက်ပိုင်းနှင့် ရန်ကုန်တိုင်းတို့ ဖြစ်ကြောင်း လူကုန်ကူးမှု တားဆီးကာကွယ်ရေး ဗဟိုအဖွဲ့ ဒုရဲမှူးကြီး ရာလျှံမုန်းကို ကိုးကား၍ ပြည်တွင်းထုတ် 7 days ဂျာနယ်တွင် ပါရှိသည်။ ရန်ကုန်တိုင်းအတွင်း ၇၃ မှုသာ ရှိခဲ့ပြီး ရှမ်းပြည်မြောက်ပိုင်းတွင်မူ ၂၅၃ မှုထိ ရှိသည်။
ယခုကဲ့သို့ ကလေးကူးသန်းရောင်းဝယ်မှုမြင့်မားရခြင်းမှာ စားဝတ်နေရေးဆိုင်ရာ ပြဿနာကြောင့်ဟု Burma Act အဖွဲ့က သုံးသပ် ထားသည်။ Burma Act အဖွဲ့မှာ ကလေးသူငယ် ကူးသန်းရောင်းဝယ်မှု ပပျောက်ရေး အတွက် ပညာပေးလုပ်ငန်း လုပ်ဆောင်နေသည့် အဖွဲ့ဖြစ်သည်။
“စားဝတ်နေရေး အဆင်မပြေတော့ မိဘတွေ ကိုယ်တိုင်ကလည်း ရှာဖွေနေရတယ်။ ကလေးတွေ ကိုယ်တိုင်ကလည်း စားဝတ်နေရေး အဆင်မပြေတော့ အလုပ်လုပ် ပိုက်ဆံများများပေးရင် သူတို့ကိုယ်တိုင် လိုက်တာတွေ ရှိတယ်။ နောက်ပြီး ကလေးတွေ ရောင်းစားလို့ ရတယ်ဆိုတဲ့ အသိတွေကို ပြောင်းလဲ မပေးနိုင်ခဲ့ဘူး ။ ကလေးကို ရောင်းစား ရင် ပြစ်မှုမြောက်တယ်၊ ရာဇဝတ်မှု မြောက်တယ်ဆိုတာ သူတို့ မသိဘူး။ စာဝတ်နေရေး အဆင်မပြေတော့ သိဖို့ ခက်ခဲတဲ့ အခြေအနေပေါ့” ဟု Bumra Act အဖွဲ့တာဝန်ခံ ဒေါ်နန်းမူက မဇ္ဈိမကို ပြောသည်။
မြန်မာနိုင်ငံမှ ကလေးငယ်များမှာ အိမ်နီးချင်းနိုင်ငံများသို့ နည်းအမျိုးမျိုးဖြင့် ကူးသန်းရောင်းဝယ်ခြင်း ခံနေရသည့် အပြင် ပြည်တွင်း တွင်လည်း တောမြို့မှ မြို့ကြီးများပေါ်သို့ အိမ်စေအဖြစ် ကူးသန်း ခံနေရသည်။ ယင်းအပြင် အစိုးရ စစ်တပ်များတွင်လည်း စစ်သားသစ် စုဆောင်းသည်ဟု ဆိုကာ လိမ်ညာ ရောင်းချ ခံနေရခြင်း များလည်း ရှိသည်။
“တရုတ်နယ်စပ်မှာ မယားအဖြစ် ရောင်းစားတာ ရှိတယ်။ ထိုင်းဘက်မှာတော့ သူတောင်းစား လုပ်ခိုင်းတာ၊ ဘိန်းရောင်းခိုင်းတာ၊ ပြည့်တန်ဆာ လုပ်ငန်းတွေနဲ့ ကလေးတွေကို ပင်လယ်ထဲမှာ လွှတ်ပြီး ငါးဖမ်း လုပ်ငန်းတွေမှာ ရောင်းစား ခံရတာတွေရှိတယ်” ဟု ဒေါ်နန်းမူက ဆိုသည်။
ယင်းကဲ့သို့ ရောင်းချခံရသူများကို ကယ်ဆယ်ရမည့်အပြင် လွတ်မြောက်လာသူများကိုလည်း ပြန်လည် ထူထောင်ပေးရန် အတွက် လိုအပ်ကြောင်း လူထုခေါင်းဆောင်က သတိပေးထားသည်။
“ဒီကလေးတွေရဲ့ ဘဝတွေကို ပြန်လည်ထူထောင်ပေးဖို့ဆိုတာဟာလည်း အရေးကြီးတယ်ဆိုတာလည်း ကျမတို့ မေ့လို့မရပါဘူး။ ကူးသန်း ရောင်းဝယ်ရေးက နေပြီးတော့ ကူညီပေးတယ်၊ မစပေးတယ်၊ ကယ်ထုတ် ပေးလိုက်ပြီးတဲ့ အခါကျရင် ဒီကလေးတွေဟာ သူတို့ရဲ့ အနာဂတ်ကို ပြန်လည်ပြီးတော့ ထူထောင်နိုင်ဖို့ ဆက်ပြီးတော့ အကူအညီတွေ အများကြီး လိုပါတယ်။ အဲဒါအတွက်လည်း ဝိုင်းဝန်းပြီးတော့ လုပ်ဆောင်ကြ ပါလို့ ကျမအနေနဲ့ သတိပေး ချင်ပါတယ်” ဟု လူထုခေါင်းဆောင် ဒေါ်အောင်ဆန်းစုကြည်က ဗီဒီယိုမိန့်ခွန်းမှ တဆင့် ပြောကြားခဲ့သည်။
Ref: မဇ္ဈိမ
ဂီတလောကသားတွေရဲ့ မကျေလည်မှု ဘယ်လိုရှင်းမလဲ၊ ဒေါ်အောင်ဆန်းစုကြည် စီစဉ်တဲ့ ဂီတပွဲတော်မှာ ဇော်ဝင်းထွဋ်လည်း ပါမယ်
မစပ်စု
December 12, 2011
ဂီတလောကသားတွေရဲ့ မကျေလည်မှု ဘယ်တော့ရှင်းပေးနိုင်မလဲ ဘက်ပေါင်းစုံက ပွင့်လင်း မြင်သာမှုတွေ ရှိလာပြီဆိုတဲ့ လက်ရှိ အစိုးရလက်ထပ်မှာ ရုပ်ရှင် လောကသားတွေ ကတော့ ရုပ်ရှင် အစည်းအရုံးက တာဝန်ရှိသူတွေနဲ့ အတူ ရုပ်ရှင်ဆင်ဆာ မူဝါဒနဲ့ ပတ်သက်လို့ ဆွေးနွေး ညှိနှိုင်းခဲ့ကြပြီး ဖြစ်ပါတယ်။
ဒါပေမယ့် ဂီတလောကသားတွေ အကြားမှာတော့ မကျေလည်တဲ့ အသံတွေ ကြားနေရဆဲ ဖြစ်ပါတယ်။
ဂီတအစည်းအရုံးကနေပြီး ဂီတသမားတွေ ဖန်တီး သီဆိုထားတဲ့ တေးသီချင်းတွေကို ဘယ်နေရာမှာ မဆို စီးပွားရေးအရ သုံးစွဲခွင့်နဲ့ ပတ်သက်လို့ အလွှာလိုက် ပေးဆောင် အသုံးပြုကြမယ် ဆိုပေမယ့် အဲဒီကိစ္စကို ဘာမှ ဆောင်ရွက်မပေးမှု အပေါ် အဆိုတော် သားစိုးနဲ့ ဂီတ လောကသား တချို့က အကောင်းဆုံး ဆောင်ရွက်ပေးနိုင်ဖို့ မျှော်လင့်နေကြတယ်လို့ သိရပါတယ်။
“သီချင်းတွေကို အလွှာလိုက် ဆောင်ရွက်ပေးမယ်ဆိုပြီး ဖြစ်မလာတာ ကျနော်တယောက်တည်းတင် မဟုတ်ဘူး။ တခြား ဂီတသမားတွေလည်း အဲဒီကိစ္စကို သိချင်နေကြတယ်။ ဂီတအစည်းအရုံး အနေနဲ့ ဒီကိစ္စကို ဖြေရှင်းပေး စေချင်ပါတယ်” လို့ သားစိုးက ပြောပါတယ်။
ဂီတအစည်းအရုံးအနေနဲ့ သီချင်းတပုဒ်ကို စီးပွားရေးအရ အသုံးပြုတော့မယ်ဆိုတာနဲ့ ရေး၊ ဆို၊ တီး၊ အသံဖမ်း၊ ဖြန့်ချိ စသဖြင့် အလွှာ အသီးသီး အလိုက်ကို သတ်မှတ်ထားတဲ့ နှုန်းထားအတိုင်း ပေးဆောင် အသုံးပြုရမယ် ဆိုပြီး သတ်မှတ် ပေးထားခဲ့တာပါ။
“၂၀၀၉ ခုနှစ် နှစ်ကုန်တုန်းကပဲ FM တွေက ကျနော့်သီချင်းကို ထုတ်လွှင့်ခ အဖြစ် တနှစ်လုံးစာ အတွက် ကျပ် ၈၀၀၀ ပေးဖူးပါတယ်။ အဲဒီကစပြီး မရလိုက်တာ အခု ၂၀၁၁ နှစ်ကုန် အထိပါပဲ” လို့ သူက ဆိုပါတယ်။
ပြည်တွင်းထုတ် ဂျာနယ်တွေမှာတော့ ဂီတအစည်းအရုံးက FM ရေဒီယိုတွေမှာ တေးသီချင်း သုံးစွဲမယ်ဆိုရင် သုံးစွဲခ အဖြစ် မည်ရွေ့ မည်မျှ ပေးဆောင်သုံးစွဲမယ် ဆိုတာကို ဂီတအစည်းအရုံး အနေနဲ့ ဖြေရှင်း ညှိနှိုင်းမှုတွေ ပြုလုပ်နေတယ်လို့ ရေးထားတာ တွေ့ရ ပေမယ့်လည်း ယခုလက်ရှိမှာတော့ အဆိုတော်သားစိုးက FM အသံလွှင့်ဌာနတွေ၊ ပြည်တွင်း ရုပ်သံဌာနတွေက သူတို့ရဲ့ တေးသီချင်းတွေကို အသိပေးခြင်း မရှိဘဲ သုံးချင်သလို အသုံးပြုတယ်လို့ ပြောနေပါပြီ။
“FM တွေ အပါအဝင် MRTV 4 တို့ Sky Net တို့လို တီဗီ Channelတွေ က သီချင်းတွေကို ကျနော်တို့ဆီက ၀ယ်ပြီး လွှင့်ရမှာကို လွှင့်ချင်သလို လွှင့်ပြီးမှ ဂီတ အစည်းအရုံးကို လာပြီးရှင်းတယ်။ ပြောင်းပြန်ဖြစ်နေပါတယ်” လို့ သားစိုးက ဆိုပါတယ်။
City FM (ရန်ကုန်) စတင် တည်ထောင်ကာစ အချိန်ကလည်း တေးသီချင်းတွေကို ဖန်တီး သီဆိုသူတွေကို အသိမပေးဘဲ သုံးစွဲခဲ့တဲ့ အတွက် ဂီတအနုပညာရှင် အယောက် ၂၀ ကျော် ကန့်ကွက် လက်မှတ်ထိုးပြီး သူတို့ရဲ့ တေးသီချင်းတွေကို အသုံးပြုခွင့် ပိတ်ပင် ခဲ့ဖူးတဲ့ သာဓကရှိခဲ့ဖူး ပါတယ်။
အဲဒီလို ကန့်ကွက်မှုတွေကြောင့် City FM အနေနဲ့ ကန့်ကွက်ထားတဲ့ အနုပညာရှင်တွေရဲ့ တေးသီချင်းတွေကို ရှောင်ပြီး ထုတ်လွှင့် ခဲ့ရဖူးတာလည်း ရှိခဲ့ပါတယ်။
“City FM ဥက္ကဋ္ဌ ဦးလှမြင့်ဆွေက အဲဒီလို ကန့်ကွက် လက်မှတ်ထိုးထားတဲ့ တေးရေးတွေ၊ အဆိုတော်တွေရဲ့ နာမည်ပါတဲ့ ကြော်ငြာ ဘုတ်တွေ ဆိုရင် ရန်ကုန်မြို့တွင်းမှာရှိတဲ့ စည်ပင် နယ်နိမိတ် အတွင်းမှာ ထောင်ခွင့် မပေးဘူး” လို့ တေးရေး ဆရာတဦးက ပြောဖူးပါတယ်။
အဲဒီလို တေးရေးတေးဆို နာမည်ပါတဲ့ ကြော်ငြာဘုတ်တွေကို ရန်ကုန်မြို့တွင်းမှာ ထောင်ခွင့်မရတဲ့ အတွက် ထုတ်လုပ်သူ အခက်အခဲ တွေ့ရတယ်လို့ သူက ဆိုပါတယ်။
ဒါ့အပြင် ခိုးကူးကိစ္စနဲ့ ပတ်သက်ပြီးတော့ ရုပ်ရှင်အစည်းအရုံးက လွှတ်တော်အထိ တင်ပြ ထားပြီးပေမယ့်လည်း ဂီတ အစည်းအရုံး အနေနဲ့တော့ ဘာမှ ဆောင်ရွက်နိုင်ခြင်း မရှိသေးကြောင်းကိုလည်း အဆိုတော် သားစိုးက ပြောပါတယ်။
ရုပ်ရှင် အစည်းအရုံးလိုပဲ ဂီတအစည်းအရုံးအနေနဲ့လည်း ဖြေရှင်းစရာတွေ ရှိနေသေးတဲ့အတွက် အမြန်ဆုံး ဖြေရှင်းနိုင်ဖို့ ဂီတ လောကသားတွေက မျှော်လင့် နေကြတယ်လို့ သိရပါတယ်။
ဒေါ်အောင်ဆန်းစုကြည် စီစဉ်တဲ့ပွဲ ဇော်ဝင်းထွဋ်လည်းပါမယ်
ဒီဇင်ဘာလ ၁၅ ရက်နေ့ ရန်ကုန်မြို့သုဝဏ္ဏ အားကစားကွင်းမှာ အဆိုတော် အနုပညာရှင်များ၊ တေးဂီတ၀ိုင်း များစွာ ပါဝင်ပြီး ခြိမ့်ခြိမ့်သဲသဲ ကျင်းပမယ် ဆိုတဲ့ ဂီတပွဲကြီးက ပါမစ်မရ သလိုလို၊ ပွဲပျက်မလိုလို သတင်း ကြားနေပါတယ်။
ဒါပေမယ့် အဲဒီပွဲ ကျင်းပဖြစ်ရင် အင်ပါယာတီးဝိုင်းနဲ့အတူ ရော့ခ်အဆိုတော် ဇော်ဝင်းထွဋ်လည်း ပါဝင် သီဆိုမယ်လို့ ပြောပါတယ်။
“ကျနော်က တပုဒ် နှစ်ပုဒ် ၀င်ဆိုဖြစ်မယ်။ တီးဝိုင်းစီစဉ်ပေးမယ်” လို့ ဇော်ဝင်းထွဋ်ကဆိုပါတယ်။
ဒီဖျော်ဖြေပွဲမှာ မြန်မာနိုင်ငံမှာ ရှိသမျှသော တေးဂီတ၀ိုင်းများစွာ ပါဝင်မှာဖြစ်ပြီး အဆိုတော် အနုပညာရှင်ပေါင်း ခန့်မှန်းခြေ ၅၀ နီးပါးလောက် သီဆို ပါဝင်မှာပါ။
ဒီဖျော်ဖြေပွဲကို လူထုခေါင်းဆောင် ဒေါ်အောင်ဆန်းစုကြည်ရဲ့ လမ်းညွှန်မှုနဲ့ ကျင်းပမှာ ဖြစ်ပြီးတော့ ပြည်ထောင်စု တိုင်းရင်းသားတွေ အတွက် ပညာရေး ရန်ပုံငွေ အဖြစ် ဖျော်ဖြေ တင်ဆက်ကြမှာ ဖြစ်ပါတယ်။
“အရင်ကဆိုရင် တို့မြန်မာပြည်မှာ တခုခုလုပ်မယ် ဆိုရင် ဟိုဟာကြောက်ရ၊ ဒီဟာကြောက်ရ။ ဟိုမျက်နှာကြည့်ရ ဒီမျက်နှာ ကြည့်ရတွေက တအား များခဲ့တာကိုး။ အခုက အဲလိုမဟုတ်ဘဲ ဖေးဖေးမမနဲ့၊ စိတ်တူ ကိုယ်တူနဲ့ အထူးသဖြင့် အန်တီစုရဲ့ အိုင်ဒီယာတွေ အများကြီး ပါပါတယ်။ အန်တီက လုပ်စေချင်တာကိုး။ အဓိကက ပိုက်ဆံရှာတာထက် ပြန်လည် စည်းလုံး ညီညွတ်စေတာ မျိုးကို သူက လိုချင်တာ” လို့ အဆိုတော် ဇော်ဝင်းထွဋ်က ဆိုပါတယ်။
သူ့အနေနဲ့ အနုပညာရှင် အများအပြားပါဝင်မယ့် စိတ်ဓာတ်ခွန်အား နိုးကြားစေနိုင်တဲ့ တေးစီးရီးမှာလည်း ပါဝင် သီဆို သွားဦးမှာလို့ ပြောပါတယ်။
တချိန်က လျှမ်းလျှမ်းတောက် ကျော်ကြားခဲ့တဲ့ ရော့ခ်အဆိုတော် ဇော်ဝင်းထွဋ်ဟာ “မဟာ” တေးစီးရီးခွေ ထွက်ရှိပြီးတဲ့ နောက် အဲဒီအခွေထဲက အစိုးရရဲ့ ပေါ်လစီ သီချင်းတွေကြောင့် ပရိသတ် တချို့ရဲ့ ပြစ်တင် ဝေဖန်သံတွေနဲ့ အတူ အောင်မြင်မှုတွေ မှေးမှိန် ခဲ့ရတယ်လို့ သတင်းတွေ ထွက်ပေါ်ခဲ့ဖူး ပါတယ်။
