လက်ပန်းတောင်းတောင် သပိတ်စခန်း ၄ ခုအထိ တိုးချဲ့ ဖွင့်လိုက်ပြီ

2012-11-21

စစ်ကိုင်းတိုင်း၊ မုံရွာခရိုင်၊ လက်ပန်းတောင်းတောင် ကြေးနီ စီမံကိန်း ကို ကန့်ကွက် ဆန္ဒပြနေတဲ့ ဒေသခံတွေဟာ နိုဝင်ဘာလ ၂၁ ရက်နေ့မှာ သပိတ်စခန်း (၄) ခု အထိ ဖွင့်ပြီး ကန့်ကွက် ဆန္ဒပြနေကြပါတယ်။

ဒီကနေ့မှာတော့ လက်ပန်းတောင်းတောင်ခြေ သပိတ်စခန်းကနေ ညောင်ပင်ကြီးရွာအထိ သံဃာတော်တွေနဲ့ ဒေသခံ လူထု (၇၀၀)ကျော်ဟာ လက်ပန်းတောင်းတောင် မပျောက်ကွယ်ရေး အတွက် လမ်းလျှောက် ဆန္ဒပြခဲ့ကြတယ်လို့ ဒီအရေးမှာ ပါဝင် လှုပ်ရှားနေတဲ့ မြန်မာနိုင်ငံ ဝိဇ္ဇာ၊သိပ္ပံ တက္ကသိုလ် ကျောင်းသားများအဖွဲ့မှ တာဝန်ခံ ကိုသောင်းထိုက်က ပြောပါတယ်။

လက်ပန်းတောင်းတောင်ခြေမှာ နိုဝင်ဘာလ (၁၇) ရက်နေ့က သပိတ်စခန်း (၂) ခု ဖွင့်လှစ် ထားရှိပြီး ဒီကနေ့ မှာတော့ လက်ပန်းတောင်းတောင်ပေါ်မှာ နောက်ထပ် သပိတ်စခန်း(၂)ခု ထပ်မံ ဖွင့်လှစ်ခဲ့တာပါ။

တောင်ပေါ်က အသစ်ထပ်ဖွင့်တဲ့ သပိတ်စခန်း(၂)ခုကို စားစရာတွေ ပို့ခွင့်မရဘဲ ဒေသခံ အာဏာပိုင်တွေက လမ်းမှာ တားဆီး ဟန့်တားတာတွေ ရှိတယ်လို့ သိရပါတယ်။ ဒီအရေးကို နေ့ရောညပါ ဆန္ဒပြနေကြပေမယ့် ဦးပိုင် ကုမ္ပဏီဘက်က အခုထက်ထိ ဖြေရှင်းဆောင်ရွက်ပေးတာမျိုး မရှိသေးဘူးလို့ သိရပါတယ်။

Ref: RFA News