မြရည်နန္ဒာမြို့သစ် ကျူးကျော်နေထိုင်သူနှင့် လုံခြုံရေး တပ်ဖွဲ့ဝင် ရုန်းရင်း ဆန်ခတ်ဖြစ်

2012-08-21

မန္တလေးတိုင်း ချမ်းမြသာစည်မြို့နယ် မြရည်နန္ဒာမြို့သစ် မြရည်နန္ဒာ ရပ်ကွက်အတွင်း ကျူးကျော် နေထိုင် သူတွေကို အစိုးရ လုံခြုံရေး တပ်ဖွဲ့တွေက ဒီကနေ့ အဓမ္မ၀င်ရောက် ရိုက်နှက်ဖယ်ရှား ခိုင်းခဲ့တဲ့ အတွက် ရုန်းရင်း ဆန်ခတ် ဖြစ်ပွားခဲ့ပြီး ကိုယ်ဝန်ဆောင် နှစ်ဦး အပါအ၀င် စုစုပေါင်း ၇ ဦး ဒဏ်ရာ ရရှိခဲ့ပါတယ်။

ဒီနေ့မနက် (၇) နာရီခွဲလောက်က ရဲတပ်ဖွဲ့ ဝင်တွေက မြရည်နန္ဒာ ရပ်ကွက်ကို ဝင်ရောက် ခဲ့ပြီးနောက် ကျူးကျော်နေအိမ် ၅၂၀ ကို အဓမ္မ ရွှေ့ပြောင်း ခိုင်းခဲ့ရာမှာ ရပ်ကွက်သူ ရပ်ကွက် သားတွေကို ရိုက်နှက် ခဲ့တယ်လို့ ရပ်ကွက်သူ အမျိုးသမီး တစ်ဦးက RFA ကို ပြောပါတယ်။

"ကျွန်တော်တို့ ပြည်သူတွေပေါ် မငဲ့ညာပဲနဲ့ သူတို့က ဝင်ရောက်ပြီး အကြမ်းဖက်တယ်။ လက်နက်တွေနဲ့။ ယောင်္ကျား၊ မိန်းမ အကုန် ဆွဲချတယ်။ ကျွန်တော်တို့က သမ္မတကြီး ကယ်ပါ အော်လေ၊ သူတို့က ဆွဲချလေ။ သမ္မတကြီး ကယ်ပါ အော်လေ၊ ရိုက်လေ။ ကျွန်တော်တို့ ပြည်သူတွေ ဘက်က လက်နက်၊ တုတ်၊ ဓားလက်နက် တစ်ယောက်မှ မကိုင်ပါဘူး။ ငြိမ်းချမ်းစွာ ကျွန်တော် တို့က တောင်းပန်တာ။ ရှိခိုးပြီးတော့၊ အသက်ကြီးတဲ့သူတွေ အကုန်လုံး ရှိခိုးပြီးတော့ကို တောင်းပန်တာကို သူတို့ကမရတာ။ ဗိုလ်မှူးကြီး တစ်ယောက်ကတော့ ကျည်ဆန် ကတ်တွေကိုလေ၊ သူ့တပည့်တွေကို အကုန် ကျည်ဆန်ကတ်လိုက် ဝေတယ်။ ပစ်မိန့်ရပြီတဲ့၊ ဖမ်းမိန့်ရပြီတဲ့၊ ပစ်ဆိုပြီး ခိုင်းတယ်"

ဒဏ်ရာရသူတွေကို ဆေးရုံပို့ထားပြီး အဲဒီအထဲက နှလုံးရောဂါ အခံရှိတဲ့ သက်ကြီးလူနာ တစ်ဦးကတော့ သတိမေ့နေဆဲဖြစ်ပြီး အသက် အန္တရာယ် စိုးရိမ် ရတယ်လို့ သိရပါတယ်။

အဲဒီ ကျူးကျော်ရပ်ကွက်ကို အာဏာပိုင်တွေက တရုတ်လုပ်ငန်းရှင်တွေကို ရောင်းချ ထားတယ်လို့ သိရပါတယ်။ လောလောဆယ် ရဲတပ်ဖွဲ့ဝင်တွေ ရပ်ကွက်တွင်းက ထွက်ခွာသွားပြီ ဖြစ်ပေမယ့် နောက်တကြိမ် ထပ်လာဦးမယ်ဆိုတဲ့ ကောလာဟလတွေ ကြောင့် ကျူးကျော် အခြေချနေထိုင်သူတွေ စိုးရိမ်မကင်း ရှိနေကြပါတယ်။

Ref: RFA News