ယင်းကဲ့သို့ ပရိသတ်ရဲ့ အားပေးမှု အတိုင်းအတာ အများဆုံး ရရှိခဲ့ဖူးတဲ့ အဆိုတော် စိုင်းထီးဆိုင် ဟာလည်း တေးရေး မြသန်းစံ ရေးစပ်တဲ့ စစ်အစိုးရ အကျိုးပြုပေါ်လစီ တေးသီချင်းတွေ သီဆိုခဲ့ သည့်နောက်ပိုင်း ပရိသတ်ရဲ့ အားပေးမှု အတိုင်းအတာ လျော့နည်း သွားခဲ့တာတော့ အမှန်ပါ။
၁၅ ရက်နေ့ပွဲကို ပရိသတ်က မျှော်လင့်နေသလို ပါဝင်မယ့် ဂီတပညာရှင်တွေလည်း တော်တော်လေး စိတ်အား ထက်သန်နေတာ တွေ့ရပါတယ်။
ဒီပွဲ မပျက်ပါစေနဲ့လို့ ဆုတောင်းရင်း …။
Ref: ဧရာဝတီ
ရွှေညဝါ ဆရာတော် ဖိအားပေးခံနေရ
December 12, 2011
နိုင်ငံရေး အခမ်းအနားများ မကြာခဏ ကျင်းပလေ့ရှိသော ကြည့်မြင်တိုင်မြို့နယ် သာဓု ကျောင်းတိုက်မှ ကျောင်းထိုင် နာယက ရွှေညဝါ ဆရာတော် အရှင် ပညာသီဟကို အာဏာပိုင်များက အမျိုးမျိုး ဖိအားပေးနေကြောင်း ဒီဇင်ဘာ ၁၀ ရက်နေ့က ကျင်းပခဲ့သည့် ဒေါ်အောင်ဆန်းစုကြည်၏ ငြိမ်းချမ်းရေး နိုဗဲလ်ဆု ရရှိခြင်း နှစ် ၂၀ ပြည့် အခမ်းအနား မိန့်ခွန်းတွင် ဆရာတော်က ထည့်သွင်း မိန့်ကြားခဲ့သည်။
“ဟီလာရီကလင်တန်နဲ့ တွေ့ဆုံခဲ့လို့လား၊ အမျိုးသားနေ့ အောင်ပွဲ ကျင်းပဖို့ လက်ခံခဲ့လို့လား၊ နိုင်ငံရေး အကျဉ်းသားတွေ လွှတ်ဖို့ တောင်းလို့လား၊ ဘာကြောင့်မှန်း မသိဘဲ လေး၊ ငါး၊ ခြောက်ရက် ရှိနေပြီ၊ ဘုန်းကြီး ဘ၀ တခုလုံးကို အပြောင်းအလဲ ဖြစ်စေမယ့် ဖိအားတွေ ပေးနေတယ်။ ဘုန်းကြီး ဘ၀ တသက်တာ လုပ်ခဲ့သမျှ အခြေအနေတွေကို ဖျက်ဆီးမယ့် ဖိအားမျိုးတွေ ရင်ဆိုင် နေရတယ်” ဟု ရွှေညဝါ ဆရာတော်က ဆိုသည်။
ဆရာတော် အရှင်ပညာသီဟသည် မည်သို့သော ဖိအားများ ရင်ဆိုင်နေရသည်ကို ပွင့်လင်းစွာ ထုတ်ဖော် ပြောဆိုသွားခြင်း မရှိသော်လည်း ရင်ဆိုင်နေရသည့် ဖိအားများကို ဆရာတော်က အကြောက်တရား ကင်းကင်းဖြင့် ရင်ဆိုင်သွားမည်ဟု ပြောသည်။
“အဲဒီလို ရင်ဆိုင်ရလို့လည်း ဘုန်းကြီး စိတ်ဓာတ်မကျဘူး၊ မျက်နှာ မပျက်ဘူး၊ ငါ့ဘ၀ ပျက်ချင် ပျက်ပစေ၊ လုပ်သင့် လုပ်ထိုက်တာ၊ အမှန်တရား အတွက် စွန့်လွှတ်မယ် ဆိုတဲ့ စိတ်မျိုးဘုန်းကြီးမှာ အပြည့်ရှိတယ်” ဟု ရွှေည၀ါ ဆရာတော်က ဆက်လက် မိန့်ကြားသည်။
သာဓု ကျောင်းတိုက်တွင် ဒေါ်အောင်ဆန်းစုကြည်ကို ဂုဏ်ပြုသည့်ပွဲ လုပ်ချင်သည်ဟု လာရောက် လျှောက်ထားသဖြင့် ဆရာတော်က အသာတကြည် လက်ခံလိုက်ကြောင်း ပြောသည်။
“တကယ်တော့ သူတို့ကသာ လာလျှောက်လို့ လက်ခံတယ်လို့ စကားလှအောင် ပြောတာ။ သူတို့ မလျှောက်ခင် ကတည်းက ဘုန်ကြီးက ခွင့်ပြုပြီးသား” ဟု ရွှေညဝါ ဆရာတော်က ဆိုသည်။
မြန်မာပြည်တွင်းတွင် ငြိမ်းချမ်းရေး ရရှိသည်အထိ ဆောင်ရွက်ရမည် ဖြစ်ကြောင်းလည်း ဆရာတော်က ၎င်း၏ မိန့်ခွန်းတွင် ထည့်သွင်း ပြောကြားခဲ့သည်။
“အားလုံး တောင်းဆိုကြတာက နိုင်ငံရေးအကျဉ်းသား အားလုံး လွှတ်ပေးဖို့၊ ပြည်တွင်းစစ် ရပ်ဖို့။ ဒါပေမယ့် ဘုန်းကြီးကတော့ တခွန်းတည်းပဲ ပြောချင်တယ် ငြိမ်းချမ်းရေး ရဖို့ပဲ။ အကျဉ်းထောင်ထဲမှာ ရှိနေတဲ့ နိုင်ငံရေး အကျဉ်းသားတွေလည်း အကျဉ်းကျ နေတဲ့အတွက် မငြိမ်းချမ်းနိုင်ဘူး၊ နယ်စပ်တွေမှာ စစ်ပွဲတွေဖြစ်နေတော့ မငြိမ်းချမ်းနိုင်ဘူး။ အဲဒီတော့ ငြိမ်းချမ်းရေးရဖို့ အရမ်းကို အရေးကြီးပါတယ်” ဟု ဆရာတော်က ဆိုသည်။
ယင်းနေ့ အခမ်းအနားတွင် နိုဗဲလ်ငြိမ်းချမ်းရေးဆုရှင် ဒေါ်အောင်ဆန်းစုကြည်ကလည်း ငြိမ်းချမ်းရေး ရရှိရေးသည် မြန်မာနိုင်ငံ၏ လက်ရှိ အခြေအနေအတွက် အလွန် လိုအပ်လျက်ရှိကြောင်း၊ မြန်မာပြည် လွတ်လပ်ရေး ရပြီးကတည်းက တောက်လျှောက် ငြိမ်းချမ်းရေး မရရှိဘဲ စစ်ပွဲများနှင့်သာ အချိန်ကုန်ဆုံး ခဲ့ရကြောင်း ပြောဆိုသည်။
“ပထမ ငြိမ်းချမ်းရေး၊ ဒုတိယ ငြိမ်းချမ်းရေး၊ တတိယ ငြိမ်းချမ်းရေးပဲ။ ကျမတို့ခေတ်မှာ အရင်ခေတ် အဆက်ဆက်က မရခဲ့တဲ့ ငြိမ်းချမ်းရေးကို ရအောင်လုပ်နိုင်ဖို့ အခွင့်အရေး ရနေပြီဆိုတဲ့ စိတ်တွေ ထားပြီးတော့ ဒီအခွင့်အရေးကို လက်မလွှတ်တမ်း ဆုပ်ကိုင်ဖို့ အရေးကြီးပါတယ်။ အခွင့်အရေးဆိုတာ တခါတလေ တော်တော်နဲ့ ပြန်မလာ တတ်ပါဘူး။ လာတဲ့အခါမှာ ရအောင် ဆုပ်ကိုင်ရမယ်။ ဒီအခွင့်အရေးကို အများ အကျိုးအတွက် ဖြစ်အောင်လို့ သုံးစွဲသွားရမယ်။ အဲဒီလိုစိတ်နဲ့ ကျမတို့အားလုံး ဆက်ပြီးတော့ သွားနိုင်လို့ရှိရင် ကျမတို့ရဲ့ နိုင်ငံဟာ မကြာမီကာလမှာ အားလုံးလိုချင်တဲ့၊ ငြိမ်းချမ်းတဲ့၊ လူ့အခွင့်အရေးကို အပြည့်အ၀ အကာအကွယ်ပေးတဲ့ ဒီမိုကရေစီ နိုင်ငံတခု ဖြစ်လာမှာပါ” ဟု ဒေါ်အောင်ဆန်းစုကြည်က ပြောသည်။
၈၈ မျိုးဆက် ကျောင်းသားများ အပါအ၀င် ပြည်တွင်းနိုင်ငံရေး အင်အားစုများ၊ တိုင်းရင်းသားများ ကလည်း ဒီမိုကရေစီ နိုင်ငံ အဖြစ် ဖွံ့ဖြိုး တိုးတက်ရေး အတွက် ပြည်တွင်း ငြိမ်းချမ်းရေး ရရှိရန် လိုအပ်ကြောင်း တရားဝင် ကြေညာချက်များ ထုတ်ပြန် တောင်းဆို နေကြသည်။
Ref: ဧရာဝတီ
ကချင်တွင် ထိုးစစ်ရပ်ရန် ကာချုပ်ကို သမ္မတ ညွှန်ကြားထား
ဖနိဒါ
တနင်္လာနေ့၊ ဒီဇင်ဘာလ ၁၂ ရက် ၂၀၁၁
ချင်းမိုင်(မဇ္ဈိမ) ။ ။ ကချင်ပြည်နယ်အတွင်း အစိုးရတပ်များ ထိုးစစ်ဆင်ခြင်း ရပ်ဆိုင်းထားရန် အတွက် သမ္မတ ဦးသိန်းစိန်က ကာကွယ်ရေး ဦးစီးချုပ် ဗိုလ်ချုပ်ကြီး မင်းအောင်လှိုင်ထံ ဒီဇင်ဘာလ ၁၀ ရက်နေ့က ညွှန်ကြားစာ ပို့ထားကြောင်း သိရသည်။
ကချင် စစ်ပြေးရှောင် ဒုက္ခသည်များအတွက် ပြည်ထောင်စု လွှတ်တော်ကိုယ်စားလှယ်များက ပထမဆုံး အကြိမ် ငွေကျပ် သိန်း ၇၀၀ နှင့် အဝတ် အထည်များ ပေးအပ်ပွဲနှင့် သတင်းစာ ရှင်းလင်းပွဲကို တနင်္လာနေ့က ပြုလုပ်ရာ၌ ၎င်းစာအား ကချင်ပြည်နယ် ဝန်ကြီးချုပ် ဦးလဂျွန်ငံဆိုင်းက ဖတ်ပြခဲ့ခြင်း ဖြစ်သည်။
“ကယ်ဆယ်ရေး အလှူငွေ ပေးအပ်ပွဲလုပ်ရင်းနဲ့ ဂျာနယ်သတင်းထောက်တွေကို ရှင်းလင်းပွဲ လုပ်ပါတယ်။ အဓိကတော့ တပ်ထိုးစစ် မဆင်ဖို့၊ ခုခံ တိုက်ခိုက်ရုံမှ လွဲပြီးမှ စစ်ကြောင်း မထိုးဖို့၊ သွားပြီးတော့မှ မတိုက်ဖို့ဆိုတဲ့ စာဖတ်ပြ တာပါ။”ဟု ဝန်ကြီးချုပ်နှင့် နီးစပ်သူ တဦးက မဇ္ဈိမကို ပြောသည်။
အဆိုပါ သတင်းစာ ရှင်းလင်းပွဲကို မြစ်ကြီးနားမြို့ရှိ မြို့တော်ခန်းမတွင် ပြုလုပ်ခြင်းဖြစ်ကာ နံနက် ၈ နာရီမှ စတင်ခဲ့ခြင်း ဖြစ်သည်။ ယင်းပွဲကို ပြည်နယ် ဝန်ကြီးများ၊ အစိုးရ ဌာနဆိုင်ရာ ဝန်ထမ်းများ၊ နိုင်ငံရေး ပါတီများ၊ ဘာသာရေး ခေါင်းဆောင်များ၊ ရပ်မိရပ်ဖများ၊ သတင်းထောက်များ အပါအဝင် စုစုပေါင်း လူ ၆ဝဝ ကျော် တက်ရောက်ခဲ့သည်။
“ကချင်ပြည်နယ်အတွင်း ငြိမ်းချမ်းရေး ဖော်ဆောင်ဖို့အတွက် ဦးစီးဦးဆောင်တွေ အလုပ်လုပ်နေတာ ဖြစ်တယ်။ အချင်းချင်း အထင်မှား အမြင်မှား မဖြစ်ဖို့။” ဟု အခမ်းအနား တက်ရောက်သူ မြစ်ကြီးနားမြို့ခံတဦးက ဆိုသည်။
ကချင်လွတ်မြောက်ရေးအဖွဲ့ KIO ကမူ အဆိုပါညွှန်ကြားစာနှင့်ပတ်သက်၍ တရားဝင် မသိရသေးကြောင်းနှင့် အစိုးရ ဘက်မှ ဆက်လက် ထိုးစစ်ဆင်နေပြီး ယနေ့ထိ တိုက်ပွဲများ ဖြစ်ပွားနေသည်ဟု ဆိုသည်။
“ဒီနေ့ထိ တိုက်ပွဲဖြစ်နေတုန်းဘဲ။ အခု တပ်အင်အားတွေ ထပ်တိုးချဲ့မယ့် အစီအစဉ်တွေလည်း ရှိနေသေးတယ်။ မနက်ဖြန်လည်း စောင့်ကြည့် ရမယ်။ ဒါပေမယ့် သူတို့ အစိုးရတပ် ကျနော်တို့ နယ်မြေထဲမှာ ဝင်ရောက်နေတယ် ဆိုရင်လည်း မရဘူး။ ကျနော်တို့က လုပ်သင့်တာ ဆက်လုပ်ရမှာပဲ။” ဟု KIO ပြောရေးဆိုခွင့်ရှိသူ ဦးလနန်က မဇ္ဈိမကို ပြောသည်။
မိုးမောက်မြို့နယ် KIA တပ်မဟာ ၃ လက်အောက်ခံ တပ်ရင်း ၁၅ နယ်မြေအတွင်း ယနေ့ထိ တိုက်ပွဲများ ဆက်လက် ဖြစ်ပွားနေဆဲ ဖြစ်သည်ဟု KIO စစ်ဘက် သတင်းများအရ သိရသည်။
အလားတူ ရှမ်းပြည်နယ်မြောက်ပိုင်း တပ်မဟာ ၄ နယ်မြေ ကွတ်ခိုင်မြို့နယ်အတွင်းတွင်လည်း ယခုလ ၁ဝ ရက်နေ့မှ စတင်၍ KIA ၏ တပ်ရင်း ၉ နယ်မြေ အတွင်းသို့ အစိုးရတပ်များ ယနေ့ထိ ဝင်ရောက်လာနေဆဲ ဖြစ်သည်ဟုလည်း သိရသည်။
“ကွတ်ခိုင်နယ် ဟူးဖြတ်ဒေသဘက်မှာ လက်နက်အပြည့်ပါလာတဲ့ လားတွေနဲ့ စစ်သား ၁ဝဝ ကျော် တနေ့ကနေ ကျနော်တို့ ရင်း ၉ နယ်ဘက်ကို ဝင်လာနေတာဘဲ။ သမ္မတက စာပို့တယ် ဆိုရင်လည်း ဒီနေ့ ၁၂ ရက်လေ။ စစ်ရေး လှုပ်ရှားမှုက လုံးဝ မရပ်သေးဘူး။ ထိုးစစ်ဆင်နေတဲ့ တပ်တွေဆုတ်တာ မရှိသေးဘူး။ အစိုးရက အမြဲတမ်း လိမ်နေတော့ ပြောတာနဲ့လုပ်တာ တခြားစီပဲ။”ဟု တပ်မဟာ ၄ တာဝန်ခံ ဗိုလ်မှူးကြီး ဇော်ရော်က မဇ္စျိမကို ပြောသည်။
Ref: မဇ္ဈိမ
အစိုးရနှင့် ကလိုထူးဖော အဖွဲ့ ပမာဏငြိမ်းချမ်းရေး လက်မှတ်ထိုး
မင်းသက်
တနင်္လာနေ့၊ ဒီဇင်ဘာလ ၁၂ ရက် ၂၀၁၁
ရန်ကုန် (မဇ္ဈိမ)။ ။ ကရင်ပြည်နယ်ကို ပြည်ထောင်စုအတွင်းခွဲ ခွဲမထွက်ရန် အပါအ၀င် အစိုးရနှင့် တိုးတက်သော ဗုဒ္ဓဘာသာ ကရင်အမျိုးသား တပ်မတော် အဖွဲ့ကွဲ တခုတို့ ပမာဏ ငြိမ်းချမ်းရေး တည်ဆောက်မှု သဘောတူညီချက်ကို ဒီဇင်ဘာ ၁၁ ရက်နေ့က ကရင်ပြည်နယ် ဘားအံမြို့တွင် လက်မှတ် ရေးထိုးခဲ့ကြသည်ဟု နိုင်ငံပိုင် ရုပ်မြင်သံကြားက ကြေညာသွားသည်။
