မွန်ဂိုလီးယားက ဒီမိုကရေစီ ညီလာခံကို အမေရိကန် အားရ

2013-04-30

မွန်ဂိုလီးယားနိုင်ငံမှာ ကျင်းပခဲ့တဲ့ သတ္တမ အကြိမ်မြောက် ဒီမိုကရေစီ လူ့အဖွဲ့အစည်း ဆိုင်ရာ ဝန်ကြီးများ အဆင့် ညီလာခံဟာ အကျိုးရလဒ်တွေ အများအပြားရရှိခဲ့တဲ့ တွေ့ဆုံဆွေးနွေးပွဲ တစ်ရပ်ဖြစ်ကြောင်း အမေရိကန်ပြည်ထောင် စု နိုင်ငံခြားရေး ဝန်ကြီးဌာနက ကြေညာချက် ထုတ်ပြန် ပြောဆို လိုက်ပါတယ်။

Community of Democracies (CD) လို့ ခေါ်တဲ့ ဒီမိုကရေစီ လူ့အဖွဲ့အစည်းရဲ့ ၀န်ကြီးများအဆင့် ညီလာခံကို ၂ နှစ် ၁ ကြိမ် ကျင်းပနေရာမှာ ဒီနှစ်အတွက် အလှည့်ကျ ဥက္ကဌအဖြစ် တာဝန်ယူတဲ့ မွန်ဂိုလီးယားနိုင်ငံရဲ့ မြို့တော် အူလန်းဘာတာမြို့မှာ ဧပြီလ ၂၇ ရက်နေ့ကနေ ၂၉ ရက်အနေ့အထိ ကျင်းပခဲ့ပါတယ်။

ဒီညီလာခံကို အစိုးရခေါင်းဆောင်တွေ၊ နိုင်ငံခြားရေး ၀န်ကြီးတွေ၊ လွှတ်တော် အမတ်တွေ၊ အရပ်ဘက် အဖွဲ့အစည်း ခေါင်းဆောင်တွေ၊ ငြိမ်းချမ်းရေး နိုဘဲဆုရှင်တွေဖြစ် ကြတဲ့ ဒေါ်အောင်ဆန်းစုကြည်နဲ့ ယီမင်နိုင်ငံသူ တာဝပ်ကောကာမာတို့ အပါအ၀င် နိုင်ငံပေါင်း ၁၁၀ ၀န်းကျင်က ကိုယ်စားလှယ်တွေနဲ့ အတူ အမေရိကန် လက်ထောက် နိုင်ငံခြားရေးဝန်ကြီး ၀ီလျံဘန်းစ်လည်း တက်ရောက်ခဲ့ ပါတယ်လို့ ကြေညာချက်မှာဖေါ်ပြပါတယ်။

ညီလာခံမှာ ကမ္ဘာတ၀ှမ်း ဒီမိုကရေစီ အသွင်ကူးပြောင်းရေးနဲ့ တိုးတက်ခိုင်မာရေးအတွက် ဘယ်လိုဘယ်ပုံ ကူညီ ပံ့ပိုးပေးကြမလဲဆိုတာ ဆန်းစစ် ခဲ့ကြပါတယ်။

ပွင့်လင်းတဲ့အစိုးရ၊ နိုင်ငံရေးအပြောင်းအလဲတွေ၊ အမျိုးသမီးနဲ့ ဒီမိုကရေစီ၊ အရပ်ဘက် အဖွဲ့အစည်းတွေ အတွက် အန္တရာယ်များ စတဲ့ အကြောင်းအရာတွေ အပြင်၊ ဒီမိုကရေစီ ပညာပေးလုပ်ငန်း၊ အကျင့်ပျက်ခြစားမှု တိုက်ဖျက်ရေး၊ အာရပ်နွေဦးရဲ့ သင်္ခန်းစာတွေနဲ့ ပြဿနာတွေ၊ ထောင်စုနှစ်ဖွံ့ဖြိုး တိုးတက်ရေး ပန်းတိုင်များနှစ်ဖြစ်တဲ့ ၂၀၁၅ အလွန်မှာ ဒီမိုကရေစီရဲ့နေရာ၊ အင်တာနက်နဲ့ ပုံနှိပ်မီဒီယာစတဲ့ အမျိုးအမည် စုံလင်လှတဲ့ အကြောင်းအရာတွေကို ဆွေးနွေးနိုင်ခဲ့ပါတယ်။

ဒါ့ပြင်ဒီနှစ် ညီလာခံဟာ ကမ္ဘာတ၀ှမ်း ဒီမိုကရေစီ တိုးတက်ရေးနဲ့ အရပ်ဘက် အဖွဲ့အစည်းတွေ ပိုမို အားကောင်း လာရေးအတွက် မှတ်တိုင်သစ် တစ်ခုအဖြစ် မှတ်ယူရမှာဖြစ်ကြောင်းလည်း အမေရိကန်ပြည်ထောင်စု နိုင်ငံခြားရေးဝန်ကြီးဌာနရဲ့ ကြေညာချက်မှာ ရေးသားထားပါတယ်။

Ref: RFA News