သပိတ်ကျဉ်း မြို့နယ်အတွင်းက စစ်တပ်ပိုင်သိမ်းထားတဲ့ လယ်တွေပြန်ပေး

2013-02-10

မန္တလေးတိုင်းဒေသကြီး၊ သပိတ်ကျဉ်းမြို့နယ် ကျောက်လှည်း ဘီးကျေးရွာမှာ ခလရ (၁၄၈) စစ်တပ် က သိမ်းယူထားခဲ့တဲ့ လယ်ဧက တစ်ထောင်ကျော်ကို ဒေသခံတွေ ပြန်လည် လုပ်ကိုင် ခွင့်ပေးလိုက်ပြီလို့ တောင်သူတွေက ပြောပါတယ်။

အခုလို လယ်ယာမြေတွေ ပြန်လည်လုပ်ကိုင်ခွင့်ရတာနဲ့ပတ်သက်ပြီး ဝမ်းသာကြောင်း ဒေသခံတောင်သူ ဦးစိန်မောင် က RFA ကို အခုလိုပြောပါတယ်။

"ခလရ (၁၄၈) တပ်ရင်းကနေ သိမ်းဆည်းခဲ့တဲ့ လယ်ယာမြေတွေ ပြန်လည် ရရှိလာပြီ ဆိုတော့ ကျွန်တော်တို့ အနေနဲ့ ဝမ်းသာ မိပါတယ်"

မနက်ဖြန်မှာတော့ ဒေသခံတောင်သူတွေဟာ မိမိပိုင်ဆိုင်တဲ့ လယ်ယာမြေတွေကို ပိုင်ဆိုင်ခွင့် ရရှိအောင် အထောက်အထား သွားရောက်ပြုလုပ် ကြမယ်လို့ ဒေသခံ လယ်သမားတွေက ပြောပါတယ်။

ပြီးခဲ့တဲ့ ဇန်နဝါရီလ နောက်ဆုံးပတ်ထဲမှာ လွှတ်တော်လယ်ယာမြေ စုံစမ်းရေးကော်မရှင်နဲ့ ကာကွယ်ရေးဝန်ကြီးဌာနတို့ စစ်တပ်ပိုင်မြေအဖြစ် သိမ်းယူထားတဲ့ လယ်ယာမြေတွေကိစ္စ ဆွေးနွေးခဲ့ကြပါတယ်။

နှစ်ဖက်သဘောတူထားတဲ့အချက်က စစ်တပ်က မလိုအပ်ပဲသိမ်းဆည်းထားတဲ့ လယ်ယာမြေတွေကို တောင်သူလယ်သမားတွေထံ ပြန်ပေးဖို့ဆုံးဖြတ်ထားသလို တပ်က ဆက်လက်သိမ်းယူထားမယ့် လယ်ယာမြေတွေကိုလည်း ကာလပေါက်ဈေးအတိုင်း လျော်ကြေးပေးဖို့ပါရှိပါတယ်။

အဲဒီလို သဘောတူညီချက်တွေ ရှိခဲ့ပြီးနောက်ပိုင်း ဒီရက်ပိုင်းမှာ သိမ်းထားတဲ့ လယ်ယာမြေအချို့ကို ဒေသခံတွေထံ ပြန်လည်ပေးအပ်ဖို့ အကြောင်းကြားခဲ့တာလို့ သိရပါတယ်။

Ref: RFA News