ပြည်ထောင်စုအဆင့် ငြိမ်းချမ်းရေး ဆွေးနွေးသော အဖွဲ့ခေါင်းဆောင် တောင်သာမြို့နယ် အမတ် ဦးအောင်သောင်း ဦးဆောင်သော အဖွဲ့ဝင် ၇ ဦးနှင့် ကလိုထူးဖောမှ ဦးစောနန်းဖွယ် ဦးဆောင်သော အဖွဲ့ဝင် ၆ ဦးတို့ ဘားအံမြို့တွင် နိုဝင်ဘာ သုံး ရက်နေ့က ပြုလုပ်သော ပြည်နယ်အဆင့် ပမာဏ ဆွေးနွေးပွဲမှ ရရှိသော သဘော တူညီချက်များကို အခြေခံပြီး ဒီဇင်ဘာ ၁၁ ရက်နေ့တွင် ထပ်မံ ဆွေးနွေးရာက သဘောတူလက်မှတ် ရေးထိုးနိုင်ခြင်း ဖြစ်သည်ဟု မြန်မာ့ ရုပ်မြင်သံကြား၏ သတင်း တရပ်တွင် ပါရှိသည်။
"ထာဝရ ငြိမ်းချမ်းရေးတည်ဆောက်ဖို့ ဆက်ဆွေးနွေးသွားရန် သဘောတူကြပြီး ကရင်ပြည်နယ်သည် ပြည်ထောင်စု သမ္မတ မြန်မာနိုင်ငံ၏ အရေးပါသော အစိတ်အပိုင်းတခု ဖြစ်သည့် ကရင်ပြည်နယ်ကို ပြည်ထောင်စု အတွင်းမှ မည်သည့်အခါမှ ခွဲမထွက်ရန် သဘောတူသည်။” ဟု စာချုပ်၏ အချက်အရ သိရသည်။
ကရင်အဖွဲ့၏ ယာယီအခြေပြုဒေသ နယ်မြေဖွံ့ဖြိုးတိုးတက်ရေးနှင့် အဖွဲ့ဝင်များ လူနေမှု ဘ၀ မြှင့်တင်နိုင်ရန် အလုပ်အကိုင်နှင့် အထောက်အပံ့များ ပေးရေးတို့လည်း သဘော တူထားကြသည်။
ထို့အပြင် ကလိုထူးဖောအဖွဲ့အနေဖြင့် မူးယစ်ဆေးဝါးတိုက်ဖျက်ရေးလုပ်ငန်းကို ဗဟိုအစိုးရနှင့် ပူးပေါင်း ဆောင်ရွက်ရန်လည်း သဘော တူလိုက်ကြသည်။
Ref: မဇ္ဈိမ
Monday, December 12, 2011
ဒေါ်အောင်ဆန်းစုကြည် ငြိမ်းချမ်းရေး နိုဘယ်ဆုရရှိခြင်း နှစ် ၂ဝ ပြည့်
2011-12-10
ဒေါ်အောင်ဆန်းစုကြည် ကြိုးပမ်းဆောင်ရွက်နေတဲ့ ငြိမ်းချမ်းရေးပန်းတိုင်ကို တက်လှမ်းနိုင်ရေး အတွက် ဝိုင်းဝန်းပါဝင် ဆောင်ရွက် ကြဖို့ ဒီကနေ့ ကျင်းပတဲ့ ဒေါ်အောင်ဆန်းစုကြည် ငြိမ်းချမ်းရေး နိုဘယ်ဆုရရှိခြင်း နှစ် ၂ဝ ပြည့် အခမ်းအနားမှာ NLD ပါတီ ခေါင်းဆောင်တဦး ဖြစ်တဲ့ ဦးဝင်းတင်က ပြည်သူကို ပန်ကြားလိုက်ပါတယ်။
ဒေါ်အောင်ဆန်းစုကြည် တက်ရောက်ပြီး မိန့်ခွန်းပြောကြားခဲ့တဲ့ ဒီကနေ့ အခမ်းအနားကို ရန်ကုန် ကြည့်မြင်တိုင် မြို့နယ် ရွှေညဝါ သာဓု ပရိယတ္တိ စာသင်တိုက်မှာ ကျင်းပခဲ့တာပါ။
ဒီအခမ်းအနားမှာ ဦးဝင်းတင်က… ဒေါ်အောင်ဆန်းစုကြည်ရဲ့ ဆောင်ရွက်ချက်တွေကို ပြည်သူက အသိအမှတ် ပြုခဲ့ပြီး ဖြစ်သလို ကမ္ဘာကလည်း အသိအမှတ် ပြုတာကြောင့် ငြိမ်းချမ်းရေး နိုဘယ်ဆုကို ချီးမြှင့်ခံရတာလို့ ဆိုပါတယ်။ ဒေါ်အောင်ဆန်းစုကြည်ရဲ့ ငြိမ်းချမ်းရေး ဆောင်ရွက်ချက်တွေကို ဝိုင်းဝန်းကြဖို့ ဦးဝင်းတင်က အခုလို ပြောပါတယ်။
“ဒေါ်အောင်ဆန်းစုကြည်က ငြိမ်းချမ်းရေးပန်းတိုင်ကို ချီတက်နေတဲ့ လှေကြီးကို ပဲ့ကိုင်ပြီး လှော်ခတ်နေတဲ့ အချိန်မှာ ပြည်သူပေါင်း များစွာ လူငယ်ကျောင်းသား များစွာ ပါဝင် လှော်ခတ်နေကြ သလိုပဲ တချို့သော ပုဂ္ဂိုလ်များဟာ မိမိတို့ဆန္ဒ အလျောက် ကြိုးပမ်း နေကြတဲ့ ပုဂ္ဂိုလ်များလည်း ရှိပါတယ်။ ဘာနဲ့တူလဲ ဆိုတော့ လှေကြီးပေါ်ကနေပြီးတော့ ဘေးမှာဆင်းပြီး ရေကူး လိုက်နေတဲ့ ပုဂ္ဂိုလ်များလည်း ရှိပါတယ်။ အဲဒီတော့ ကျနော်တို့ မေတ္တာရပ်ခံ တိုက်တွန်း ချင်တာက စောစောက ဒေါ်အောင်ဆန်းစုကြည် ပြောခဲ့တဲ့ အတိုင်းပဲ ဒီ ငြိမ်းချမ်းရေး ခရီးအတွက် လှေကြီးကို လှော်ခတ်မြဲ ဖြစ်ပါတယ်၊ လှေပေါ်မှာလည်း ပြည်သူတွေ၊ ကျောင်းသား လူငယ်တွေ၊ ရဟန်းသံဃာတွေ အားလုံး ပါဝင်ပြီး လှော်ခတ် နေကြပါတယ်၊ အဲဒီအချိန်မှာ ဘေးကနေပြီး မိမိတို့ရဲ့ ဆန္ဒ၊ ဆုံးဖြတ်ချက်၊ သဘောထားအတိုင်း ရေကူးပြီး သွားနေတဲ့ ပုဂ္ဂိုလ်များကိုလည်း လှေပေါ်တက်ပြီးတော့ တစုတဝေးထဲ ငြိမ်းချမ်းရေး ပန်းတိုင် ရောက်အောင် ဒေါ်အောင်ဆန်းစုကြည်ရဲ့ ဦးဆောင်မှုအောက်ကနေ လှော်ခတ်သွားကြပါလို့ ကျနော် တိုက်တွန်းရင်း နိဂုံးချုပ်ပါတယ်”
ဒီအခမ်းအနားကို ဒေါ်အောင်ဆန်းစုကြည် ငြိမ်းချမ်းရေး နိုဘယ်ဆု ရရှိချိန် ၁၉၉၁ ခုနှစ်က ဆုလက်ခံ ယူနိုင်ရေး အတွက် ဒေါ်အောင်ဆန်းစုကြည်ကို နေအိမ် အကျယ်ချုပ်က လွှတ်ပေးဖို့ ဆန္ဒပြတောင်းဆိုခဲ့တဲ့ အတွက် ဖမ်းဆီး အကျဉ်းချ ခံခဲ့ရတဲ့ 10/D ကျောင်းသား အဖွဲ့က ကြီးမှူးကျင်းပခဲ့တာပါ။
အခမ်းအနား မကျင်းပခင် ဒေါ်အောင်ဆန်းစုကြည်က ရွှေညဝါ ဆရာတော်ရဲ့ ရန်ကုန် ဗုဒ္ဓတက္ကသိုလ် ပိဋကတ် စာကြည့်တိုက်ကို ဖဲကြိုးဖြတ် ဖွင့်လှစ်ပေးတယ်လို့ အခမ်းအနား ကျင်းပရေး တာဝန်ခံ တဦးဖြစ်တဲ့ ကိုကိုကြီး (စမ်းချောင်း) က ပြောပါတယ်။
အခမ်းအနားကို နိုင်ငံခြားသံတမန်တွေ၊ ကျောင်းသားတွေ၊ နိုင်ငံရေး ပါတီတွေနဲ့ စိတ်ဝင်စားသူ ပြည်သူတွေ စုစုပေါင်း ၁ ထောင်ကျော် တက်ရောက် ခဲ့ပါတယ်။
Ref: RFA News
မြန်မာ ဒု- နိုင်ငံခြားရေးဝန်ကြီးက 'ဒီမိုကရေစီ ခြေလှမ်းတော်တော် ရောက်နေပြီ' ဟုပြော
သောကြာနေ့၊ ဒီဇင်ဘာလ ၀၉ ရက် ၂၀၁၁
မြန်မာ ဒုတိယနိုင်ငံခြားရေးဝန်ကြီး ဦးမောင်မြင့်က သူ၏အစိုးရသည် “ဒီမိုကရေစီခြေလှမ်း တော်တော် ရောက်နေပြီ” ဟု မဇ္ဈိမ သတင်းဌာနှင့် တွေ့ဆုံ မေးမြန်းခန်းတွင် ပြောကြား သွားသည်။
အင်ဒိုနီးရှားနိုင်ငံ ဘာလီကျွန်းတွင် ကြာသပတေးနေ့က ကျင်းပသော စတုတ္တအကြိမ် ဘာလီဒီမိုကရေစီ ဖိုရမ်ကို တက်ရောက် ခဲ့သည့် ဦးမောင်မြင့်ဟာ လူ့အခွင့်အရေးသည် ဒီမိုကရေစီ၏ ပင်မ ဒေါက်တိုင်ကြီး ဖြစ်သည် ဆိုသည်ကို လက်ခံကြောင်း ပြောဆို သွားခဲ့သည်။
ကချင်ဒေသက စစ်ဘေးရှောင်ဒုက္ခသည်အတွက် မြန်မာနိုင်ငံ အမျိုးသားလူ့အခွင့်အရေး ကော်မရှင်က သွားရောက်ပြီး အထောက် အပံ့များ ပေးရန် စီစဉ်ထားသည်ဟုလည်း ဦးမောင်မြင့်က မဇ္ဈိမကိုပြောသည်။
ဦးမောင်မြင့်က ၂ဝ၁ဝ ရွေးကောက်ပွဲတွင် မဲသမာမှုများရှိသည်ဟူသည့် ပြောဆိုချက်များကို “မှားယွင်းတဲ့ စွပ်စွဲချက်တွေ”ဟု ငြင်းဆန်လိုက်ပြီး မြန်မာနိုင်ငံ၏ ရွေးကောက်ပွဲနှင့် ပတ်သက်သော လုပ်ထုံး လုပ်နည်း အချို့မှာ နိုင်ငံတကာ ကပင် အတုယူရမည့် ကိစ္စဟု တင်စားပြောသွားသည်။
ဦးမောင်မြင့်ကို မဇ္ဈိမအယ်ဒီတာချုပ် ဦးစိုးမြင့်က မေးမြန်းထားခြင်းဖြစ်သည်။
ဒီမိုကရေစီအသွင် အကူးအပြောင်းပေါ့နော်၊ တပ်ကလည်း စအာဏာသိမ်းကတည်းက ဒီမိုကရေစီ အသွင် ကူးပြောင်းပြီ လို့ပေါ့။ အစိုးရ ဘက်ကလည်း ပြောတာပေါ့နော်။ အဲဒီတော့ ဘယ်လိုမျိုး အချက်တွေက ဝန်ကြီးအနေနဲ့ ပြောပြလို့ရလဲ။ ဘယ်လို အချက်တွေက ဥပမာ သတင်းစာ လွတ်လပ်ခွင့်လား။ ဒါမှမဟုတ် ဘယ်လိုမျိုး အချက်တွေက ဒီမိုကရေစီ အသွင် ကူးပြောင်းပြီလို့ ပြောလို့ရလဲ။
“ဒီလိုကြားဖြတ်ပြောတာထက်စာလို့ရှိရင်တော့ ကျနော်တို့ မြန်မာနိုင်ငံရဲ့ သမိုင်းကြောင်းတော့ အရင် သွားရလိမ့် မယ်ထင်တယ်။ ကျနော်တို့ ၁၉၄၈ ခုနှစ် လွတ်လပ်ရေးရပြီးတဲ့ နောက်ပိုင်းမှာ ကျနော်တို့က ပါလီမန် ဒီမိုကရေစီကို ကျင့်သုံးခဲ့တယ်။ ဒါပေမယ့်လည်း အဲဒီ အချိန်တုန်းက ပါတီတွင်း အားပြိုင်မှုတွေ၊ နောက်တခါ တိုင်းရင်းသားတွေရဲ့ ခွဲထွက်လိုတဲ့ ဖက်ဒရယ် တောင်းဆိုမှုတွေနဲ့ အတူ ပြည်တွင်းရေး မငြိမ်မသက်မှုတွေ၊ သောင်းကျန်းသူတွေရဲ့ ပြည်တွင်း မငြိမ်မသက်ဖြစ်အောင် ဆောင်ရွက်မှုတွေနဲ့၊ အကုန်လုံး အကြောင်းပေါင်းတွေ စုံလာပြီးတော့မှ တပ်မတော်က အာဏာ သိမ်းခဲ့တာဖြစ်တယ်။”
“၁၉၆၂ ခုနှစ် တပ်မတော် အာဏာသိမ်းပြီးတဲ့ နောက်ပိုင်းမှာတော့ ပါလီမန်ဒီမိုကရေစီဟာ နိုင်ငံအတွက် မကောင်းမှု တွေကို ဖြစ်စေတယ်ဆိုတဲ့ အဲဒီအချိန်တုန်းက လူကြီးတွေရဲ့ အယူအဆအရပဲ တပါတီစနစ်ကို သွားလိုက်တာ ဖြစ်တယ်။ အဲဒါ မှားတယ် မှန်တယ် ဆိုတာကိုတော့လည်း သမိုင်းက အဆုံးဖြတ် ပေးပြီးပြီ ဖြစ်ပါတယ်။”
“အဲဒီတော့ ဒီတပါတီစနစ်ရဲ့ ဗဟိုဦးစီးတဲ့ စီးပွားရေးစနစ်ရဲ့ lag out ဖြစ်မှုတွေ၊ နောက်တခါ ပြည်တွင်းမှာ မငြိမ်မသက် ဖြစ်မှုတွေ၊ ပြည်တွင်း မငြိမ်မသက် ဖြစ်မှုဆိုတာလည်း အဓိကကတော့ သောင်းကျန်းသူတွေ ကြောင့်မို့လို့ နိုင်ငံ တနိုင်ငံလုံးမှာ Law Enforcement မရှိတဲ့ ကိစ္စတွေ၊ Peace and Stability မတည်ဆောက်နိုင်တဲ့ ကိစ္စတွေရဲ့ အကျိုးဆက်တွေ အရ စီးပွားရေး ပြိုလဲမှုနဲ့အတူ လူထုက လက်မခံနိုင်လောက်တဲ့ အချိန်မှာ မြန်မာ့ဆိုရှယ်လစ် လမ်းစဉ်ပါတီ ပြုတ်ကျသွားတဲ့ ကိစ္စဖြစ်ပါတယ်။”
“အဲဒီတော့ တပ်မတော် အာဏာယူခဲ့တဲ့ ၁၉၈၈ ခုနှစ် စက်တင်ဘာ ၁၈ ရက်နောက်ပိုင်းမှာ တပ်မတော်အနေနဲ့ သွားချင်တဲ့ လမ်းကြောင်းကို သွားဖို့အတွက် အခွင့်အရေး ရှိတယ်။ ဒါပေမယ့် နိုင်ငံတကာရဲ့ တောင်းဆိုမှု အရရော၊ ပြည်တွင်းက လူတွေရဲ့ တောင်းဆိုမှုအရရော ဒီမိုကရေစီကို သွားမယ် ဆိုပြီးတော့မှ အဲဒီအချိန်တုန်းက အခိုင်အမာ ဆုံးဖြတ်ပြီး ဖြစ်တယ်။ ဒါပေမယ့် ဥပမာအရ ပြောရမယ်ဆိုလို့ ရှိရင်တော့ Rome wasn't built overnight တဲ့၊ အဲဒီတော့ ဒီမိုကရေစီ နိုင်ငံကြီးကို တန်းပြီး တည်ဆောက်လို့တော့ မဖြစ်နိုင်ဘူး။ ကျနော်တို့ သိပ်နုနယ်သေးတဲ့ နိုင်ငံတွေဟာ ဒီမိုကရေစီကို သွားရင်းနဲ့ အချိန်တို အတွင်းမှာပဲ ပြိုကွဲ သွားတာတွေကိုလည်း အာဖရိကမှာ တွေ့နေရ ပါတယ်။ ဒါကြောင့်မို့လို့ အဲဒီအချိန်တုန်းက ရှိတဲ့ လူကြီးတွေက ဒီမိုကရေစီကို သွားမယ် ဆိုရင်တော့ အချက် သုံးချက် အဓိက အရေးကြီးတယ်လို့ ဆုံးဖြတ်ခဲ့တယ်။ နံပတ်တစ် အချက်ကတော့ Peace and Stability၊ နံပတ်နှစ် ကတော့ Economic Development၊ နံပတ်သုံး ကတော့ Human Resources Development အဲဒီသုံးချက်ကို တည်ဆောက် ဖို့ လိုတယ်လို့ ခံယူခဲ့တယ်။”
“ဒါကြောင့်မို့လို့ အဲဒီ သုံးချက်ကို တည်ဆောက်နေရင်းနဲ့ပဲ ခိုင်မာတဲ့ ဖွဲ့စည်းပုံအခြေခံ ဥပဒေရအောင် အမျိုးသား ညီလာခံ ခေါ်တယ်။ အမျိုးသား ညီလာခံမှာ ဖွဲ့စည်းပုံအခြေခံ အတွက် အခြေခံရမယ့် အချက်တွေကို ချမှတ် နိုင်ခဲ့တယ်။ အဲဒါတွေကို ဆက်လက်ပြီး လုပ်ဆောင်ရင်းနဲ့ပဲ အားလုံး သိပြီးဖြစ်တဲ့ အတိုင်း ဖွဲ့စည်းပုံ အခြေခံ ဥပဒေကိုလည်း ၉၂.၄၈ ရာခိုင်နှုန်းသော မဲဆန္ဒပေးတဲ့ လူတွေရဲ့ တခဲနက် ထောက်ခံမှုနဲ့ အတည်ပြု နိုင်ခဲ့ပြီးတဲ့နောက်ပိုင်းမှာ ဒီဖွဲ့စည်းပုံ အခြေခံ ဥပဒေအရပဲ ရွေးကောက်ပွဲကို ဆက်လက် ဆောင်ရွက်တယ်။ ဒီမိုကရေစီနိုင်ငံကို သွားနေတာဖြစ်တယ်။ ဒီမိုကရေစီ ဆိုတာကတော့ သူက စံနှုန်းတွေကတော့ မတူနိုင်သေးပါဘူး။ ဒါပေမယ့်လည်း ကျနော်တို့က အခု အင်မတန် နုနယ်သေးတဲ့ ရှစ်လသားသာရှိတဲ့ ဒီမိုကရေစီ နိုင်ငံတခု ဖြစ်တယ်။ ဒါကြောင့်မို့လို့ ရင့်ကျက်နေပြီးတဲ့ ဒီမိုကရေစီ နိုင်ငံတွေ စံနှုန်းနဲ့တော့လည်း အခုချိန်မှာ ဘယ်လိုမှ မတူနိုင်ဘူး။”
“ဒါပေမယ့် ကျနော်တို့သည် ဒီနေ့ ဒီ Democracy Forum မှာ ဆူစီလိုဘန်ဘန်း ပြောကြားသွားတဲ့ အထဲမှာလည်း ပါတယ်။ ဒါကတော့ ဘာလဲ ဆိုလို့ရှိရင် Human Rights ဟာ ဒီမိုကရေစီရဲ့ Pillar ဖြစ်တယ်ဆိုတာ ကျနော် လက်ခံတယ်။ ဒါကြောင့်မို့လို့ ကျနော်တို့ဟာ Human Rights ကိုလည်း တည်ဆောက်ရမယ်။ Human Rights ကိုတည်ဆောက်နိုင်ဖို့ အတွက်ကိုလည်း ကျနော်တို့က National Human Rights Commission ဆိုတာကို ဦးမြ (ဦးမရ) ဦးစီးပြီးတော့မှ ဖွဲ့စည်း တည်ဆောက်ထားပြီး ဖြစ်တယ်။”
“National Human Rights Commission ကလည်း Independent အဖွဲ့အစည်းတခုဖြစ်ပြီးတော့ သူလည်း နိုင်ငံတော် အသစ်မှာ လုပ်ဆောင်နိုင်သမျှတွေ အားလုံးကို ကြိုးစားပြီး လုပ်ဆောင်နေတာကို အားလုံးအသိပဲ ဖြစ်ပါတယ်။ ဒါကြောင့်မို့လို့ ကျနော်တို့ကတော့ ဒီမိုကရေစီကို သွားမယ် ဆိုတဲ့ နေရာမှာ တကယ့် နိုင်ငံကြီးတွေရဲ့ ရင့်ကျက်ပြီးသား ဒီမိုကရေစီ အတိုင်းတော့လည်း ချက်ချင်း မဖြစ်နိုင်ဘူး။ သို့သော် တဆင့်ပြီးတဆင့် လုပ်ဆောင် နေတယ်။ ဒါကိုလည်း နိုင်ငံတကာက ကျနော်တို့ လေးစားပြီးတော့မှ အသိအမှတ် ပြုတာကိုလည်း ကြားသိရပါတယ်။”
“အထူးသဖြင့်တော့ ဒီ Democracy Forum မှာ ကျနော်တက်ရောက်တာ သုံးကြိမ်မြောက် ဖြစ်တယ်။ အရင် အခေါက်တွေ တုန်းက ကျနော့် အပေါ်မှာ စိတ်ဝင်စားမှု ရှိတယ်။ ဒါကတော့ ဒီမိုကရေစီကို သွားမသွား ဆိုတာနဲ့ ပတ်သက်ပြီး စိတ်ဝင်စားမှု ရှိတယ်။ အခု တခေါက်တွေမှာတော့ ကျနော်တို့ ဒီမိုကရေစီကို သွားနေပြီ၊ ဒီမိုကရေစီကို ကျနော်တို့က ခြေလှမ်းတော်တော် ရောက်နေပြီ ဆိုတာတွေကို သိတဲ့ အတွက်ကြောင့်မို့လို့ Acknowledge လုပ်တာနဲ့အတူ ကျနော်တို့ကို အားပေးတယ်လို့ သိရတဲ့အတွက် ကျနော်တို့က အများကြီး သူတို့ကိုလည်း ကျေးဇူးတင်တယ်။ ဝမ်းလည်း ဝမ်းသာပါတယ်။”
အခု ရှစ်လတာ ဒီမိုကရေစီ ပြောင်းတဲ့ ကာလဆိုတော့ နုနယ်တာတော့ ဟုတ်တယ်ပေါ့။ အဲဒီတော့ ဘယ်လိုမျိုးရှေ့ဆက်ပြီးတော့ ဒီမိုကရေစီ အတွက် ဦးတည်တဲ့ အတိအကျ လှုပ်ရှားမှုတွေ လုပ်မယ်လို့ စဉ်းစားထားလဲ။ ဥပမာအားဖြင့် National Human Rights Commission လူ့အခွင့်အရေး ကော်မရှင် ဆိုရင် ပြည်သူတွေက သူတို့ကို လူ့အခွင့်အရေး ချိုးဖောက်မှုတွေ ရှိတယ်ဆိုရင် ဘယ်လိုမျိုး တိုင်ကြားလို့ ရတယ်၊ အဲဒီလို အသေးစိတ်တွေပေါ့နော် လုပ်ဆောင်မယ့် လုပ်ငန်းတွေရှိသလား။
“National Human Rights Commission ကို ပြည်သူတွေက တဦးချင်းသော်လည်းကောင်း၊ အစုအဖွဲ့နဲ့သော် လည်းကောင်း၊ နစ်နာမှုတွေ ရှိရင် တိုင်ကြားနိုင်တယ် ဆိုပြီးတော့မှ တရားဝင်ပြောကြားထားပြီး ဖြစ်တယ်လို့ ကျနော် သိရပါတယ်။ တိုင်ကြားစာ တွေလည်း တချို့ ရောက်ရှိနေပြီလို့လည်း ကျနော်သိရတယ်။ သို့သော်လည်း National Human Rights Commission က ခုမှ စပြီးတော့မှ Establish လုပ်တဲ့ အတွက်ကြောင့်မို့လို့ သူတို့အနေနဲ့ အင်မတန်ကို လုပ်ငန်း ဆောင်တာတွေက အင်မတန် ကျယ်ပြန့်ပါတယ်။ အခု ကျနော် နားလည် သလောက်ကတော့ ဒါတွေအားလုံးကိုလည်း သူတို့ စတင်ပြီး ကိုင်တွယ် နေတယ်လို့ ကျနော်သိရတယ်။”
“အလားတူပဲ အခု မြန်မာပြည်မြောက်ပိုင်းမှာဖြစ်နေတဲ့ ကချင်ဒေသမှာ ရှိနေတဲ့ တချို့သော နည်းနည်း ဒုက္ခရောက်နေတဲ့ လူထု အချို့အတွက်ကိုလည်း National Human Rights Commission ကပဲ တာဝန်ရှိတဲ့ ပုဂ္ဂိုလ်တချို့က နေပြီးတော့မှ သွားရောက် ပြီးတော့မှ Assistance တွေပေးမယ် ဆိုတာလည်း ကျနော် သိရှိရပါတယ်။”
အသွင်ကူးပြောင်းရေးကာလမှာ ထုံးစံအတိုင်းပေါ့၊ တခြားနိုင်ငံတွေရဲ့ အတွေ့အကြုံ၊ ဒေသအတွင်းက အတွေ့ အကြုံတွေက မြန်မာပြည် အတွက်တော့ တူတဲ့နေရာ သုံးလို့ရတဲ့ဟာတွေ ရှိမှာပါ။ အဲဒီတော့ မြန်မာနိုင်ငံ အစိုးရကရော ဒေသအတွင်းက နိုင်ငံတွေကိုပဲ ဖြစ်ဖြစ်၊ နိုင်ငံတကာရဲ့ အတွေ့အကြုံတွေပဲ ဖြစ်ဖြစ်၊ ထောက်ပံ့မှုတွေပဲ ဖြစ်ဖြစ် အဲဒီလိုမျိုး လိုအပ်ရင် တောင်းဆိုဖို့ လိုဟာ ရှိသလား။ တကယ်လို့ရှိတယ် ဆိုရင် ဥပမာ ဘယ်လိုမျိုး ကဏ္ဍတွေမှာ တောင်းဆိုဖို့ စဉ်းစားထားလဲ။
“ကျနော်တို့ကတော့ ကျနော်တို့မြန်မာနိုင်ငံဟာလည်း ကျနော် ရှင်းလင်းတင်ပြခဲ့ပြီးဖြစ်တဲ့အတိုင်း ဒီမိုကရေစီနဲ့ မစိမ်းပါဘူး။ ကျနော်တို့က ၁၉၄၈-၁၉၅၂ မှာ ကျနော်တို့က ပါလီမန် ဒီမိုကရေစီကို အပြည့်အဝ ကျင့်သုံးခဲ့ပြီးတဲ့ နိုင်ငံ ဖြစ်သလို၊ အဲဒီ အချိန်မှာတုန်းကလည်း ကျနော်တို့က ဒေသတွင်းမှာ Leading Role ရတဲ့ နိုင်ငံ တနိုင်ငံ ဖြစ်ခဲ့ ပါတယ်။”
“ဒါကြောင့်မို့လို့ အခု ဒီ ၂ဝ၁ဝ ခုနှစ် ရွေးကောက်ပွဲအပြီးမှာ ၂ဝ၁၁ ခုနှစ် မတ်လ ၃ဝ ရက်နေ့မှာ စတင်ပြီး တည်ဆောက်ခဲ့တဲ့ Democratic Government အနေနဲ့ သော်လည်းကောင်း၊ Democratic State အနေနဲ့သော် လည်းကောင်း ကျနော်တို့ ကတော့ နိုင်ငံတကာရဲ့ အတွေ့အကြုံတွေကိုတော့ ကျနော်တို့ လေ့လာနေတာ ရှိပါတယ်။ နိုင်ငံတော် သမ္မတကြီးကလည်း အင်မတန် အတွေ့အကြုံ ရင့်ကျက်ပြီးသား ပုဂ္ဂိုလ်တဦး ဖြစ်သလို၊ သူ့မှာလည်း နိုင်ငံရေး အကြံပေးတွေ ရှိပါတယ်။ အလားတူပဲ လိုအပ်ချက်တွေ အားလုံးကိုလည်း နိုင်ငံတော် သမ္မတကြီးက သူ့ဆီကို ရေးသားတဲ့ စာတွေပဲဖြစ်ဖြစ်၊ တဦးချင်း သော်လည်းကောင်း၊ ပြောဆိုတာတွေပဲ ဖြစ်ဖြစ် အားလုံးကို သူက နွေးထွေးစွာနဲ့ ကြိုဆိုပြီးတော့မှ ချင့်ချိန်ပြီးတော့မှ အားလုံး ဆောင်ရွက်နေတဲ့ သဘော ဖြစ်ပါတယ်။ ဒါကြောင့်မို့လို့ နိုင်ငံတကာ အတွေ့အကြုံ တွေကိုလည်း သူ့ရဲ့ နိုင်ငံရေး အကြံပေးတွေက ဖတ်ရှုပြီးတော့မှ သူ့ကို အကြံပေးနေမှာ ဖြစ်ပါတယ်။”
“အလားတူပဲ ကျနော်တို့ နိုင်ငံခြားရေးဝန်ကြီးဌာန အနေနဲ့လည်း နိုင်ငံတကာအတွေ့အကြုံတွေ အခုလို Democracy Forum သွားပြီး တက်ခဲ့တယ် ဆိုလို့ရှိရင်လည်း ဒီ Forum မှာရှိတဲ့ အတွေ့အကြုံတွေ အားလုံးကို ကျနော်တို့က ပြန်လာလို့ရှိရင် လူကြီးတွေကို တင်ပြရမှာ ဖြစ်ပါတယ်။ တင်ပြချက်တွေ အားလုံးဟာ သူတို့ လိုအပ်သလို စီစစ်ပြီး တော့မှ၊ ထုတ်နုတ်ပြီးတော့မှ ကိုယ့်နိုင်ငံအတွက် အကျိုးရှိမယ့်ဟာ အားလုံးကို သုံးစွဲ သွားလိမ့်မယ်လို့ ကျနော် ဒီလိုပဲ ယုံကြည်ပါတယ်။”
လက်ရှိ ဖြစ်ပေါ်နေတဲ့ အခြေအနေပေါ့နော်။ ကြားဖြတ်ရွေးကောက်ပွဲ ပြုလုပ်မယ်လို့ဆိုတယ်။ ကြားဖြတ် ရွေးကောက်ပွဲကို ဘယ်တော့လောက် လုပ်မယ်လို့ ခန့်မှန်းသလဲ ခင်ဗျ။
“ရွေးကောက်ပွဲကော်မရှင်ပေါ့။ ဦးတင်အေး ဥက္ကဋ္ဌအဖြစ် တာဝန်ယူဆောင်ရွက်ပါတယ်။ ရွေးကောက်ပွဲ ကော်မရှင် ကလည်း အခုအချိန် အထိ ကြားဖြတ် ရွေးကောက်ပွဲ လုပ်မယ့်ရက်ကို မကြေညာ သေးပါဘူး။ အဲဒီတော့ ဖွဲ့စည်းပုံ အခြေခံ ဥပဒေအရ ဆိုရင်တော့ ကြားဖြတ် ရွေးကောက်ပွဲ ပြုလုပ်မယ်ဆိုရင်လည်း သုံးလ ကြိုတင်ပြီးတော့မှ ကြေညာရမှာ ဖြစ်တဲ့ အတွက်ကြောင့်မို့လို့ နောက်ထပ် သုံးလ အတွင်း မလုပ်နိုင်သေးဘူးလို့တော့ သုံးသပ်လို့ ရတဲ့ အနေအထား ဖြစ်ပါတယ်။ ဒါကိုလည်း ပြည်သူ့ လွှတ်တော်ဥက္ကဋ္ဌ သူရဦးရွှေမန်းက မီဒီယာတွေနဲ့ ပြီးခဲ့တဲ့ နှစ်ပတ် လောက်က တွေ့တဲ့အချိန်မှာ မီဒီယာတွေရဲ့ မေးမြန်းချက်ကို ဒီအတိုင်းပဲ ဖြေကြား သွားတာကိုလည်း လေ့လာ မှတ်သားမိပါတယ်။”
“သို့သော်လည်း လာမယ့် ကြားဖြတ်ရွေးကောက်ပွဲကတော့ဖြင့် ပြီးခဲ့တဲ့ ၂ဝ၁ဝ ခုနှစ် နိုဝင်ဘာလက ကျင်းပခဲ့တဲ့ ရွေးကောက်ပွဲထက် စာလို့ရှိရင် ပိုပြီးတော့မှ Transparent ဖြစ်အောင်၊ ပိုပြီးတော့မှ Fairness ဖြစ်အောင် ဆောင်ရွက် မယ် လို့လည်း အတိအလင်း ထုတ်ပြန်ပေးထားပြီး ဖြစ်ပါတယ်။”
ဟုတ်ကဲ့။ ဝမ်းသာပါတယ်။ ဒီ Free and Fair ပေါ့။ လွတ်လပ်ပြီး တရားမျှတတဲ့ ရွေးကောက်ပွဲဖြစ်ဖို့၊ ဘာလို့လဲဆိုတော့ ၂ဝ၁ဝ နိုဝင်ဘာတုန်းက ရွေးကောက်ပွဲက လွတ်လပ်တဲ့ အဖွဲ့အစည်းတွေ အထူးသဖြင့် နိုင်ငံတကာက အဖွဲ့အစည်း တချို့တွေ ထောက်ပြတာက၊ အထူးသဖြင့် မဲမသမာမှုတွေ ရှိတယ်ပေါ့ ဆိုတဲ့အချက်ကို ထောက်ပြခဲ့တယ်။ ဝန်ကြီးတို့ အစိုးရအနေနဲ့ လက်ခံတာ လက်မခံတာကတော့ တပိုင်းပေါ့။ သူတို့ကတော့ ထောက်ပြတယ်။ အခုလုပ်မယ့် ဒီကြားဖြတ် ရွေးကောက်ပွဲမှာ အစိုးရ အနေနဲ့ တရားမျှ တပြီး လွတ်လပ်တဲ့ ရွေးကောက်ပွဲဖြစ်အောင် ဘယ်လိုမျိုး ဆောင်ရွက်မယ်လို့ စဉ်းစားထားလဲ ခင်ဗျ။
“နိုင်ငံတကာက တချို့သော Wrong Accusation နဲ့ပတ်သက်ပြီးတော့လည်း ကျနော် ဒီနေရာကနေ ဖြေကြား ချင်တယ်။ အဲဒါကတော့ ပြီးခဲ့တဲ့ ၂ဝ၁ဝ ရွေးကောက်ပွဲမှာ တချို့နေရာတွေမှာ Free and Fair မဖြစ်ဘူးဆိုတာနဲ့ ပတ်သက်ပြီးတော့ ဘယ်နေရာတွေလဲ ဆိုတာလည်း ကျနော်တို့က အတိအကျ မသိပါဘူး။ အဲဒီတော့ ဘယ်နေရာတွေလဲလို့ မေးလို့ ရှိရင်တော့လည်း အဲဒါတွေကို ရွေးကောက်ပွဲ ကော်မရှင်က ပြန်လည်ပြီး သုံးသပ်နိုင်မယ့် အနေအထားရှိတယ်။ အဲဒီတော့ ကျနော်တို့ မြန်မာနိုင်ငံရဲ့ ရွေးကောက်ပွဲနဲ့ ပတ်သက်ပြီးတော့မှ Procedure တွေဟာ တချို့ကိစ္စတွေဟာ အင်မတန်ကို နိုင်ငံတကာ ကတောင် အတုယူရမယ့် ကိစ္စပဲဖြစ်တယ်။”
“ဥပမာအားဖြင့်ဆိုရင် ထိုင်းနိုင်ငံက သံရုံးကနေပြီးတော့မှ ကျနော်တို့ကို ပြောပါတယ်။ ရန်ကုန်မှာ အခြေစိုက်တဲ့ ထိုင်းနိုင်ငံ သံရုံးက ကျနော်တို့ကို ပြောတယ်။ ဒါကတော့ ဘာလဲဆိုရင် မဲရုံတွေမှာ မဲပေးပြီးတဲ့ အချိန်ကျလို့ရှိရင် မဲရေတွက်တာ ရှိပါတယ်။ ဒါပေမယ့် ကျနော်တို့ဆီမှာ ရေတွက်တာ ကတော့ဖြင့် သက်ဆိုင်ရာ ပါတီတွေက ကိုယ်စားလှယ်တွေနဲ့ အပြင် မဲရုံမှာရှိတဲ့ တာဝန်ရှိတဲ့ လူတွေနဲ့ အားလုံးက witness ၁ဝ ယောက်ရဲ့ အနည်းဆုံးရှေ့မှာ မဲတွေကို count လုပ်ရတဲ့ အတွက်ကြောင့်မို့လို့ ဒါကတော့ အင်မတန်ကို ကောင်းမွန်တဲ့ Practice ဖြစ်တယ်။ သူတို့ နိုင်ငံမှာတောင် အဲဒီစနစ်မရှိသေးဘူး ဆိုတာကိုလည်း သူတို့က ကျနော်တို့ကို acknowledge လုပ်ပြီးတော့မှ ပြောကြားတာကိုလည်း ကျနော်မှတ်သား ဖူးပါတယ်။”
“ဒါကြောင့်မို့လို့ ကျနော်တို့ရဲ့ ပြီးခဲ့တဲ့ရွေးကောက်ပွဲဟာ Free and Fair မဖြစ်ဘူးလို့ Wrong Accusation လုပ်တာနဲ့ ပတ်သက်လို့ ရှိရင်လည်း ကျနော်က ထူးထူးခြားခြားတော့ တုန့်ပြန်စရာ မရှိဘူး။ ဒါပေမယ့် တကယ့် တိကျတဲ့ နေရာတွေ၊ တိကျတဲ့ ဒေသတွေမှာ ဘယ်လိုမျိုး မှားယွင်းခဲ့တယ် ဆိုတာကို ပြောကြားနိုင်မယ် ဆိုရင်တော့လည်း ကျနော်တို့ က ရွေးကောက်ပွဲ ကော်မရှင် အနေနဲ့ ပြန်လည် သုံးသပ်နိုင်မယ့် အနေအထား ရှိပါတယ်။ အဲဒီလို Very in General စွပ်စွဲမှုမျိုးတွေကျတော့လည်း ကျနော်တို့က တုန့်ပြန်ပြီးတော့မှ ဆောင်ရွက်ရတာ အင်မတန် ခက်ခဲပါတယ်။”
ဒီလိုမျိုး ရွေးကောက်ပွဲတွေ လုပ်တယ်ဆိုရင် နိုင်ငံတကာပဲဖြစ်ဖြစ်။ ဒေသဆိုင်ရာပဲဖြစ်ဖြစ် သူတို့လာပြီး လေ့လာတဲ့ Observer ၊ Election Monitor တို့ကို ခွင့်ပြုလေ့ရှိတယ်။ အင်ဒိုနီးရှားပဲဖြစ်ဖြစ်၊ သီရိလင်္ကာပဲ ဖြစ်ဖြစ်ပေါ့နော်။ အဲဒီတော့ မြန်မာ အစိုးရကရော အဲဒီလိုမျိုး အခု ကြားဖြတ် ရွေးကောက်ပွဲ လုပ်ရင် ဒေသ ဆိုင်ရာ သို့မဟုတ် နိုင်ငံတကာရဲ့ ရွေးကောက်ပွဲ လေ့လာရေး ကော်မရှင်အဖွဲ့လို ဟာမျိုးတွေကို လက်ခံဖို့ ရှိသလားခင်ဗျ။
“ပြီးခဲ့တဲ့ ၂ဝ၁ဝ ခုနှစ် နိုဝင်ဘာလမှာ ပြုလုပ်ခဲ့တဲ့ ရွေးကောက်ပွဲမှာတော့ ကျနော်တို့က နိုင်ငံတကာက Observer တွေကိုတော့ ဖိတ်ကြားခဲ့ခြင်း မရှိဘူး။ ဒါပေမယ့်လည်း ကျနော်တို့က ပြည်တွင်းမှာ အခြေစိုက်တဲ့ သံရုံးတွေ၊ အဖွဲ့ရုံးတွေက ကိုယ်စားလှယ် တွေကိုတော့ ကျနော်တို့က Witness လုပ်ကြပါ ဆိုပြီးတော့မှ ကျနော်တို့က Observer အနေနဲ့ ဖိတ်ကြား ခဲ့ပြီးတော့မှ တော်တော်များများ ကလည်း Participate လုပ်ကြပါတယ်။ သူတို့ကိုလည်း မြန်မာနိုင်ငံ ပြည်နယ်တိုင်း ဒေသ အနှံ့အပြားမှာ ရှိတဲ့ နေရာတွေကို ကျနော်တို့ကပဲ ကျနော်တို့ အစီအစဉ်နဲ့ ပို့ဆောင်ပေးပြီးတော့ မှ သူတို့ကို Observe လုပ်ခိုင်းတဲ့ အတွက်ကြောင့်မို့လို့ တကယ်တမ်း ပြောရမယ်ဆိုရင်လည်း ဒီသံရုံး၊ ဒီသံတမန်တွေဟာ နိုင်ငံတကာကို ကိုယ်စားပြုတဲ့ အတွက် ကျနော်ကတော့ နိုင်ငံတကာ Observer တွေကို ဖိတ်ကြားတယ် လို့ပဲ Interpret လုပ်မယ်ဆိုလည်း ရမယ့်အနေအထား ရှိတယ်လို့ ယုံကြည်ပါတယ်။ ဒီတပတ် ပြုလုပ်မယ့် ကြားဖြတ် ရွေးကောက်ပွဲမှာတော့ ဖိတ်မယ်၊ မဖိတ်ဘူး ဆိုတာကိုတော့ ရွေးကောက်ပွဲ ကော်မရှင်ရဲ့ အဆုံးအဖြတ်ပါပဲ။”
မြန်မာနိုင်ငံက အာဆီယံမှာ ၂ဝ၁၄ ခုနှစ်မှာ ဥက္ကဋ္ဌရာထူးနဲ့ တာဝန်ယူမှာပေါ့နော်။ အဲဒီတော့ ဝန်ကြီး အနေနဲ့ အစိုးရ အနေနဲ့ ဘယ်လိုမြင်သလဲ ခင်ဗျ။ အဲဒီ ၂ဝ၁၄ ခုရောက်ဖို့ ၂ နှစ်ကြာတယ်။ လိုအပ်တဲ့ ပြင်ဆင်မှုတွေ လုပ်နိုင်ပြီလား။ အထူးသဖြင့်တော့ Infrastructure ပေါ့။ ဘာဖြစ်လို့လဲ ဆိုတော့ ကျနော် တို့ သတင်းထောက် တချို့တွေပြောတယ်။ နေပြည်တော်မှာ သတင်းပို့ရတဲ့ အခါ ခက်ခဲတဲ့ဟာမျိုးတွေ။ နိုင်ငံတကာ အဆင့် သတင်းထောက်တွေ မီဒီယာတွေ အတွက် လိုအပ်တဲ့ ပြင်ဆင်မှုတွေ လိုတယ်ပေါ့နော်။ ပံ့ပိုး ပေးနိုင်မှုတွေ။ မြန်မာပြည်မှာ အဲဒီလိုမျိုးပေါ့ ဒါတွေက အသေးစိတ်လည်း ဟုတ်တယ်။ နောက်ပြီးတော့ အဆင်လည်း ပိုပြေအောင်၊ ကိုယ့်ရဲ့ တာဝန်ယူထားတဲ့ ဟာကို အဆင်ပြေအောင်။ အဲဒီလိုမျိုး ပြင်ဆင်မှုတွေ ၂ နှစ်အတွင်းမှာ လုပ်နိုင်မယ် ထင်သလားခင်ဗျ။
“ကျနော်တို့အနေနဲ့ အချိန်အများကြီး ရပါတယ်။ လွန်ခဲ့တဲ့ ၂ နှစ်လောက်ကတည်းက ကျနော်တို့က နေပြည်တော်မှာ Summit ပြုလုပ်ဖို့ အတွက်ကို ကြိုတင် ပြင်ဆင်တဲ့ အနေနဲ့ Infrastructure တွေကို ထဲထဲဝင်ဝင် တည်ဆောက်နေ ပါတယ်။ အထူးသဖြင့် ကတော့ ကျနော်တို့ လာမယ့် နိုင်ငံခေါင်းဆောင် တွေနဲ့ Delegate တွေကို တည်းခိုနိုင်ဖို့ အတွက်နဲ့ အစည်းအဝေး ကျင်းပနိုင်ဖို့ အတွက်ကို ကျနော်တို့က Government-owned ဟိုတယ်တွေ၊ အဆောက်အဦးတွေကို ဒါတွေ အားလုံးကို ဆောက်နေပါတယ်။ ဒါကိုလည်း ပြီးခဲ့တဲ့ နှစ်လ၊ သုံးလလောက်က အင်ဒိုနီးရှား နိုင်ငံခြားရေး ဝန်ကြီး မာတီ နာတာလီဂါဝါ လာတဲ့အချိန်မှာ သူ့ကို ပြသခဲ့ပြီး ဖြစ်ပါတယ်။ ဒီအဆောက်အဦးတွေ ကလည်း ခုချိန်မှာတော့ နေ့မီး၊ ညမီး ထွန်းပြီးတော့မှ Three shifts ခွဲပြီး တော့မှ ဆက်လက်ပြီး ဆောင်ရွက်နေ တာကိုလည်း ကျနော်တို့လည်း လေ့လာတွေ့ရှိနေရပါတယ်။”
“ဒါကြောင့်မို့လို့ Infrastructure အပိုင်းကတော့ အဆောက်အဦးအပိုင်းကတော့ စိတ်ပူပန်စရာ မလိုပါဘူး။ ကျနော် တို့ နေပြည်တော် မှာလည်း လာမယ့် သတင်း မီဒီယာတွေနဲ့ အတူ ပတ်သက် ဆက်စပ်ပြီးတော့မှ တက်ရောက်လာမယ့် ပုဂ္ဂိုလ်တွေ အားလုံးအတွက် ဟိုတယ် အခန်းတွေ အလုံအလောက် တည်ဆောက်ပေးပြီး ဖြစ်ပါတယ်။ အဲဒီတော့ Telecommunication အပါအဝင် ကျန်တဲ့ Facilities တွေလည်း ကျန်တဲ့ အချိန် အတောအတွင်းမှာ အချိန်မှီ ပြီးစီးအောင် ဆောင်ရွက်ပေးမှာ ဖြစ်ပါတယ်။”
မြန်မာအစိုးရက သမ္မတကြီးကိုယ်တိုင် အင်ဒိုနီးရှား ဘာလီမှာ ပြောသွားတဲ့အထဲမှာလည်း ပါတယ်။ ပြီးတော့ တာဝန် ရှိသူတွေ ပြောသွားတဲ့ အထဲမှာ နိုင်ငံရေး အကျဉ်းသားတွေ လွှတ်ပေးမယ်လို့ ဆိုလိုတယ်။ အဲဒီတော့ ဝန်ကြီး အနေနဲ့ ပြောနိုင်လို့ရလား မသိဘူး။ ဘယ်တော့ လောက် လွှတ်ပေးမယ်။ အားလုံး လွှတ်ပေးမှာလား ဒါမှမဟုတ် နဲနဲ နဲနဲစီ လွှတ်ပေးမှာလား။
“ဒီဟာနဲ့ပတ်သက်လို့ရှိရင် မနေ့က ကျနော်ရဲ့ Statement မှာ အပိုဒ်တပိုဒ်အနေနဲ့ ထည့်သွင်းပြီးတော့မှ ကျနော် ပြောကြား လိုက်ပါတယ်။ နိုင်ငံတော် သမ္မတကြီးက သူတာဝန်ယူတဲ့ ရှစ်လတာ အတွင်းမှာပဲ နှစ်ကြိမ် ခွဲပြီးတော့မှ သူက အကျဉ်းသားတွေကို လွှတ်ပေးပြီး ဖြစ်ပါတယ်။ စုစုပေါင်းဆိုရင် ၂၆,ဝဝဝ ကျော်ကျော်လောက် ရှိပါတယ်။ အဲဒီ အထဲမှာလည်း So-called ပေါ့နော် Prisoner of Conscience လို့ခေါ်တဲ့ ပုဂ္ဂိုလ်တွေ ရာဂဏန်း ပါတယ်လို့ ဒါ အဖွဲ့အစည်းတချို့ ကတော့ ပြောဆိုမှုတွေ ရှိပါတယ်။”
“အဲဒီတော့ ကျနော်တို့ မြန်မာနိုင်ငံတော် အစိုးရရဲ့ ရပ်တည်ချက်ကတော့ ရှင်းလင်းပါတယ်။ ဒါကတော့ ဘာလဲဆိုလို့ ရှိရင် ကျနော်တို့ နိုင်ငံမှာ နိုင်ငံရေး အကျဉ်းသား သော်လည်းကောင်း၊ ယုံကြည်မှုကြောင့် ကျတဲ့ အကျဉ်းသား သော် လည်းကောင်း မရှိဘူးဆိုတဲ့ ကျနော်တို့ရဲ့ ရပ်တည်ချက် ဖြစ်ပါတယ်။ အဲဒီတော့ လူတယောက်ဟာ သူရဲ့ ယုံကြည် ချက်ကြောင့်ပဲ ဖြစ်ဖြစ်၊ သူရဲ့ နိုင်ငံရေး အရ သော်လည်းကောင်း၊ သူ့မှာ ယုံကြည်ချက် ရှိကောင်း ရှိမယ်၊ ဒါပေမယ့် သူက ပြည်တွင်းမှာ ရှိနေတဲ့ တည်ဆဲဥပဒေကို ချိုးဖောက်လို့ ရှိရင်တော့ တရားရုံးရဲ့ တရားစွဲဆိုပြီးတော့မှ အပြစ်ပေးခြင်းကို ခံရလိမ့်မယ်။ အဲဒီအချိန်မှာ သူဟာ သာမန် အကျဉ်းသားလို့ပဲ ကျနော်တို့က ဆုံးဖြတ် ထားပါတယ်။”
“အဲဒီတော့ ကျနော်တို့က သူ့ကို သာမန်အကျဉ်းသားတဦးလို့ပဲ Treat လုပ်ပြီးတော့မှ သာမန် အကျဉ်းသား တွေကို ပေးမယ့် Pardon ကျလို့ရှိရင် Amnesty ကျလို့ရှိရင် သူ့ကို တခါတည်း ထည့်ပြီးတော့မှ ဆောင်ရွက်ပေးမှာ ဖြစ်ပါ တယ်။ ဒါနဲ့ ပတ်သက်ပြီးတော့လည်း ကျနော့်ရဲ့ Statement မှာ အတိအလင်း ပါပြီး ဖြစ်ပါတယ်။ ဒါ နိုင်ငံတော်ရဲ့ Peace and Stability ကို မထိခိုက်စေဘဲနဲ့ အခါအခွင့် သင့်တဲ့ အချိန်ကျရင် လာမယ့်အနာဂတ်မှာ အကျဉ်းသားတွေ လွှတ်ပေးဖို့ ရှိမှာပဲ ဆိုတာကို ကျနော် ပြောကြားပြီး ဖြစ်ပါတယ်။”
မြန်မာပြည်မှာ အခု အထူးသဖြင့် ဝန်ကြီးတို့ အစိုးရအသစ်တက်လာပြီးတဲ့ နောက်ပိုင်းမှာ ပေါ့နော် မီဒီယာနဲ့ ပတ်သက်ပြီးတော့ လွတ်လပ်ခွင့် တချို့ ရှိလာတယ်ဆိုတာ တွေ့ရပါတယ်။ ဥပမာအားဖြင့် Website တွေ ပိတ်ထားတာတွေ ပြန်ဖွင့်တာတို့၊ ပြီးတော့ Censorship မှာ လျှော့ပေးတဲ့ ဟာမျိုးတွေ ရှိတယ်။ ဒါပေမယ့် ဘယ်တော့များ မြန်မာပြည်က လွတ်လပ်တဲ့ သတင်း မီဒီယာရနိုင်တဲ့ အခြေအနေ ပေါ့နော် ဥပမာ အင်ဒိုနီးရှား လိုဟာမျိုး ရနိုင်မယ်လို့ ထင်သလဲ။ အဲဒီလိုမျိုးလုပ်ဖို့ အတွက် အစိုးရအနေနဲ့ ပေါ့နော် လက်ရှိ တာဝန်ယူ ထားတဲ့ အစိုးရအနေနဲ့ ဘာတွေလုပ်ဖို့ စဉ်းစားထားလဲ ခင်ဗျ။
“ဒီနေရာမှာတော့ ကျနော် အစိုးရကို ကိုယ်စားပြုပြီးတော့ မပြောချင်ပါဘူးခင်ဗျ။ ဘာကြောင့်လဲ ဆိုတော့ ကျနော် သည် နိုင်ငံခြားရေး ဝန်ကြီးဌာနရဲ့ ဒုတိယ ဝန်ကြီးတဦးသာ ဖြစ်ပြီးတော့မှ ဒီကိစ္စကတော့ အထူးသဖြင့်ကတော့ Information Ministry နဲ့ ပတ်သက်မယ်လို့ ယူဆပါတယ်။ သို့သော်လည်း ကျနော်တဦးတည်း အမြင်အရ ပြောကြားမယ် ဆိုရင်တော့ ကျနော်တို့ နိုင်ငံတော် အစိုးရ အနေနဲ့သော်လည်းကောင်း၊ ကျနော့်အနေနဲ့ သော်လည်းကောင်း မီဒီယာဟာ နိုင်ငံရဲ့ fourth pillar ဆိုတာကို ကျနော် လုံးဝ လက်ခံပါတယ်။
“ဒါပေမယ့် မီဒီယာတွေ ကိုယ်၌ကလည်း သူ့မှာ Ethics ရှိရမယ်။ မီဒီယာ Ethics ရှိရမယ်။ မီဒီယာကလည်း ဘက်မ လိုက်ပဲနဲ့ နိုင်ငံရဲ့ ကောင်းရာ ကောင်းကျိုး အတွက်ကို ထောက်ပြဝေဖန်တဲ့ Theme နဲ့သွားဖို့ လိုပါတယ်။ အဓိကအားဖြင့် ကျနော် တင်ပြချင်တာ ကတော့ Maturity ရှိဖို့လိုပါတယ်။ မီဒီယာတွေ Maturity ရှိတဲ့အချိန်မှာပဲ ကျနော်တို့ နိုင်ငံရဲ့ ဒီမိုကရေစီ ဟာလည်း ရင့်ကျက်လာတဲ့ အချိန်မှာပဲ အခုလို မီဒီယာ လွတ်လပ်ခွင့်ဟာ ပိုမိုပြီးတော့မှ ရှင်သန်လာမယ်လို့ ကျနော် ဒီလိုပဲ နားလည်ပါတယ်။ မီဒီယာတွေကလည်း ဘက်လိုက်နေမယ်၊ မီဒီယာ တွေကလည်း hot news တွေကိုပဲ အသားပေးပြီးတော့မှ ဖော်ပြနေမယ် ဆိုရင်ဖြင့် ကျနော်တို့ မျှော်မှန်းထားတဲ့ မီဒီယာ လွတ်လပ်ခွင့်ဟာ အလှမ်းဝေး နေဦးမယ်လို့ ဒီလိုပဲ နားလည်ပါတယ်။”
အစိုးရတာဝန်ရှိသူတွေနဲ့ ကျနော်တို့မှာ အစက အင်တာဗျူးတွေဘာတွေ အရမ်းခက်ခဲတယ်။ မဖြစ်သလောက် ပဲပေါ့နော်။ ဒီလိုမျိုး အင်တာဗျူး လုပ်ခွင့် ပေးတာလည်း ကျနော် တရားဝင် ကျေးဇူး တင်ပါတယ်။ မဇ္ဈိမ သတင်းဌာန အနေနဲ့။ ပြည်ပမှာ ရောက်နေတဲ့ မီဒီယာတွေကို အစိုးရအနေနဲ့ ဘယ်လိုမျိုး သဘောထားသလဲ ဆိုတာ သူတို့ကို မြန်မာပြည်ကို ပြန်လာပြီးတော့ လုပ်စေချင်တဲ့ ဆန္ဒ သဘောထား ဘယ်လိုရှိပါသလဲ။
“ဒီမိုကရေစီထူထောင်တာကတော့ မြန်မာနိုင်ငံသားတွေအားလုံး ပါဝင်လေ ကောင်းလေပါပဲ။ အဲဒီတော့ ပြည်ပကို ရောက်နေတဲ့ မီဒီယာတွေ ကလည်း မြန်မာနိုင်ငံ ကောင်းရာ ကောင်းကျိုးကို လုပ်မယ်ဆိုရင်တော့ လက်မခံနိုင်စရာ မရှိဘူးလို့ ကျနော်တဦး ထဲကတော့ ဒီလိုပဲ ယုံကြည်ပါတယ်။ စောစောက ကျနော် ကနဦး တင်ပြခဲ့သလိုပဲ မီဒီယာတွေ အနေနဲ့က တကယ့်ကို နိုင်ငံအတွက် အပြုသဘော ဆောင်တဲ့ Input တွေထည့်ပြီးတော့မှ ကောင်းကျိုးဆောင် ရွက်ပေးမယ် ဆိုရင်ဖြင့် ကျနော်တို့ နိုင်ငံအတွက် အားတခု ဖြစ်လာမယ်လို့ ကျနော် ဒီလိုပဲ နားလည်ပါတယ်။”
အခုလတ်တလောမှာ မီဒီယာ Law လုပ်နေတယ်လို့ ကြားရပါတယ်။ ပြင်ဆင်နေတယ် ပေါ့နော်။ မီဒီယာ ဥပဒေနဲ့ ပတ်သက်ပြီး နည်းနည်း ပြောပြလို့ရမလား။ လွတ်လပ်မှုကို အခြေခံတဲ့ မီဒီယာဥပဒေ ဖြစ်ဖို့ ရည်ရွယ်တာလား ဒါမှမဟုတ် ဘယ်လိုမျိုးလဲ ခင်ဗျ။
“ဒီမေးခွန်းနဲ့ ပတ်သက်ရင်လည်း ကျနော့်ရဲ့ Out of my reach ဖြစ်နေပါတယ်။ ဒီဟာတွေက Information Ministry က Information ministry ဖြစ်တဲ့ အတွက်ကြောင့်မို့လို့ သူတို့က ရေးသားပြီးတော့မှ အဲဒီဟာကိုလည်း ချက်ချင်း အတည်ပြုလို့ မရသေးပဲနဲ့ လွှတ်တော်မှ တင်ရပါမယ်။ ပြည်သူ့ လွှတ်တော်နဲ့ အမျိုးသား လွှတ်တော်မှာ တင်ရမယ်။ ပြီးလို့ရှိရင် ပြည်ထောင်စု လွှတ်တော်မှာ အတည်ပြုပြီးတဲ့ အချိန်ကျတော့မှ အဲဒီဥပဒေက ပြည်ထောင်စု လွှတ်တော်မှာ Pass ဖြစ်ပြီ ဆိုတော့မှ နိုင်ငံတော် သမ္မတကြီး ဆီကို တင်ရပါမယ်။ နိုင်ငံတော် သမ္မတကြီး လက်မှတ် ထိုးတဲ့အချိန် ကျမှ ဒီဥပဒေဟာ အတည်ဖြစ်မှာ ဖြစ်တဲ့ အတွက်ကြောင့်မို့လို့ ကျနော် နားလည် သလောက်တော့ ကျနော် သတင်းတွေ နားထောင် သလောက်ကတော့ လွှတ်တော်မှာ ဒီ Bill တွေကို တင်တာတော့ မကြားသေးပါဘူး ခင်ဗျ။”
သမ္မတကြီးက မိန့်ခွန်းထဲမှာ ပြောခဲ့ပါတယ်။ သူစပြီးတော့ တာဝန်ယူတဲ့အချိန်မှာ ပြည်ပ ရောက်တွေ မြန်မာပြည် ကို ပြန်လာပါပေါ့။ ပြန်လာဖို့ ကြိုဆိုပါတယ် ဆိုတာ။ ဒါပေမယ့် ကျနော်တို့ ကြားမိသလောက်၊ လေ့လာမိသလောက် က ပြည်ပမှာ ရောက်နေတဲ့ လူတွေက မြန်မာပြည်ကို ပြန်ဖို့အတွက် နံပါတ်တစ် ကတော့ သိပ်ပြီးတော့ မယုံကြည်သေး ဘူးဆိုတဲ့ သဘောပေါ့နော်၊ ဖြစ်နေတဲ့ အခြေအနေတွေ။ နောက် တခုက တချို့တွေပြောတာက ပြန်မယ်ဆိုရင်တောင် ဘယ်လိုမျိုး အတိအကျ ပေါ့နော် Mechanism မရှိသေးဘူးပေါ့။ သက်ဆိုင်ရာ သံရုံးကို ဆက်သွယ်ပါ ဆိုတဲ့ဟာမျိုးပဲ ရှိတယ်။ ဆိုတော့ အဲဒါနဲ့ ပတ်သက် ပြီးတော့ရော ဝန်ကြီး အနေနဲ့ ဘယ်လိုမြင်သလဲ ခင်ဗျ။
“နိုင်ငံတော်သမ္မတကြီး ကိုယ်တိုင်ကိုက ပြည်ပမှာ ရောက်ရှိနေတဲ့ မြန်မာနိုင်ငံသားတွေလည်း ပြန်လာကြဖို့ ဆိုပြီးတော့မှ ဖိတ်ခေါ်ထားတာ ဖြစ်ပါတယ်။ အဲဒီ ဖိတ်ခေါ်ချက်ကလည်း စောစောက ပြောသလိုပါပဲ။ မြန်မာနိုင်ငံကို ပြန်လာပြီးတော့မှ မြန်မာနိုင်ငံရဲ့ ကောင်းရာ ကောင်းကျိုးကို ပူးပေါင်းပြီး ဆောင်ရွက်ကြမယ် ဆိုလို့ရှိရင် ကျနော်တို့ မျှော်မှန်းထားတဲ့ Democratic State ကို ကျနော်တို့က အချိန်တိုအတွင်းမှာ ရောက်ရှိသွားမယ် ဖြစ်ပါတယ်။ အဲဒီတော့ ဒါဟာလည်း including media သမားတွေလည်း အပါအဝင် ဖြစ်တယ်။ အဲဒီနေရာမှာတော့ ကျနော်တို့ မှတ်သား မိသလောက်ဆိုရင် သိပ်ပြီးတော့မှ significant ဖြစ်တဲ့ ပုဂ္ဂိုလ်တွေ ကျနော် point out လုပ်ပြရမယ်ဆိုရင် သီးလေးသီးအငြိမ့်လိုမျိုး ပြန်လာကြတာတွေ့ပါတယ်။ နောက်တခါ ကနေဒါ နိုင်ငံက နေပြီးတော့မှ ဦးဟန်ယောင်ရွှေ ပြန်လာတာတွေ့တယ်။ နောက်တခါ ပီတာလင်းပင် ပြန်လာတာတွေ့တယ်။ တခြား ကျနော်မမှတ်မိတဲ့ ပုဂ္ဂိုလ်တွေ လည်း ရှိပါတယ်။ အရေအတွက် အားဖြင့်လည်း ကျနော် မျှော်မှန်း တာကတော့ ရာဂဏန်းလောက် ရှိပြီလို့ထင်ပါ တယ်။”
“အဲဒီတော့ ပြန်လာကြမယ်ဆိုရင်တော့လည်း သူတို့သည် မြန်မာနိုင်ငံသား ပတ်စ်ပို့ကို ကိုင်ထားပြီးပြီ ဆိုရင်တော့ လည်း အင်မတန် လွယ်ကူပါတယ်။ သံရုံးတွေမှာ သွားဆက်သွယ်ပြီးတော့မှ ပြန်လာကြမယ်ဆိုရင် သံရုံးတွေကလည်း အချိန်တို အတွင်းမှာ ကျနော်တို့ နိုင်ငံခြားရေး ဝန်ကြီးဌာနကို တင်ပြပြီးတော့မှ ကျနော်တို့ကလည်း ဒီဟာအပေါ်မှာ လိုအပ်တဲ့ ပြည်ထဲရေး ဝန်ကြီးဌာနရဲ့ စီစစ်မှုတွေ ပြီးပြီဆိုလို့ ရှိရင် ကျနော်တို့က ပြန်ပြီးတော့ လက်ခံနေပါတယ်။ ကျနော်တို့က Denial လုပ်ထားတဲ့ ဆိုတဲ့လူကတော့ မရှိသလောက်ပါပဲ။”
အခု မြန်မာအစိုးရကိုပေါ့နော် အတိတ်မှာပဲဖြစ်ဖြစ်၊ အခုလက်ရှိမှာပဲဖြစ်ဖြစ် စီးပွားရေး ပိတ်ဆို့ ဒဏ်ခတ် မှုတွေ ပြုလုပ် ထားတာရှိတယ်။ မြန်မာ အစိုးရကလည်း ဒါတွေက မရှိသင့်ဘူးလို့ ပြောတယ်။ ဘာကြောင့် မို့လို့ ဒီစီးပွားရေး ဒဏ်ခတ်မှုတွေ အခု မရှိသင့်တော့တာလဲ ခင်ဗျ။
“စီးပွားရေးဒဏ်ခတ်မှုတွေဖြစ်ပေါ်လာရတဲ့ အကြောင်းရင်းကတော့ ကျနော်တို့နိုင်ငံရဲ့ ဒီမိုကရေစီနဲ့ Human Rights အပေါ်မှာ အခြေခံ ပြီးတော့မှ ဖြစ်ပေါ်ခဲ့တဲ့ ကိစ္စတွေ ဖြစ်ပါတယ်။ ကျနော်တို့ကအခု ဒီမိုကရေစီနိုင်ငံကို သွားနေပြီ။ ကျနော်တို့က လူ့အခွင့်အရေး ကိစ္စနဲ့ ပတ်သက်ရင်လည်း National Human Rights Commission ကိုတောင် တည်ထောင်ပြီးတော့မှ လွတ်လွတ်လပ်လပ် ဆောင်ရွက်ပေးခွင့် ပြုနေပြီဖြစ်တယ်။ ဒါကြောင့်မို့လို့ ကျနော်တို့က ဒီ Sanctions တွေကို ချမှတ်ခဲ့ရတဲ့ အကြောင်းရင်းတွေကို ကျနော်တို့က လက်တွေ့ကိုင်တွယ် ဆောင်ရွက် ပေးနေပြီ ဖြစ်တဲ့ အတွက်ကြောင့်မို့လို့ မလိုတော့ဘူးလို့ ကျနော်တို့က ပြောတာဖြစ်ပါတယ်။”
“ဒီလို Sanction ပြုလုပ်တာဟာ ကျနော်တို့ နိုင်ငံတော်အစိုးရ တခုတည်းကိုချည်းပဲ Impact ဖြစ်တာမဟုတ်ဘဲနဲ့ အပြစ်မဲ့တဲ့ တောင်သူ လယ်သမားတွေ၊ လုပ်သားပြည်သူတွေ အပေါ်မှာ ထိခိုက်မှုက ပိုပြင်းထန်ပါတယ်။ ဒါကြောင့် မို့လို့ ကျနော်တို့ကတော့ ဒီ Sanction တွေဟာ ရုပ်သိမ်းသင့်ပြီ၊ ရုပ်သိမ်းဖို့အတွက် အချိန်တန်ပြီလို့ ပြောဆိုနေရတာ ဖြစ်ပါတယ်။”
ဘာလီလို Democracy Forum ပေါ့နော် လာတက်ခြင်းအားဖြင့် မြန်မာနိုင်ငံအနေနဲ့ ဘယ်လိုမျိုးဟာ တွေက လေ့လာခွင့်၊ လေ့လာလို့ ရတယ်လို့ ဝန်ကြီး အနေနဲ့ထင်လဲ။
“ဒီကိုလာတဲ့နိုင်ငံအများစုကတော့ ဒီမိုကရေစီကို သူ့နည်းသူ့ဟန်နဲ့ သူ့ရှုထောင့်နဲ့ ကျနော်တို့ အဓိပ္ပါယ်တွေ ဖွင့်ဆို နေကြတာ ဖြစ်ပါတယ်။ ဘယ်လိုပဲဖြစ်ဖြစ် နိုင်ငံတွေအားလုံးကတော့ ဒီမိုကရေစီကို ချစ်မြတ်နိုးတယ် ဆိုတာကိုလည်း ကျနော်တို့က လေ့လာ သိရှိရပါတယ်။ ဒီမိုကရေစီကိုသွားမယ် ဆိုတာကိုလည်း လက်ခံယုံကြည်ပါတယ်။ ဒါကြောင့်မို့ လို့ သူ့တို့နည်း သူတို့ဟန်နဲ့ သူတို့နိုင်ငံကို ကောင်းအောင် ဖော်ဆောင်နေတာတွေသည် ကျနော်တို့ အတွက်ကတော့ဖြင့် ထိုက်သင့်သလို နမူနာယူစရာတွေ အတုယူစရာတွေ ဖြစ်ပြီးတော့မှ ဒီမိုကရေစီ နိုင်ငံအချင်းချင်း ဒီမှာ ထိတွေ့ ဆက်ဆံပြီးတော့ အတွေ့အမြင်တွေကို ဖလှယ်ကြမယ်။ ပူးပေါင်း ဆောင်ရွက်ကြမယ် ဆိုရင်လည်း ကိုယ့်နိုင်ရဲ့ တည်ဆောက်နေတဲ့ Democratic process မှာ ထိုက်သင့်သလို အထောက်အကူ ပြုမယ်လို့ ကျနော်ယုံကြည်ပါ တယ်။”
မြန်မာပြည်မှာ ဒီလိုမျိုး Democracy Forum လိုမျိုးပေါ့ မဝေးတော့တဲ့ကာလမှာ ကျင်းပ နိုင်မယ်လို့ ကျင်းပနိုင်မယ့် အခြေ အနေတွေ၊ အချက် အလက်တွေ ခုနလို လူ့အခွင့်အရေး၊ ဒီမိုကရေစီ ရှိမယ်လို့ မြင်မိ သလားခင်ဗျ။ ကျင်းပဖို့ရာ စဉ်းစား မိသလား။
“ကျနော်တို့ ပြီးခဲ့တဲ့ စက်တင်ဘာလ ၁၅ ရက်နေ့က World Democracy Day ပါပဲ။ အဲဒီ World Democracy Day ကို ကျနော်တို့က မြန်မာနိုင်ငံမှာ တခါဖူးမှ မကျင်းပ ခဲ့ဖူးဘူး။ ဒါပေမယ့် ကျနော်တို့ရဲ့ လက်ရှိ အစိုးရ လက်ထက်မှာ World Democracy Day 2011 ကို နိုင်ငံတကာက ရန်ကုန်မှာ အခြေပြုနေတဲ့ သံရုံးတွေကိုပါ ဖိတ်ကြားပြီးတော့မှ လွှတ်တော် ကိုယ်စားလှယ်တွေနဲ့ အဖွဲ့အစည်းတွေ အားလုံးက Civil Society ကအဖွဲ့အစည်းတွေကိုပါ အားလုံး ဖိတ်ကြားပြီးတော့ တရားဝင် ဆောင်ရွက်ခဲ့ပြီး ဖြစ်ပါတယ်။ ဒါကြောင့်မို့လို့ ကျနော်တို့က ဒီမိုကရေစီကို လူတွေနဲ့ မြည်းစမ်း ထိတွေ့ဖို့ အတွက် အခွင့်အလမ်းတွေကို ဖန်တီးပေးနေတာ ဖြစ်သလို၊ နိုင်ငံဟာ အစိုးရ အနေနဲ့ မြည်ကာ မတ်တ ကျနော်တို့ အမည်တပ်ပြီး ပြောတဲ့ ဒီမိုကရေစီမဟုတ်ပဲနဲ့ တကယ်ကို အနှစ်သာရရှိတဲ့ ဒီမိုကရေစီ ဖြစ်အောင် ကြိုးစားနေတယ်ဆိုတာကိုလည်း ကျနော်တို့က ပြည်တွင်းမှာ ပြသရသလို ပြည်ပကိုလည်းသိအောင် ကျနော်တို့က Awareness လုပ်ပေးနေတာ ဖြစ်ပါတယ်။”
“ဒီလို Democracy Forum ကြီးတွေ နိုင်ငံတကာက လာရောက် တက်ရောက်ပြီး တော့မှ ကျင်းပနိုင်ဖို့ အခွင့်အလမ်း ကတော့ဖြင့်လည်း ကျနော်တို့ ဆက်ပြီး ကြိုးစား သွားရဦးမှာ ဖြစ်ပါတယ်။ ဘာကြောင့်လဲဆိုတော့ ကျနော်တို့မှာ ဒါနဲ့ ပတ်သက်ပြီးတော့ Facility တွေလိုတယ်။ ပြီးတော့ Finance ထောက်အပံ့တွေ လိုပါတယ်။ အဲဒီတော့ ဒီဟာတွေ အားလုံးကလည်း လုပ်မယ် ဆိုရင်လည်း ဆက်ပြီးတော့ ကြိုးပမ်းသွားရင် မဖြစ်နိုင်စရာ အကြောင်း မရှိဘူးလို့ပဲ မြင်ပါတယ်။”
ဟုတ်ကဲ့ ကျေးဇူးအများကြီးတင်ပါတယ်။ အခုလို မဇ္ဈိမသတင်းဌာနကို မအားတဲ့ကြားထဲ ကနေ အင်တာဗျူး ပေးတဲ့ အတွက်။
“ကျေးဇူးတင်ပါတယ်။ ကျနော်ကလည်း မဇ္ဈိမသတင်းဌာန အနေနဲ့ ကျနော်တို့ မြန်မာနိုင်ငံတော်ရဲ့ ဒီမိုကရေစီ တည်ဆောက်ရေး ကိစ္စမှာ သက်ဆိုင်ရာ ထောင့်တထောင့်က နေပြီး တတတ်တအား ပူးပေါင်း ဆောင်ရွက်လိမ့်မယ်လို့ ကျနော် မျှော်လင့်ပါတယ်။”
Ref: မဇ္ဈိမ
ရုရှား၌ မြန်မာစစ်အရာရှိ ရာချီ၍ နျူကလီးယား ပညာသင်
လင်းသန့်
December 9, 2011
ရုရှား နိုင်ငံ တက္ကသိုလ်များတွင် နျူကလီးယား သိပ္ပံနှင့် ဒုံးကျည်ဆိုင်ရာ ပညာရပ်များကို လေ့ကျင့်သင်ကြားရန် မြန်မာ အစိုးရက စေလွှတ်သည့် စစ်အရာရှိများ ယခုထိ ရာချီရှိနေဆဲ ဖြစ်ကြောင်း သိရသည်။
၂၀၀၁ ခုနှစ်က စတင်ပြီး ယခင် မြန်မာစစ်အစိုးရက နျူကလီးယား ဓာတ်ပေါင်းဖိုတခု ဆောက်လုပ်ရန် ရုရှား၏ အကူအညီ ရယူရန် အတွက် အဆိုပါ မြန်မာစစ်အရာရှိများကို စေလွှတ်ခဲ့ခြင်းဖြစ်သည်။
မြန်မာနိုင်ငံတွင် သိပ္ပံဆိုင်ရာ လေ့လာရေးနှင့် ဆေးဘက်ဆိုင်ရာ သုတေသနပြုရန်အတွက်ဟု အကြောင်းပြပြီး နျူကလီးယား ဓာတ်ပေါင်းဖို တခု တည်ဆောက်ရန် ရုရှားနှင့် သဘောတူခဲ့ကြောင်း တိုင်းမ် မဂ္ဂဇင်းတွင် ဖော်ပြထားသည်။
ထို့ကြောင့် မြန်မာစစ်အစိုးရသည် ပညာရေး၊ ကျန်းမာရေး အသုံးစရိတ်ထက် စစ်ရေး အသုံးစရိတ်ကို ပိုသုံးစွဲလေ့ ရှိသည်ဟုလည်း တိုင်းမ် မဂ္ဂဇင်းက ဆိုသည်။
နျူကလီးယား စွမ်းအင်ဆိုင်ရာ ကျွမ်းကျင်သူ ၃၀၀ မှ ၃၅၀ ၀န်းကျင်ကို ရုရှားမှ မွေးထုတ်ပေးရေး အပါအ၀င် အမေရိကန် ဒေါ်လာ သန်း ၁၅၀ တန်ဖိုးရှိ သဘာတူ စာချုပ် တခုကိုလည်း ၂၀၀၇ ခုနှစ်တွင် ရုရှားနိုင်ငံနှင့် အပြီးသတ် ချုပ်ဆိုခဲ့သည်။
မကြာသေးမီက အမေရိကန် နိုင်ငံခြားရေး ၀န်ကြီး မစ္စ ဟီလာရီ ကလင်တန်၏ မြန်မာနိုင်ငံ ခရီးစဉ် တွင်လည်း မြန်မာ အရပ်သား အစိုးရသစ်နှင့် သမ္မတ အိုဘားမား အစိုးရက မြန်မာ အနေဖြင့် နျူကလီးယား လက်နက် ပိုင်ဆိုင်လိုသည့် ကြိုးပမ်းမှု အပေါ် စိုးရိမ်မကင်း ဖြစ်ခဲ့သည်များကို သတင်းများတွင် ဖော်ပြခဲ့ကြသည်။
သို့သော် နောက်ပိုင်းတွင် အမေရိကန်က နျူကလီးယားအရေးထက် မြန်မာနှင့်မြောက်ကိုးရီးယား ဆက်ဆံရေးတွင် ဒုံးကျည် ကိစ္စကို မီးမောင်းထိုး ပြောဆိုခဲ့သည်။
ပြည်သူ့လွှတ်တော် ဥက္ကဌ သူရ ဦးရွှေမန်းကလည်း မိမိအနေဖြင့် မြောက်ကိုးရီးယားကို ရောက်ခဲ့ကြောင်း ထိုစဉ်က တပ်မတော် အရာရှိကြီး တဦး အနေဖြင့်၂ နိုင်ငံတပ်မတော်၂ ရပ်ကြား ပူးပေါင်းဆောင်ရွက်ရန် နားလည်မှု စာချွန်လွှာကိုသာ လက်မှတ် ရေးထိုး ခဲ့ကြောင်း မစ္စ ဟီလာရီ၏ ခရီးစဉ်နှင့် ပတ်သက်သည့် သတင်းစာ ရှင်းလင်းပွဲတွင် ပြောခဲ့သည်။
“တချို့စွပ်စွဲထားတာက နျူကလီးယားကိစ္စ၊ အပါအ၀င် မိမိသွားပြီး လက်မှတ်ထိုးတယ်လို့၊ မဟုတ်ပါဘူး။ ဒီကိစ္စက အလွန်ကြီး တဲ့ ကိစ္စပါ။ ဒီကိစ္စကို မိမိလက်မှတ်ထိုးလို့လည်း ရနိုင်တဲ့ ကိစ္စမျိုး မဟုတ်ပါဘူး၊ လေကြောင်းရန် ကာကွယ်ရေး လက်နက်ကိစ္စ လေ့လာတယ်”ဟု သူရ ဦးရွှေမန်းက ဆိုသည်။
အမေရိကန် နိုင်ငံခြားရေးဝန်ကြီးကမူ နျူကလီးယားကိစ္စကို မေးမြန်းခဲ့ခြင်းမရှိကြောင်းလည်း သူရ ဦးရွှေမန်းက ဆိုထားသည်။
သို့သော် ယခင်က မြန်မာအစိုးရသည် မြောက်ကိုရီးယားနိုင်ငံ၏ နည်းပညာ အကူအညီဖြင့် နျူကလီးယား လက်နက် ပိုင်ဆိုင်ရေး သုတေသနလုပ် ကြိုးပမ်း နေကြောင်း မြန်မာ စစ်အရာရှိဟောင်း ဗိုလ်မှူး စိုင်းသိန်းဝင်းက ၎င်းလျှို့ဝှက် ယူခဲ့သည့် အထောက် အထား၊ ဓာတ်ပုံ မှတ်တမ်းများဖြင့် ဖွင့်ချခဲ့ဖူးသည်။
ရှရှားနိုင်ငံ နည်းပညာ တက္ကသိုလ် ကောလိပ်များတွင် မြန်မာနိုင်ငံသား ခန့်မှန်းခြေ ၁၀၀၀၀ ခန့် ရှိမည်ဟု သူက ယုံကြည်ကြောင်း၊ အများစုမှာ ကြည်းတပ်က အရာရှိများ ဖြစ်ကြပြီး နျူကလီးယား သိပ္ပံကို အဓိက သင်ယူ လေ့လာနေကြကြောင်း ဖော်ပြ ထားသည်။
ဗိုလ်မှုးဟောင်း စိုင်းသိန်းဝင်းသည် ရုရှားနိုင်ငံ Bauman University တွင် ဒုံးကျည် အင်ဂျင်ဆိုင်ရာ ဌာနတွင် ပါရဂူ အဆင့် အစီအစဉ်ကို မြောက်ကိုရီးယား နိုင်ငံသား တဦး၊ အီရန်နိုင်ငံသား တဦးနှင့်အတူ တက်ရောက် သင်ယူခဲ့သူဖြစ်သည်။
ထို့နောက် ရှရှားနိုင်ငံမှ ပြန်လာပြီး နျူကလီးယားပိုင်ဆိုင်ရန် အားထုတ်မှုတရပ် အတွက် တည်ဆောက်ထားသည့် စစ် လက်နက် ပစ္စည်း စက်ရုံတခုတွင် ဆက်လက် တာဝန်ထမ်းဆောင် ခဲ့သူလည်းဖြစ်သည်။
အဆိုပါ စက်ရုံတွင် စက်ပစ္စည်း အမြောက်အများသည် မြောက်ကိုရီးယားမှ ၀ယ်ယူခဲ့သည့် ပစ္စည်းများဖြစ်ပြီး ဂျာမနီနိုင်ငံ ထုတ် စက်ပစ္စည်းများလည်း ရှိကြောင်း သူက ပြောဆိုခဲ့သည်။
သို့သော် မြန်မာအစိုးရက အဆိုပါ စွပ်စွဲပြောကြားမူကို ပယ်ချခဲ့သည်။ ထို့နောက် ရုရှားက နျူကလီးယား ဓာတ်ပေါင်းဖို ကိစ္စ ဆက်လက် ကူညီခြင်း မရှိဟုလည်း သတင်းများ ထွက်ပေါ်ခဲ့သေးသည်။
မြန်မာ အစိုးရက အမေရိကန် အထက်လွှတ်တော် အမတ် ဂျွန်မက်ကိန်း လာစဉ်ကလည်း ဆင်းရဲသည့် နိုင်ငံ ဖြစ်သည့် အတွက် နျူကလီးယား အစီအစဉ်ကို ဖော်ဆောင်ရန် မရှိကြောင်း အခိုင်အမာငြင်းဆိုပြီး ကြေညာခဲ့သည်။
သို့သော် နျူကလီးယားကိစ္စ၊ ဒုံးကျည်ကိစ္စ စသဖြင့် မြန်မာအစိုးရနှင့် ရရှားတို့၏ ဆက်ဆံရေးကို ပို၍ စိတ်ဝင်စား လာကြသည်။
Bauman University က ဒုံးကျည်နည်းပညာဆိုင်ရာ ပို့ချသူ Valery Gostev က သူ့အနေဖြင့် ယခုစာသင်နှစ်တွင် မြန်မာ ကျောင်းသား ၁၂ ဦးကို အဆိုပါ နည်းပညာ ပို့ချ ပေးနေကြောင်း၊ အခြားဌာနများက မြန်မာ ကျောင်းသားများကို နျူကလီးယား သိပ္ပံ ပညာရပ်ကို လေ့ကျင့် သင်ကြား ပေးနေကြောင်း အတည်ပြု ပြောခဲ့သည်ကို တိုင်းမ် မဂ္ဂဇင်း သတင်းတပုဒ်တွင်လည်း ဖော်ပြ ထား သည်။
မြန်မာကျောင်းသားများကို ဒုံးကျည်ပညာရပ်သင်ကြားပို့ချခြင်းသည် ရုရှားအနေနှင့် နိုင်ငံတကာ ပဋိညာဉ်များကို ပျက်ပြားစေ ရန် လုပ်ဆောင်ခြင်း မဟုတ်ဟု တိုင်းမ် မဂ္ဂဇင်းတွင် ဖော်ပြ ထားသော်လည်း မြန်မာစစ်အရာရှိ များကို ရုရှားက အဆိုပါ ပညာရပ် များ သင်ကြား ပေးနေသည်များမှာ ကောင်းမွန်သည်ဟု ပြော၍ မရကြောင်း နိုင်ငံတကာ နျူကလီးယား စွမ်းအင် အေဂျင်စီ (IAEA) အကြီးအကဲဟောင်း မစ္စတာ ရောဘတ်ကယ်လီ က မှတ်ချက်ပြုထားသည်။
ယခုကဲ့သို့ မြန်မာနိုင်ငံတွင် အရပ်သားအစိုးရသစ် တက်လာပြီးနောက်ပိုင်း အမေရိကန်နှင့် ဆက်ဆံရေး မျက်နှာစာသစ် ဖွင့်ပြီး အမေရိကန်၏ စိုးရိမ်သံသယများ ကင်းရှင်းသွားရေး ကြိုးပမ်းသွားမည်ဟု အတိအလင်း ပြောကြားထားမှု ရှိသော်လည်း ရုရှားရောက် မြန်မာ စစ်အရာရှိများ၏ နျူကလီးယား သိပ္ပံနှင့် ဒုံးကျည် ဘာသာရပ်လေ့လာမှုများ၏ အခန်းကဏ္ဍ မည်သို့ ဆက်ရှိမည်ကို လေ့လာသူများ အကြား မေးခွန်း ထုတ်နေကြသည်။
Ref: ဧရာဝတီ
မြန်မာအမျိုးသမီး ၄ ဦး ရောင်းစားခံရ
သန်းထိုက်ဦး
December 9, 2011
ထိုင်းနိုင်ငံ ဘန်ကောက်မြို့ မဟာချိုင်ဒေသရှိ ပင်လယ်စာ ထုတ်လုပ်နေသော စက်ရုံ တရုံ၌ ရောင်းစား ခံထားရသည့် မြန်မာ
အမျိုးသမီး ၄ ဦးကို ဗုဒ္ဓဟူးနေ့က ထိုင်းအာဏာပိုင်များ အကူအညီဖြင့် ကယ်တင်ခဲ့ကြောင်း လူ့အခွင့်အရေးနှင့် အလုပ်သမား အခွင့်အရေး ဆောင်ရွက်နေသူများက ပြောသည်။
ကယ်တင်ထားသော အမျိုးသမီးများသည် အသက်၂၀ ကျော် အရွယ်ရှိပြီး မြန်မာနိုင်ငံသို့ ပြန်ပို့ရန် လတ်တလော ဘန်ကောက် မြို့ရှိ လူဝင်မှု ကြီးကြပ်ရေး ဌာနတွင် ယာယီ ထိန်းသိမ်းထားသည်ဟု မဟာချိုင် အခြေစိုက် အလုပ်သမား အခွင့်အရေး မြှင့်တင်ရေး အဖွဲ့ (LPN) မှ ဒါရိုက်တာ ဆွန်ဖွန် စခ၀ီက ဧရာဝတီသို့ ပြောသည်။
ယခင်လ အတွင်းက ထိုင်းနိုင်ငံ ချွန်ဘူရီမြို့နယ်တွင် ယင်း အမျိုးသမီးများ အပါအ၀င် ၃၉ ဦးခန့်သည် ထိုင်း အာဏာပိုင်များ၏ ဖမ်းဆီး ခံရပြီးနောက် အချုပ်ကားဖြင့် နယ်စပ်သို့ ပြန်ပို့ရန်အသွား လမ်းခုလပ်တွင် လူပွဲစားများထံ ရောင်းစားခံခဲ့ရခြင်း ဖြစ်ကြောင်း သိရသည်။
“ပွဲစားတွေနဲ့ အချိတ်အဆက်လုပ်ပြီး ထောင်ကား မောင်းတဲ့ ရဲတယောက်က အဲဒီ ၃၉ ယောက်ကို နယ်စပ်ကို မပို့ဘဲနဲ့ လမ်းမှာ ဖြတ်ပြီးတော့ လက်ပြောင်း လက်လွှဲ လုပ်လိုက်တယ်”ဟု ဘန်ကောက်မြို့တွင် အလုပ်သမား အရေး ဆောင်ရွက်နေသော ကိုဖိုးခွား က ရှင်းပြသည်။
ထို ၃၉ ဦးထဲမှ အမျိုးသားများသည် ငါးဖမ်း လုပ်ငန်းများ၌ ရောင်းစားခံရပြီး အမျိုးသမီး တချို့မှာ ပင်လယ်စာ ထုတ်လုပ်နေ သော စက်ရုံသို့ ရောင်းစား ခံရကြောင်း၊ တဦးလျှင် ဘတ်ငွေ ၁၁၀၀၀ ခန့်ဖြင့် ရောင်းစားခြင်း ဖြစ်ကြောင်း၊ ရောင်းစားခံ အမျိုးသမီး များက အကူအညီ တောင်းခဲ့သောကြောင့် မဟာချိုင်ဒေသရှိ ထိုင်း အာဏာပိုင်များနှင့် ပူးပေါင်း၍ သွားရောက် ကယ်တင်ခဲ့ခြင်း ဖြစ်ကြောင်း ၎င်းက ဆိုသည်။
ထိုင်းအာဏာပိုင်များ၏ အဆိုအရ ထောင်ကားမောင်းသည့် ရဲဝန်ထမ်းနှင့် နယ်စပ်ရှိ ဖမ်းဆီးခံရသည့် မြန်မာ အလုပ်သမား များကို လက်ခံမည့် လူဝင်မှုကြီးကြပ် ရေးဌာန(လ၀က) အာဏာပိုင်များ အကြား စုံစမ်း စစ်ဆေးမှုများ ပြုလုပ်မည်ဟု သိရသည်။
ပြီးခဲ့သော ဇွန်လအတွင်းက ထိုင်းနိုင်ငံအလယ်ပိုင်း ဆူဖန်ဘူရီခရိုင်တွင် ထိုင်း အာဏာပိုင် များနှင့် မြန်မာ အလုပ်သမား အရေး ကူညီဆောင်ရွက် ပေးနေသူများ ပူးပေါင်းပြီး လူကုန်ကူးသည့် အဖွဲ့တဖွဲ့ကို ဝင်ရောက် ဖမ်းဆီးကာ လူကုန်ကူး ခံရသူ မြန်မာ ၅၇ ဦးကို ကယ်တင်ခဲ့သည်။
လွန်ခဲ့သည့် မတ်လ၂၈ ရက်နေ့ကလည်း ထိုင်းနိုင်ငံတောင်ပိုင်း လဗ်ဘူရီခရိုင် ဘန်ချာမြို့နယ်အတွင်းရှိ VAK နာနတ်သီး စက်ရုံမှ မြန်မာ နိုင်ငံသားများကို ထိုင်းအာဏာပိုင်များက ဖမ်းဆီးပြီးနောက် နယ်စပ်သို့ ပြန်ပို့ခံရသည့် ၂၁၆ ဦးထဲမှ ၉ ဦးအား ပွဲစား တဦးက ချွန်ဘူရီ လှေဆိပ်၌ ရောင်းစားမှု ဖြစ်ခဲ့သည်။
ထိုသို့ ရောင်းစားခံရသော မြန်မာနိုင်ငံသား ၉ ဦးသည် ကရင်ပြည်နယ် မြ၀တီမြို့မြေနီကုန်း ရပ်ကွက်မှ ဒေသခံများ ဖြစ်ကြောင်း သိရသည်။
မြန်မာနိုင်ငံသားများ လူကုန်ကူး ခံရနေခြင်းသည် စီးပွားရေးကျပ်တည်းပြီး အလုပ်အကိုင် ရှားပါးမှုကြောင့် ဖြစ်ကြောင်း ၀ါရှင်တန် အခြေစိုက် လူကုန်ကူးမှု တိုက်ဖျက်ရေးအဖွဲ့က ဆိုသည်။
ထိုင်းနိုင်ငံရှိ မြန်မာ အလုပ်သမားများကို အကူအညီပေးနေသော World Vision အဖွဲ့ကလည်း အာရှနိုင်ငံများတွင် လူကုန် ကူးမှုများ ရှိသော်လည်း ထိုင်းနိုင်ငံတွင် အများဆုံးဖြစ်ကြောင်း ပြောဆိုသည်။
လွန်ခဲ့သည့် ၂၀၀၉ ခုနှစ် ဧပြီလလယ်တွင် ထိုင်းနှင့် မြန်မာ လူကုန်ကူးမှုပူးပေါင်းတိုက်ဖျက်ရေး နားလည်မှု စာချွန်လွှာကို နှစ်နိုင်ငံ တာဝန် ရှိသူများက လက်မှတ်ရေးထိုး ခဲ့သည်။
ဘန်ကောက်မြို့အပါအ၀င် ထိုင်းနိုင်ငံ တ၀န်းတွင် မြန်မာပြည်သား အလုပ်သမား စုစုပေါင်း ၂ သန်းမှ ၄ သန်း အထိ ရှိသည်ဟု အလုပ်သမား အဖွဲ့များက ခန့်မှန်းထားကြသည်။
Ref: ဧရာဝတီ
NLD ဈေးရောင်းပွဲတော် ခွင့်မပြု
သဲသဲ
စနေနေ့၊ ဒီဇင်ဘာလ ၁၀ ရက် ၂၀၁၁
နယူးဒေလီ(မဇ္ဈိမ)။ ။ အမျိုးသားဒီမိုကရေစီအဖွဲ့ချုပ် ဦးစီးကျင်းပမည်ဖြစ်သော “ပြည်ထောင်စု တိုင်းရင်းသားများ ပညာရေး ရန်ပုံငွေ ဂီတပွဲနှင့်ဈေးရောင်းပွဲတော်” အား ခွင့်မပြုနိုင်ကြောင်း သုဝဏ္ဍ အားကစားကွင်း တာဝန်ခံများ က ပြောဆိုသည်ဟု ပွဲဖြစ်မြောက်ရေး ကော်မတီက ပြောသည်။
NLDက ရန်ကုန်မြို့ သုဝဏ္ဍ အားကစားကွင်းတွင် ဒီဇင်ဘာလ ၁၅ ရက်နေ့၌ ရန်ပုံငွေ ဂီတပွဲတော်ကျင်းပရန် ရန်ကုန်တိုင်း အစိုးရ ၀န်ကြီးချုပ် ရုံးထံ ပွဲခွင့်ပြုမိန့် တောင်းခံထားဆဲမှာပင် သုဝဏ္ဍကွင်း အာဏာပိုင်များက အစီအစဉ် ပြန်လည် ရုပ်သိမ်းရန် သောကြာနေ့တွင် အကြောင်းကြားလာခြင်း ဖြစ်သည်။
တိုင်းရင်းသားများ ပညာရေးရန်ပုံငွေ ဖြစ်မြောက်ရေးကော်မတီတွင် NLDပါတီမှ ဗဟိုအလုပ်အမှုဆောင် ဦးဝင်းတင် က ဥက္ကဋ္ဌ၊ ပညာရေး ကွန်ယက်တွင် ဦးဖြိုးမင်းသိန်းက အတွင်းရေးမှူးအဖြစ် ဆောင်ရွက်သည်။
ယင်းရန်ပုံငွေ ဖျော်ဖြေပွဲကို NLD ပါတီ၊ NLD ပါတီနှင့်ချိတ်ဆက် ဆောင်ရွက်နေသော ပညာရေးကွန်ယက် အဖွဲ့များနှင့် အနုပညာရှင် များက ပူးပေါင်း စီစဉ်ကြခြင်းဖြစ်သည်။
“၁၆ ရက်နေ့မှာ အမျိုးသမီးအားကစားပွဲနဲ့ တိုက်နေလို့ ဒီရက်ကို မလုပ်ဖို့ ကျနော်တို့ကို ပြောလာပါတယ်။ အခုက နောက်ဆုတ် ခိုင်းတယ် ဆိုတာ ရက်ရွှေ့ပေးဖို့ မဟုတ်ပါဘူး။ မလုပ်ဖို့ ပြန်ရုပ် သိမ်းခိုင်တာပါ။”ဟု ပွဲကျင်းပရေးကော်မတီ အတွင်းရေးမှူး ကိုဖြိုးမင်းသိန်းက မဇ္ဈိမကိုပြောသည်။ အားကစား ၀န်ကြီးဌာန လက်အောက်ရှိ သုဝဏ္ဍ အားကစားကွင်း လုံခြုံရေး တာဝန်ခံ ဒုရဲမှူးကြီး စိုးသန်းက တယ်လီဖုန်းဖြင့် ဆက်သွယ် ပြောဆိုခဲ့သည်ဟု ဆိုသည်။
ပွဲကျင်းပမည့်ရက်အား အားကစာကွင်း တာဝန်ရှိသူများနှင့် တိုင်ပင်ကာ သဘောတူ ရွေးချယ်ခဲ့ပြီးနောက် ပွဲခွင့်ပြုမိန့် အတွက် လိုအပ်သော နယ်မြေဒေသခံ အုပ်ချုပ်ရေးမှူးများ၏ ထောက်ခံစာများရယူကာ ရန်ကုန်တိုင်း အစိုးရသို့ လျှောက်ထားခဲ့ခြင်း ဖြစ်သည်ဟု ပွဲဖြစ်မြောက်ရေး ကော်မတီက ပြောသည်။
ယင်းရန်ပုံငွေပွဲအား မူလအစီအစဉ်အတိုင်း ကျင်းပလိုကြောင်း ဦးဖြိုးမင်းသိန်းက “အခက်အခဲတွေကတော့ လက်မှတ် တွေလည်း ကြိုရောင်း ထားတယ်၊ အနုပညာရှင်တွေနဲ့လည်း ပြောဆို ထားတာတော့ အခက်အခဲတွေ ကတော့ အများကြီးပေါ့။”ဟု ပြောသည်။ ကြိုတင် လက်မှတ် ရောင်းရငွေ ၁၅ သိန်းခန့် ရရှိနေပြီး ပွဲကျင်းပနိုင်ရေးအတွက် ရန်ကုန်တိုင်း ၀န်ကြီးချုပ်ရုံးသို့ တင်ပြ သွားမည်ဟုဆိုသည်။
NLD ပါတီအား ပြန်လည်မှတ်ပုံတင်ကာ ရွေးကောက်ပွဲဝင်ရန် ဆုံးဖြတ်လိုက်ပြီးနောက် နိုဝင်ဘာလ ၂၅ ရက်နေ့တွင် ဒေါ်အောင်ဆန်း စုကြည်နှင့် ဂီတအနုပညာရှင်များ တက္ကသိုလ်ရိပ်သာလမ်းရှိ ဒေါ်အောင်ဆန်းစုကြည် နေအိမ်တွင် တွေ့ဆုံခဲ့ကြပြီး တိုင်းရင်းသားများ ပညာရေးအတွက် ကူညီရန် ဂီတရန်ပုံငွေပွဲကို စီစဉ်ခဲ့ကြခြင်းဖြစ်သည်။
ပွဲဖြစ်မြောက်ရေး ကော်မတီမှ ဦးဝင်းတင်၊ ပညာရေးကွန်ယက် လှုပ်ရှားသူများနှင့် ဂီတ အနုပညာရှင်များက ရန်ကုန်မြို့ ဆာကူရာ တာဝါတွင် ဒီဇင်ဘာလ ၆ ရက်နေ့တွင် သတင်းစာ ရှင်းပွဲတရပ် ပြုလုပ်ကာ ပွဲကျင်းပရေး အစီအစဉ်များကို ကြေငြာခဲ့သည်။
ဂီတပွဲကို ဒီဇင်ဘာလ ၁၅ ရက်နေ့ ညနေ ၃ နာရီမှ ည ၁၀ နာရီအထိ ပြုလုပ်မည်ဖြစ်ရာ ဖွင့်ပွဲတွင် ဒေါ်အောင်ဆန်းစုကြည် ကိုယ်တိုင် တက်ရောက် ဖွင့်လှစ်ပေးရန် စီစဉ်ထားကြောင်း သိရသည်။
Emperor၊ Metalzone၊ Lazy Club၊ Big Bag၊ Plus 3၊ Spectrum၊ Reason ၊ Wanted ၊ Vertical Vibration, The Tree အစရှိသည့် တီဝိုင်းများ နှင့်အတူ နာမည်ကျော် ဂီတ အနုပညာရှင် ၅၀ ကျော်က မေတ္တာဖြင့် ကူညီသီဆိုကြ မည်ဖြစ်သည်။
ဖခင်ဖြစ်သူ ဗိုလ်ချုပ်အောင်ဆန်း၏ အတ္ထုပတ္တိအား ရုပ်ရှင်ရိုက်ကူးစေလိုသဖြင့် ဒေါ်အောင်ဆန်းစုကြည်နှင့် မြန်မာ့ ရုပ်ရှင်လောကမှ နာမည်ကျော် သရုပ်ဆောင်များ၊ အတတ် ပညာရှင်များနှင့်လည်း ဒီဇင်ဘာလ ငါး ရက်နေ့က တွေ့ဆုံ ဆွေးနွေး ခဲ့သေးသည်။
Ref: မဇ္ဈိမ
Posts
